Cymeradwywyd cynnydd arfaethedig mewn prisiau prydau ysgolion uwchradd a sesiynau chwarae ‘clwb brecwast’ ysgolion cynradd yn yng nghyfarfod Bwrdd Gweithredol Cyngor Wrecsam yr wythnos hon (dydd Mawrth, 6 Chwefror).
Mae Cynghorau ledled y DU yn wynebu heriau cyllidebol enfawr, ac mae’r cynnydd arfaethedig ymysg y mesurau arbed arian diweddaraf a gynigir yn Wrecsam.
Prydau ysgolion uwchradd
Os cymeradwyir y newidiadau, bydd cost prydau ysgolion uwchradd yn cynyddu o £2.65 i £2.80 (bydd eitemau eraill ar y fwydlen – fel byrbrydau – hefyd yn destun cynnydd cyfwerth).
Dywedodd y Cyng. Phil Wynn, Aelod Arweiniol Addysg: “Roedd prisiau prydau ysgolion uwchradd wedi aros yn ddigyfnewid o fis Medi 2019 i fis Medi 2023, pan gynyddodd y pris o 20c.
- Cofrestru -
“Ond mae cynnydd pellach mewn costau a heriau cyllidebol yn golygu bod rhaid adolygu’r prisiau eto, gyda chynnig i gynyddu’r pris o £2.65 i £2.80 yn weithredol o’r 1 Ebrill.
“Yn anffodus ni allwn amsugno’r cynnydd parhaus mewn costau yn llawn mwyach, ond rydym wedi ceisio diogelu disgyblion a rhieni rhag effaith lawn y cynnydd mewn costau bwyd.
“Mae’r opsiwn ‘pryd y dydd’ yn parhau i gynnig gwerth da am arian a hyd yn oed ar ôl y cynnydd hwn mae pris pryd ysgol uwchradd yn Wrecsam yn parhau yn unol â rhai awdurdodau lleol eraill yng Ngogledd Cymru.”
Sesiynau chwarae yn y bore (ysgolion cynradd)
Mae nifer o ysgolion cynradd yn Wrecsam yn cynnig brecwast am ddim mewn sesiwn chwarae yn y 30 munud cyn dechrau’r ysgol. O dan y cynigion, ni fyddwn yn codi tâl am y rhain.
Fodd bynnag, mae nifer o ysgolion yn cynnig sesiwn chwarae 30 munud ychwanegol (yn gynt) ac yn codi £2 y plentyn ar rieni.
Ond, mae costau staffio a gweinyddol cynyddol, pwysau’r gyllideb bresennol a’r ffaith nad yw’r Cyngor yn derbyn unrhyw gyllid allanol yn golygu bod rhaid i ni adolygu ein prisiau.
O dan y newidiadau a gymeradwywyd gan Fwrdd Gweithredol, byddai’r ffi yn cynyddu i £3 fesul plentyn yn weithredol o’r 1 Ebrill (£1 ar gyfer plant sy’n gymwys i dderbyn prydau ysgol am ddim).
Ni fyddai’r cynnydd hwn yn effeithio ar y sesiwn brecwast 30 munud yn union cyn dechrau’r diwrnod ysgol, a fyddai’n parhau am ddim i bob plentyn.
Dywedodd y Cynghorydd Wynn: “Rydym yn gwybod bod hyn yn cael ei gyflwyno yn ystod cyfnod lle bo nifer o breswylwyr yn gweld costau’r aelwyd yn her, ac nid ydym yn ystyried y rhain ar chwarae bach.
“Ond byddai cynyddu’r ffi i £3 yn cynorthwyo i sicrhau y gall ysgolion barhau i ddarparu sesiynau chwarae ychwanegol”.
Pwysau cyllidebol sy’n wynebu’r Cyngor
Mae Cyngor Wrecsam yn parhau i fod yn rhagweithiol wrth fynd i’r afael â phwysau cyllidebol, gyda chynigion arbed arian newydd yn cael eu cyflwyno’n rheolaidd i’r Bwrdd Gweithredol.
Ynghyd â mynd i’r afael â phwysau cyllidebol yn ystod y flwyddyn, mae’r Cyngor yn gweithio ar ddiffyg o £22.6m y flwyddyn nesaf, ac eisoes wedi gorfod gwneud toriadau o dros £60m rhwng 2016 a 2020.
Mae hyn yn amlygu maint yr heriau y mae’r holl Gynghorau yn eu hwynebu ar hyn o bryd.
Cymorth gyda chostau byw
Os ydych chi’n cael trafferth talu costau eich aelwyd, ewch i dudalennau ‘cymorth gyda chostau byw’ y Cyngor am gyngor ar unrhyw gymorth arall a allai fod ar gael i chi.
Mae gan Lywodraeth Cymru hefyd dudalen gymorth yn ymwneud â chostau byw, sy’n darparu gwybodaeth ynglŷn â ffynonellau o gymorth ariannol posibl.
