Ar gyfer Wythnos Llyfrgelloedd Gwyrdd, mae Coed Cadw fel aelodau balch o Bartneriaeth Coedwig Wrecsam yn ymuno â Llyfrgell Gwersyllt i gynnal digwyddiad addysgol am ddim i’r teulu am bŵer coed.
Bydd ‘Meet the Supertrees’, a gynhelir ddydd Mercher 28 Hydref rhwng 1 a 4pm, yn ddiwrnod o weithgareddau yn llawn hwyl, crefftau, ac addysgu pobl am uwchbwerau coed.
Gall y mynychwyr gymryd rhan mewn amrywiaeth o weithgareddau, gan gynnwys creu hudlathau, adeiladu bocsys adar, a llwybr cyfeiriannu natur. Bydd hyd yn oed cyfle i ennill coeden am ddim!
Mae’r digwyddiad hwn am ddim ac nid oes angen cadw lle. Dim ond troi i fyny ar y diwrnod. Er bod y digwyddiad am ddim, mae croeso i chi roi rhodd i gefnogi’r gwaith o reoli’r coetiroedd.
Fel cyd-aelodau Partneriaeth Coedwig Wrecsam, rydym yn ychwanegu ein cefnogaeth i’r digwyddiad. Dywedodd y Cynghorydd David A Bithell, y Dirprwy Arweinydd a’r Aelod Arweiniol dros yr Amgylchedd: “Mae hwn yn addo bod yn ddigwyddiad teuluol cadarnhaol, llawn hwyl, sy’n dangos pwysigrwydd coed i’n hamgylchedd. Mae croeso i bobl o bob oed ddod draw am ddim a darganfod pa mor arbennig yw coed mewn gwirionedd.”
Dywedodd y Cynghorydd John Pritchard, yr Aelod Arweiniol sydd â chyfrifoldeb dros lyfrgelloedd: “Mae Wythnos Llyfrgelloedd Gwyrdd yn tynnu sylw at y rôl bwysig y mae ein llyfrgelloedd yn ei chwarae wrth arwain cymunedau tuag at wybodaeth ddibynadwy, sy’n seiliedig ar dystiolaeth o amgylch natur. Os ydych chi’n rhydd, dewch draw i Lyfrgell Gwersyllt i gefnogi’r digwyddiad hwn.”
Meet the Supertrees
Dydd Mercher 28 Hydref, 1-4pm
Canolfan Adnoddau Gwersyllt, Ail Rodfa, Gwersyllt, Wrecsam LL11 4ED
Nid oes angen cadw lle ar gyfer y digwyddiad hwn sydd am ddim – dewch draw ar y diwrnod
Gallwch dderbyn gwybodaeth ac argymhellion ailgylchu yn syth i’ch mewnflwch.
