Mae Altaeros UK yn darparu atebion peirianneg a gweithgynhyrchu uwch trwy ei weithlu ymroddedig a medrus iawn, gyda’i gyfleuster yn Wrecsam yn chwarae rhan ganolog wrth i’r cwmni ehangu yn y DU. Mae’r safle wedi’i sefydlu fel hyb craidd ar gyfer cynhyrchu, datblygu technegol a chymorth i gwsmeriaid, gan leoli Altaeros UK ar gyfer twf hirdymor yn Wrecsam a’r sector peirianneg a gweithgynhyrchu ehangach.
Mae’r datblygiad yn Wrecsam yn cael ei arwain gan y Rheolwr Cyffredinol Andrea Preece, sy’n goruchwylio’r gwaith cyflawni o ddydd i ddydd ac yn cefnogi datblygiad strategol y safle wrth iddo dyfu. Yn dilyn buddsoddiad sylweddol yn y cyfleuster newydd, mae gan Altaeros UK gynlluniau clir ar gyfer twf pellach wrth i’r galw gynyddu a galluoedd peirianneg ychwanegol gael eu cyflwyno.
Mae datblygu sgiliau a thalent lleol yn ganolog i strategaeth twf hirdymor Altaeros UK. Mae’r cwmni’n gweithio’n weithredol gyda darparwyr addysg ranbarthol i ddatblygu rhaglen brentisiaeth peirianneg strwythuredig, sy’n canolbwyntio ar sgiliau gweithgynhyrchu, peirianneg a thechnoleg ymarferol. Mae trafodaethau cynnar ar y gweill â phartneriaid lleol, gan gynnwys Coleg Cambria, i greu llwybrau dilyniant clir a chyfleoedd gyrfa hirdymor i bobl ifanc yn yr ardal.
Mae Altaeros UK hefyd yn gweithio’n agos gyda’r Tîm Busnes a Buddsoddi yng Nghyngor Bwrdeistref Sirol Wrecsam, i gefnogi ei gynlluniau ehangu. Mae’r dull cydweithredol hwn yn helpu’r cwmni i archwilio cyfleoedd ar gyfer buddsoddiad parhaus, gweithgarwch ymchwil a datblygu, a thwf y gweithlu, gan gyfrannu at ddatblygiad economaidd a chreu swyddi gwerth uchel yn y sir.
Dywedodd Nigel Williams, yr Aelod Arweiniol ar gyfer yr Economi, Busnes a Thwristiaeth yng Nghyngor Bwrdeistref Sirol Wrecsam:
“Roeddwn i’n falch o ymweld â’r tîm yn Altaeros a chael taith o amgylch y ffatri i weld pob agwedd ar eu cyfleusterau cynhyrchu.
Roedd yn wych gweld cynifer o brentisiaid yn gweithio yno a chlywed straeon mor gadarnhaol am sut maen nhw’n cael eu hyfforddi ac yn dysgu sgiliau newydd.”
