Mae pobl yn Wrecsam yn cael eu hannog i fynychu dangosiad ffilm ymwybyddiaeth gyhoeddus o’r DU am yr argyfwng hinsawdd a natur sy’n ein hwynebu.
Rhyddhawyd The People’s Emergency Briefing ym mis Ebrill eleni ac mae’n cael ei dangos mewn cymunedau, gweithleoedd, cynghorau, sinemâu a lleoliadau eraill ledled y wlad.
Mae’r ffilm yn seiliedig ar sesiwn friffio arwyddocaol a gynhaliwyd yn San Steffan, lle cyflwynodd arbenigwyr blaenllaw o’r DU dystiolaeth i fwy na 1,200 o wleidyddion, arweinwyr busnes a ffigurau dylanwadol eraill.
Wedi’i chyflwyno gan Chris Packham, mae’n archwilio amrywiaeth o faterion gan gynnwys:
- Newid hinsawdd a thywydd eithafol.
- Colli natur a dirywiad bioamrywiaeth.
- Diogeledd bwyd.
- Iechyd y cyhoedd.
- Gwydnwch seilwaith.
- Yr economi.
- Diogelwch cenedlaethol.
Atebion a chamau posibl y gall cymunedau, sefydliadau a llywodraethau eu cymryd.
Bydd dangosiad cyhoeddus ddydd Llun, 5 Hydref, rhwng 6pm ac 8pm yng nghanolfan Tŷ Pawb yng nghanol dinas Wrecsam. Mae croeso i bawb.
Archebwch eich tocynnau am ddim nawr.
Dylai pawb wylio’r ffilm hon
Gwyliodd cynghorwyr ac uwch reolwyr Wrecsam y ffilm yn ddiweddar i ddysgu mwy am yr heriau sy’n wynebu’r DU, ac i edrych ar sut y gall y Cyngor ymateb ar lefel leol.
Dywedodd y Dirprwy Arweinydd, y Cynghorydd David A Bithell, sy’n arwain ymateb y Cyngor i newid hinsawdd: “Mae’r byd yn wynebu argyfwng hinsawdd a natur enfawr, a bydd Wrecsam – fel pob cymuned arall – yn teimlo’r effaith.
“Mae’n hawdd anwybyddu’r broblem oherwydd ei fod yn teimlo’n rhy fawr i fynd i’r afael ag ef ar lefel leol, ond y gwir yw y gallwn ni i gyd chwarae ein rhan – nid cyfrifoldeb arweinwyr y byd a diwydiannau mawr yn unig yw hyn i gyd.
“Nid problem yfory yw hon… mae’n broblem i heddiw, ac mae’n rhywbeth a fydd yn effeithio ar bob un ohonon ni a’n plant, felly dewch i weld y ffilm os gallwch chi.
“Nid yw’n drist nac yn frawychus – mae’n ddiddorol, addysgiadol ac ysbrydoledig iawn, ac efallai ei fod yn un o’r pethau pwysicaf y byddwch chi’n ei wylio erioed.
“Mae’r Cyngor eisiau i drigolion fod yn rhan o’r sgwrs hon, oherwydd mae gan y materion sy’n cael eu harchwilio yn y ffilm y potensial i effeithio ar bawb – o gostau iechyd a chostau’r cartref i fwyd, llifogydd, gwasanaethau lleol a’r lleoedd rydyn ni’n byw.
“Po fwyaf ydyn ni’n gwybod, y gorau fyddwn ni am baratoi, ymateb a llunio dyfodol mwy gwydn i Wrecsam.”
The People’s Emergency Briefing
Dydd Llun, Hydref 5
6pm-8pm
Tŷ Pawb, Wrecsam, LL13 8BB
