Mae cynllun peilot a allai wneud teithio i’r ysgol yn fwy diogel ac yn haws i blant mewn rhan brysur o Wrecsam wedi cael ei ymestyn ar ôl arwyddion cynnar o lwyddiant.
Mae Cyngor Wrecsam, mewn partneriaeth â Letman Associates, wedi bod yn treialu menter ‘Strydoedd Ysgol’ yn Ysgol Gynradd Gymunedol Fictoria.
Roedd hyn mewn ymateb i nifer o broblemau parcio a thraffig y tu allan i’r ysgol, gwaith dosbarth gyda disgyblion, arolygon gyda rhieni a gwarcheidwaid, a sgyrsiau gyda thrigolion lleol.
Yn rhan o’r treial, cyflwynwyd cyfyngiadau traffig wedi’u hamseru i gyfyngu ar nifer y cerbydau oedd yn gyrru ac yn parcio ger yr ysgol ar ddechrau’r dydd, ac amser mynd adref, yn ogystal â system unffordd ar Poyser Street i’r gorllewin (rhwng Hampden Road a Victoria Road) 24 awr y dydd, saith diwrnod yr wythnos, gydag arwyddion dargyfeirio ar waith.
Ar ôl rhai arwyddion cynnar calonogol, mae’r treial bellach wedi’i ymestyn a bydd yn parhau trwy Orchymyn Rheoleiddio Traffig Arbrofol, a fydd yn cael ei blismona a’i gefnogi gydag arwyddion.
Bydd y drefn gyfreithiol newydd hefyd yn ymestyn y system unffordd i gynnwys Hampden Road ac Edward Street. Bydd y gorchymyn ar waith am hyd at 18 mis.
Mae ‘Strydoedd Ysgol’ yn fenter genedlaethol sy’n anelu at wella diogelwch y tu allan i ysgolion trwy leihau traffig a pharcio peryglus neu ddifeddwl.
Dyma’r treial ‘Strydoedd Ysgol’ cyntaf yn Wrecsam, ac mae’n cael ei ariannu gan gronfa Llwybrau Diogel mewn Cymunedau Llywodraeth Cymru.
Cynyddodd teithio llesol i’r ysgol o 66% cyn y treial Stryd Ysgol i 75% yn ystod y cyfyngiadau traffig, yn ôl data a gasglwyd drwy gynllun WoW Living Streets, sy’n cael ei ariannu gan Lywodraeth Cymru.
Mae dadansoddiad o ddata ymgysylltu ôl-weithredu yn dangos bod 73% o ymatebwyr yn teimlo y gallent gerdded i’r ysgol yn ddiogel yn ystod y treial, o gymharu â 31% cyn y treial.
Nododd 17% o ymatebwyr y gallent feicio’n ddiogel cyn y treial, ond cynyddodd hyn i 68% ar ôl dechrau’r treial.
Dywedodd y Cynghorydd Huw Jones, Aelod Arweiniol Cyngor Wrecsam â chyfrifoldeb dros ddiogelwch ar y ffyrdd: “Rydyn ni wedi bod yn treialu’r trefniadau newydd y tu allan i Ysgol Gynradd Fictoria, ac mae arwyddion cynnar wedi bod yn gadarnhaol iawn.
“Rydyn ni wedi cael plant a’u teuluoedd yn dweud eu bod yn teimlo’n fwy diogel wrth groesi’r ffordd, ac mae athrawon a staff hefyd yn teimlo’n obeithiol. O ganlyniad, rydym wedi penderfynu ymestyn y treial er mwyn caniatáu inni ddadansoddi’r effaith ymhellach.”
Ychwanegodd y Cynghorydd Phil Wynn, yr Aelod Arweiniol dros addysg: “Rydyn ni eisiau gwneud gatiau’r ysgol yn lle mwy diogel ac iach i blant, ac os yw’r cynllun peilot yn llwyddiant, gallai baratoi’r ffordd ar gyfer treialon tebyg mewn ysgolion cynradd eraill yn Wrecsam.
“Dros yr ychydig flynyddoedd diwethaf, mae Strydoedd Ysgol wedi cael eu cyflwyno mewn rhannau eraill o’r DU gyda chryn lwyddiant, ac mae’r cyfnod treialu cychwynnol yn Fictoria wedi bod yn galonogol dros ben.”
