Gyda’r Nadolig yn nesáu, mae’n siŵr eich bod wedi bod yn meddwl am y bargeinion perffaith i’w prynu i’ch anwyliaid…
Wel, yma yn Wrecsam, rydyn ni eisoes wedi gwneud Adduned Blwyddyn Newydd i leihau ein gwastraff a chynyddu ein hailgylchu, i gael Wrecsam nôl ymhlith y goreuon o ran ailgylchu.
Mae parhau i ailgylchu ac ailddefnyddio cymaint â phosib yn dal yn bwysig drwy gydol gwyliau’r Nadolig.
Prynu papur lapio ailgylchadwy
Oeddech chi’n gwybod bod 227,000 milltir o bapur lapio yn cael ei daflu i ffwrdd ar gyfartaledd bob blwyddyn, sy’n ddigon i lapio’r Ddaear gyfan fwy na naw gwaith! Yn anffodus, nid yw’r holl bapur lapio hwn yn ailgylchadwy.
Felly, mae’n bosib eich bod chi’n ystyried sut mae gwybod a oes modd ailgylchu’r papur lapio rydych chi’n bwriadu ei ddefnyddio.
Wel, dyma ddisgrifiad byr…
Nid yw papur lapio ffoil sgleiniog neu â gliter yn ailgylchadwy ac mae papurau lapio sgleiniog eraill yn tueddu i fod wedi eu lamineiddio, gan eu gwneud nhw’n amhosib eu hailgylchu hefyd. Dylech hefyd geisio osgoi ychwanegu unrhyw beth plastig. Mae’r prawf sgrensian yn ffordd gyflym a hawdd o wirio – sgrensiwch y papur i siâp pêl; os yw’n aros ar siâp pêl mae’n debygol y gall gael ei ailgylchu (cyn belled nad yw’n ffoil neu’n cynnwys gliter) a gall fynd yn eich bin ailgylchu papur.
Os gwnewch chi geisio osgoi’r rhain wrth wneud eich siopa Nadolig, yna y newyddion da yw y dylai pob math arall o bapur lapio fod yn iawn i’w ailgylchu…Gwnewch yn siŵr eich bod yn tynnu unrhyw dâp gludiog i ffwrdd gyntaf!
Prynu cardiau a bagiau anrhegion ailgylchadwy
Pa mor barod ydych chi eleni i ysgrifennu cardiau pawb sydd ar y rhestr Nadolig? Wel, os nad ydych wedi prynu cardiau eto, dyma ambell awgrym i sicrhau eich bod chi’n gallu prynu’r rhai sydd orau i’r amgylchedd!
Mae modd ailgylchu’r rhan fwyaf o gardiau Nadolig a’u hamlenni gyda’ch papur, ond mae’n ddefnyddiol gwybod pa fathau nad oes modd eu hailgylchu ac y dylech chi felly geisio eu hosgoi. Fel gyda phapur lapio, nid oes modd ailgylchu cardiau Nadolig â gliter a rhubanau felly gwnewch yn siŵr wrth eu rhoi gyda’ch ailgylchu papur nad oes rhubanau na gliter ynghlwm wrthyn nhw.
Mae bagiau anrhegion papur a chardfwrdd bob amser yn opsiwn gwych gan fod modd eu hailgylchu (ar ôl i chi dynnu’r dolenni). Ond ydych chi wedi ystyried y gallech chi wneud hyd yn oed yn well wrth brynu holl fargeinion Nadolig, drwy eu rhoi mewn cwdyn siopa y gellir ei ailddefnyddio? Byddai’r derbynnydd yn cael dwy anrheg felly! Y rhodd ei hun a chwdyn siopa hir ei oes!
Hefyd, efallai gallech ystyried ffyrdd eraill o lapio amgen, fel defnyddio tywel te neu bapur sidan.
Sut i baratoi at y Nadolig
Ffordd arall y gallech chi eich paratoi eich hun ar gyfer y Nadolig yw trwy Gofrestru i dderbyn negeseuon atgoffa am gasgliadau gwastraff. Trwy wneud hyn, byddwch yn derbyn e-bost ddiwrnod cyn eich diwrnod casglu yn eich atgoffa i roi’ch biniau allan. Mae hefyd yn ffordd wych o gael gwybod am unrhyw newidiadau a allai effeithio arnoch chi.
Diweddariad – Llai o gasgliadau gwastraff o’r ardd dros fisoedd y gaeaf – Newyddion Cyngor Wrecsam
