Gwahoddir busnesau a thrigolion Wrecsam i ddysgu mwy am waith ar y cynllun teithio llesol sydd ar ddod i ganol y ddinas.
Bydd gwaith ffordd yn digwydd o Ionawr 5 (2026) a bydd yn debygol o barhau fesul cam tan ddechrau’r haf.
Bydd y cynllun yn arwain at adeiladu llwybr cerdded a beicio gwell rhwng yr ardal i gerddedwyr yng nghanol y ddinas yn Stryt yr Hôb, ger Waterstones, a gorsaf reilffordd Wrecsam Cyffredinol.
Roedd y cynllun yn rhan o ymgynghoriad cyhoeddus yn haf 2023. Ers hynny, mae newidiadau i’r cynlluniau wedi eu gwneud yn dilyn adborth gan y cyhoedd yn ogystal â chyrff cyhoeddus.
Bydd sesiynau galw heibio cyhoeddus yn cael eu cynnal ddechrau mis Rhagfyr, lle gall pobl weld cynlluniau ar gyfer y llwybr teithio llesol rhwng yr orsaf reilffordd a chanol y ddinas.
Bydd yr ardal hefyd yn elwa ar dirlunio a dodrefn stryd newydd yn unol â’r newidiadau diweddar ar hyd y Stryd Fawr.
Dwedodd y Cynghorydd Terry Evans, Aelod Arweiniol dros yr Amgylchedd i Gyngor Wrecsam: “Rydym wrth ein bodd y bydd y cynllun hwn yn dod i ffrwyth yn 2026, gan ei fod yn addo darparu manteision gwirioneddol i bobl sydd eisiau cerdded, beicio ac olwyno rhwng yr orsaf drenau a chanol y ddinas.
“Rydyn ni yma i ateb eich cwestiynau a gwrando ar unrhyw bryderon sydd gennych, felly dewch i’n gweld ni yn un o’r sesiynau galw heibio cyhoeddus.”
Mae yna ddwy sesiwn, a bydd swyddogion y cyngor ar gael i drafod y manylion ac ateb cwestiynau.
Sesiynau galw heibio – ble a pha bryd?
- Dydd Mawrth 2 Rhagfyr – 9-11am yn Nhŷ Pawb LL13 8BB
- Dydd Gwener 12 Rhagfyr – 3.30-5.30pm yn Nhŷ Pawb LL13 8BB
