Wrth i bobl ddechrau meddwl am y Nadolig, roeddem ni’n meddwl y byddai’n amser da i ddangos i chi sut y gallwch fod yn greadigol dros gyfnod yr ŵyl i gadw draw o blastig untro, a gaiff eu defnyddio yn nifer fawr o’r traddodiadau yr ydym bellach yn gyfarwydd iawn â hwy.
Rydym yn deall nad oes gan bawb yr amser i wneud bob un o’n hawgrymiadau, ond os oes gennych unrhyw amser rhydd i roi cynnig ar rai ohonynt, fe welwch eu bod yn weithgareddau llawn hwyl y gallwch eu mwynhau ynghyd â gweddill eich teulu 🙂
Ein hawgrym cyntaf yw:
Gwneud eich craceri Nadolig eich hun
Mae’r rhan fwyaf o graceri Nadolig yn cynnwys teganau plastig sydd ond yn ennyn ein diddordeb am ychydig funudau, ac yn aml iawn mae’r teganau yn annefnyddiol ac felly’n cael eu taflu.
- Cofrestru -
Mae cryn dipyn o sylw wedi bod ar y cyfryngau cymdeithasol yn ddiweddar ynghylch yr holl deganau craceri a gaiff eu taflu bob blwyddyn, ac er nad ydym yn gallu cadarnhau unrhyw un o’r ffigyrau a nodwyd, mae hyn yn sicr yn broblem fawr.
Ateb i’r broblem fyddai creu eich craceri Nadolig eich hun, sy’n llawer haws na’r disgwyl ac yn llawer o hwyl hefyd.
Mae canllawiau gwych ar Youtube yn dangos sut y gallwch wneud hyn, ond cofiwch ddefnyddio deunydd y gellir eu hailgylchu a chadw draw o bapurau wedi’u lamineiddio, gliter ac ategolion plastig.
DERBYNIWCH Y WYBODAETH DDIWEDDARAF – YMAELODWCH I GAEL EIN PRIF STRAEON.
Beth am syfrdanu rhywun â’ch sgiliau creadigol? Neu beth am gynnal cystadleuaeth gyda gweddill eich teulu neu ffrindiau i weld pwy sy’n gallu creu’r cracer gorau?
Rhowch gyfle i’r rhai iau yn eich teulu i gymryd rhan drwy ofyn iddynt ysgrifennu negeseuon/jôcs Nadoligaidd i’w cynnwys yn y craceri, sydd hefyd yn ychwanegu elfen bersonol.
Yn ogystal â hynny, drwy wneud eich craceri eich hun, yn hytrach nag anrheg blastig, gallwch chi roi rhywbeth defnyddiol yn y craceri i’ch teulu neu ffrindiau. Maent yn siŵr o gael mwy o ddefnydd allan o anrheg gennych chi na rhyw hen io-io plastig tila! 🙂
Lapiwch eich anrhegion mewn modd ecogyfeillgar
Rydym wedi dweud wrthych yn ddiweddar na ellir ailgylchu bob math o bapur lapio. Darllenwch yr erthygl hon i’ch atgoffa.
Un ffordd o sicrhau y byddwch yn gallu ailgylchu eich papur lapio yw drwy eu lapio mewn modd ecogyfeillgar yn y lle cyntaf.
Mae lapio eich anrhegion mewn papur brown a llinyn yn gwneud iddynt edrych yn smart ac yn unigryw. Neu, os hoffech ychwanegu ychydig o liw iddynt, beth am ddefnyddio celyn neu bô y gellir ei ailddefnyddio.
Syniad arall ffynci yw defnyddio hen gylchgrawn comig i lapio eich anrhegion. Rhoddom gynnig ar hyn yn ddiweddar, ac roeddem wedi dotio atynt.
Addurniadau bwytadwy ar gyfer y goeden Nadolig
A ydych chi erioed wedi ystyried defnyddio addurniadau bwytadwy yn hytrach na ffigurynnau plastig ar gyfer y goeden Nadolig?
Beth am osod her i’ch hunan i weld pa mor greadigol y gallwch chi fod? 🙂
Hyd yn oed os nad ydych chi’n berson creadigol, gallwch bobi bisgedi teisen frau i siapiau calon neu goeden Nadolig yn hawdd. Ond cofiwch wneud twll yn y bisgedi cyn eu pobi nhw er mwyn i chi allu eu hongian nhw â llinyn.
Dyma ffordd wych arall i gynnwys y teulu cyfan, a chewch ddanteithion blasus! 🙂
A wnaethoch chi fwynhau’r awgrymiadau hyn? Os felly, gobeithiwn y gwnewch chi fwynhau rhoi cynnig arnynt gyda’ch ffrindiau a’ch teulu.
Derbyniwch y newyddion a’r wybodaeth ddiweddaraf yn syth i’ch mewnflwch.
COFRESTRWCH FI RŴAN
