Cyngor Wrecsam yn Dathlu Cwblhau Trydedd Rownd o Waith Adnewyddu Tai Gwarchod
Mae adran Tai Cyngor Wrecsam wedi cwblhau mwy o waith adnewyddu ar eu stoc dai gwarchod.
Mae buddsoddiad sylweddol o oddeutu 21.6 miliwn wedi ariannu gwaith adnewyddu llwyddiannus i’r stoc Tai Gwarchod mewn pedwar lleoliad dros y blynyddoedd diwethaf. Mae gwaith adnewyddu Tai Gwarchod bellach wedi’i gwblhau yn Llai (Tir y Capel), Rhos (Llys y Mynydd), Coed-poeth (Maes y Capel), gyda’r diweddaraf yn Wisteria Court, Wrecsam.
Cafwyd hefyd gyfanswm o 1 filiwn o gyllid grant at y gwaith adnewyddu ar gyfer mesurau fel ffenestri gwydr triphlyg a phympiau gwres ffynhonnell aer.
Mae’r gwaith adnewyddu diweddaraf (Wisteria Court, Wrecsam) yn darparu 26cartrefi cynnes, ynni-effeithlon a chyfforddus, sy’n i helpu’r genhedlaeth hŷn i fyw’n annibynnol.
Mae Wisteria Court yn cynnig amgylchedd cartrefol ac ardal gymunedol eang a modern, a gerddi wedi’u tirlunio sy’n annog cymdeithasu i anelu at leihau ynysigrwydd.
Yn debyg i’r adnewyddiadau eraill, mae Wisteria Court yn cynnwys pwyntiau gwefru trydan, siopau sgwteri, ardal teras to a llawer mwy gan foderneiddio’r ffordd o fyw.
Mae mynediad gwastad gan yr holl unedau sydd wedi’u hadnewyddu, ac mae cynllun yr adeiladau wedi’i wella er gwell symudedd i’r sawl sy’n defnyddio sgwter.
Dywedodd deiliad contract o Faes y Capel, a adnewyddwyd yn ddiweddar, “dw i wrth fy modd ac wedi gwirioni efo fy nghartref newydd. Roeddwn i ychydig yn amheus pan ddywedwyd wrthyf ei fod yn mynd i fod yn gynllun agored, ond mi wnes i ddod i arfer ag o’n syth a dwi wedi gwirioni efo fo. Mae’r gwasanaeth warden yn ddefnyddiol iawn ac mae pawb sy’n cymryd rhan wedi bod yn anhygoel.”
Mae effeithlonrwydd ynni wedi’i ystyried a gosodwyd Pympiau Gwres Ffynhonnell Aer a ffenestri gwydr triphlyg. Mae pympiau gwres ffynhonnell aer yn cynnig gwres cyson a chyfforddus ar gyfer pob tymor, gydag arbedion cost hirdymor posibl.
Mae’r pedwar safle adnewyddu wedi dilyn dyluniad cyson, gyda’r holl waith adeiladu wedi’i wneud gan Read Construction.
Dywedodd Alex Read, Cyfarwyddwr Read Construction, “Wedi’i gyflwyno drwy Bartneriaeth Adeiladu Gogledd Cymru, mae adnewyddu Wisteria Court yn adlewyrchu ein hymrwymiad i adeiladu cartrefi o ansawdd uchel, sy’n barod i’r dyfodol sy’n gwasanaethu anghenion y gymuned.
“Trwy ymgorffori technolegau cynaliadwy a chreu mannau hygyrch, cymdeithasol, rydym wedi helpu i drawsnewid y safle yn amgylchedd diogel, modern sy’n cefnogi byw’n annibynnol ac yn cryfhau cysylltiadau cymunedol.
“Mae Cyngor Wrecsam yn gleient cyson a gwerthfawr, ac rydym yn falch o fod wedi gweithio gyda nhw unwaith eto i gyflawni prosiect sy’n gwneud gwahaniaeth gwirioneddol i fywydau trigolion.”
Dywedodd y Cynghorydd David A Bithell, Aelod Arweiniol Tai a Newid Hinsawdd “Rydym wrth ein bodd i ddatgelu ein pedwerydd safle adnewyddu o’n stoc Tai Gwarchod mewn cydweithrediad â Reads Construction. Mae’r buddsoddiad sylweddol hwn wedi arwain at waith adnewyddu o ansawdd uchel ar bedwar safle gan helpu pobl hŷn i fyw’n annibynnol. Edrychaf ymlaen at weld trigolion yn ymgartrefu yn eu cartrefi ar eu newydd wedd, yn Wisteria Court.”
Ar ôl gweld yr uned dai gwarchod Wisteria Court a adnewyddwyd yn ddiweddar, dwedodd Cynghorydd Brynyffynnon, Phil Wynn , “Bydd y fflatiau un a dwy ystafell wely ar eu newydd wedd, a’r lolfa gymunedol groesawgar a’r ardd deras, rwy’n siŵr, yn taro’r cydbwysedd cywir o breifatrwydd a lle ar gyfer cysylltiad cymdeithasol ar gyfer chwech ar hugain o ddeiliaid contract y dyfodol.
“Mae’r buddsoddiad yn y prosiect hwn gan Adran Tai CBSW yn ymrwymiad clir i gefnogi aelodau hŷn o’n cymuned gyda thai a gofal o safon. Edrychaf ymlaen at y diwrnod agoriadol swyddogol i glywed barn deiliaid y contractau.”
A fyddech chi neu rywun rydych chi’n ei adnabod yn elwa o Lety Tai Gwarchod?
Nid yw’r un peth â chartref preswyl neu nyrsio, ac mae gan bob tenant fflat, fflat bach neu byngalo heb ei ddodrefnu ei hun gyda chymorth warden wrth law, a chyfle i gymdeithasu yn yr ardaloedd cymunedol.
Gallech fod yn gymwys i fyw mewn tŷ gwarchod os ydych dros eich 60 oed. Os ydych dros eich 55 oed ac mae gennych “angen cymorth profedig” efallai y byddwch chi’n gallu gwneud cais hefyd.
Gallai tai gwarchod fod yn iawn i chi os ydych chi…
- Eisiau cadw eich annibyniaeth, ond hoffech fod y tawelwch meddwl o gael gwasanaeth cymorth proffesiynol ar gael pan fo angen
- Yn mwynhau cymysgu â phobl eraill pan ddymunwch
- Ar hyn o bryd yn byw mewn llety sy’n rhy fawr i’ch anghenion
