Mae Ysgol Maelor yn Llannerch Banna wedi derbyn adborth disglair yn ei hadroddiad arolygu diweddar gan Estyn – sy’n tynnu sylw at ei “chymuned groesawgar a chynhwysol” lle mae disgyblion yn cael eu cefnogi’n effeithiol ac yn “arddangos agweddau cadarnhaol at ddysgu”.
Yn dilyn Arolwg Craidd yr ysgol ym mis Hydref 2025, tynnodd arolygwyr sylw at y ffaith bod disgyblion “yn ymddwyn yn dda mewn gwersi ac yn awyddus i gyfrannu at drafodaethau.” Cydnabuwyd myfyrwyr Chwechwe Dosbarth Llannerch Banna hefyd am eu hymgysylltiad gweithredol a’u brwdfrydedd dros ddysgu.
Mae’r adroddiad yn canmol athrawon am eu “gwybodaeth pwnc gadarn”, defnydd effeithiol o iaith, a’r gallu i addasu gwersi i fodloni anghenion unigol. Canmolodd arolygwyr hefyd y berthynas gref rhwng staff a disgyblion, gan ddweud bod “athrawon yn meithrin perthnasoedd gwaith cryf gyda disgyblion ac yn rheoli ymddygiad yn gyson yn dda.”
Cydnabu Estyn hefyd ymrwymiad yr ysgol i gymhwysedd digidol a rhifedd, gan ddisgrifio sgiliau digidol fel “cryfder nodedig” gyda dilyniant clir wedi’i fapio ar draws y cwricwlwm. Mae Estyn wedi gwahodd yr ysgol i gynhyrchu astudiaeth achos ar y gwaith hwn, a fydd yn cael ei chyhoeddi ar wefan Estyn.
Canmolwyd arweinwyr am eu dull meddylgar o gynllunio cwricwlwm, cydweithredu effeithiol ag ysgolion cynradd, a darparu gweithgareddau cyfoethogi sy’n ehangu profiadau disgyblion.
Canmolwyd hefyd Ddarpariaethau Adnoddau’r ysgol, sy’n darparu “amgylchedd tawel a chefnogol lle mae disgyblion yn teimlo’n ddiogel ac yn hapus.” Yn ogystal, canmolwyd tîm Anghenion Dysgu Ychwanegol (ADY) yr ysgol am ei ymroddiad i wella canlyniadau i bob dysgwr.
Canmolwyd arweinyddiaeth trwy gydol yr adroddiad. Mae’r Pennaeth newydd Leanne Eyre yn rhoi “arweinyddiaeth strategol, ddeinamig a meddylgar”. Canfu arolygwyr ei bod hi wedi “rheoli newid yn effeithiol” ac “yn sicrhau bod disgyblion yn parhau i fod yn ganolog i waith yr ysgol.” Yn ogystal, disgrifiwyd uwch arweinwyr fel rhai sydd wedi “datblygu diwylliant o gydweithredu, myfyrio ac atebolrwydd ar draws yr ysgol” yn ogystal â blaenoriaethu nodau addysg cenedlaethol yn effeithiol.
Yn ogystal, canmolwyd llywodraethwyr am gymorth a herio effeithiol a rheoli cyllideb yr ysgol gyda diwydrwydd, hyd yn oed mewn amseroedd heriol.
Mae’r ysgol wedi cael pedwar argymhelliad i ganolbwyntio arnynt:
- Parhau i weithio tuag at leihau’r diffyg cyllidebol.
- Sicrhau bod pob arweinydd, yn enwedig arweinwyr canol, yn gwerthuso’r ddarpariaeth yn ôl ei heffaith ar ddysgu disgyblion.
- Gwella cyfraddau presenoldeb ysgol gyfan.
- Cryfhau’r ddarpariaeth ar gyfer datblygiad graddol sgiliau llythrennedd disgyblion, yn enwedig eu sgiliau darllen uwch.
Dywedodd y Pennaeth Leanne Eyre: “Rwy’n hynod falch o’n cymuned ysgol. Mae’r adroddiad hwn yn adlewyrchu ymroddiad a gwaith tîm ein staff, brwdfrydedd ein disgyblion, a chefnogaeth ddiwyro teuluoedd, partneriaid cynradd a llywodraethwyr.
“Mae’n wych gweld Estyn yn cydnabod effaith gadarnhaol datblygiadau diweddar a’n hymrwymiad i welliant parhaus. Rydym yn gyffrous i adeiladu ar y sylfaen gadarn hon a sicrhau bod Ysgol Maelor yn parhau i ffynnu a thyfu fel amgylchedd cynhwysol, uchelgeisiol a chefnogol i bob disgybl.”
Dywedodd Cadeirydd y Llywodraethwyr, Cora Suckley: “Rydym wrth ein bodd gyda chanfyddiadau’r adroddiad hwn gan Estyn, sy’n adlewyrchu gwaith caled ac ymrwymiad pawb sy’n ymwneud ag Ysgol Maelor.
“Mae ein llywodraethwyr yn falch o gefnogi ysgol sy’n rhoi disgyblion wrth galon popeth y mae’n ei wneud ac sy’n parhau i ymdrechu am ragoriaeth. Mae’r gydnabyddiaeth hon yn dyst i ymdrech gydweithredol staff, myfyrwyr, teuluoedd, a’r gymuned ehangach. Edrychwn ymlaen at adeiladu ar y llwyddiannau hyn a chefnogi cynlluniau uchelgeisiol yr ysgol ar gyfer y dyfodol.”
