Mae busnesau Wrecsam yn cael eu hannog i wneud cais am grant newydd a ariennir gan Gronfa Ffyniant Gyffredin y DU.
Mae Cyngor Wrecsam wedi agor ceisiadau ar gyfer cynllun Grant Busnes Wrecsam 2025, sy’n ceisio rhoi hwb pellach i’r economi leol.
Mae’r cynllun yn agored i fusnesau bach a chanolig cymwys ym Mwrdeistref Sirol Wrecsam sydd ar fin cychwyn neu wedi cychwyn eisoes.
Mae’r grantiau’n amrywio o £2,000 i £10,000, a gellir eu defnyddio i ad-dalu busnesau am hyd at 50% o gostau gwariant cyfalaf neu refeniw cymwys.
Gall hyn gynnwys pethau fel peiriannau ac offer newydd, cerbydau ffatri fel cerbydau fforch godi, caledwedd TG a thelathrebu, a deunyddiau marchnata.
Ewch i wefan Cyngor Wrecsam i gael rhagor o wybodaeth ac i wneud cais am grant.
Rhaid cyflwyno ceisiadau erbyn hanner dydd ddydd Mawrth, 1 Gorffennaf.
Dywedodd y Cynghorydd Nigel Williams, yr Aelod Arweiniol dros Fusnes, yr Economi a Thwristiaeth: “Mae hwn yn gyfle gwych i fusnesau bach a chanolig yn Wrecsam, yn ogystal â mentrau newydd nad ydyn nhw wedi dechrau masnachu eto.
“Os yw’ch busnes wedi’i leoli yn y fwrdeistref sirol, yna edrychwch ar y meini prawf cymhwysedd i weld a ydych chi’n gymwys – ond mae’n bwysig gweithredu nawr, neu gallech chi golli cyfle.
“Cofiwch fod yn rhaid i’ch busnes gael yr arian i dalu am y gwaith i ddechrau, gan fod y grantiau ar gyfer ad-dalu hyd at 50% o’r gost yn ddiweddarach.”
Rhaid i ymgeiswyr llwyddiannus fodloni o leiaf ddau o’r prif amcanion penodol, a rhaid iddyn nhw gwblhau eu prosiect a hawlio eu grant erbyn 31 Ionawr, 2026.
Bydd pob cais yn cael ei asesu o ran cymhwysedd, gwerth am arian a’r allbynnau sydd wedi’u cyflawni.
