Dywedodd y Cynghorydd Phil Wynn, yr Aelod Arweiniol dros Addysg ac Ymyrraeth Gynnar, “Hoffwn longyfarch yr holl fyfyrwyr ledled Wrecsam sy’n derbyn eu canlyniadau Safon Uwch heddiw. Mae’r canlyniadau sy’n cael eu cyflawni yn adlewyrchu’r gwaith caled, yr ymrwymiad a’r gwytnwch a ddangoswyd gan ein pobl ifanc trwy gydol eu hastudiaethau.
“Dylai pawb a fu’n cymryd rhan fod yn hynod falch o’u cyflawniadau. I lawer o fyfyrwyr, mae heddiw yn nodi dechrau llwyddiannus y bennod nesaf yn eu bywydau, boed hynny’n symud ymlaen i brifysgol, addysg uwch, prentisiaethau, hyfforddiant galwedigaethol, neu gyflogaeth. Rwy’n dymuno pob llwyddiant i bawb wrth iddynt gymryd eu camau nesaf ar drywydd eu huchelgeisiau.
“Rwyf hefyd am gydnabod y gall diwrnod canlyniadau ddod ag emosiynau cymysg. I rai myfyrwyr, efallai nad yw’r graddau a dderbyniwyd yr hyn yr oeddent yn gobeithio amdano neu efallai yn eu gadael yn ansicr am eu cynlluniau arfaethedig. Os yw hyn yn wir, byddwn yn eu hannog yn gryf i siarad â’u hathrawon, cynghorwyr gyrfaoedd ac aelodau o’u teulu cyn gwneud unrhyw benderfyniadau.
“Mae llawer o gyngor a chefnogaeth ar gael, ac yn aml mae mwy o opsiynau a chyfleoedd nag sydd i’w gweld ar yr olwg gyntaf. Beth bynnag yw eich canlyniadau heddiw, nid ydynt yn diffinio eich gwerth na’ch potensial. Mae yna lawer o lwybrau i lwyddiant, a chyda’r arweiniad a’r penderfyniad cywir, mae yna bob amser gyfleoedd i gyflawni eich nodau.
“Ar ran Cyngor Bwrdeistref Sirol Wrecsam, hoffwn ddymuno’n dda i’n holl fyfyrwyr ar gyfer y dyfodol ac i ddiolch i’n hysgolion, ein colegau a’n teuluoedd am y rôl bwysig y maent yn parhau i’w chwarae wrth gefnogi ein pobl ifanc i gyflawni eu dyheadau.”
