Beth am ddechrau eich Gwyliau Haf yn darganfod y trysorau cudd yn eich parc gwledig lleol yn ystod Wythnos Natur Cymru.
Mae Wythnos Natur Cymru yn cynnwys teithiau cerdded natur, sgyrsiau a diwrnodau gweithgareddau ar hyd a lled Cymru, wedi’u trefnu gan amrywiaeth o sefydliadau ac unigolion sy’n dod at ei gilydd i arddangos rhyfeddodau byd natur Cymru.
Fe’i cynhelir rhwng 22 a 30 Gorffennaf, a thema Wythnos Natur Cymru eleni yw ‘Dathlu Trysorau Natur.’
Felly pa ffordd well o ddechrau’r haf na mynd allan i grwydro rhai o’n parciau gwledig a’n mannau agored, gan fwynhau ein tirweddau cyfoethog, ein cynefinoedd gwerthfawr, ein blodau prin a’n harwyr bach.
Mae’r digwyddiadau canlynol wedi’u trefnu gan ein tîm Mannau Agored a Cheidwaid Parciau Gwledig:
22 Gorffennaf 1-3pm Mae natur yn hwyl! ym Mharc Gwledig Dyfroedd Alun (ochr Gwersyllt): Dewch i’r awyr agored gyda Chyngor Wrecsam a dod o hyd i’r gwahanol ffyrdd y gallwch chi gael hwyl gyda natur, beth bynnag fo’r tywydd. Cyfarfod yn y Ganolfan Ymwelwyr.
26 Gorffennaf 10-12pm Tegeirianau Dirgel ym Mharc Gwledig Dyfroedd Alun (maes parcio ochr Llai)
Mae Dyfroedd Alun yn cynnig cynefin unigryw i amrywiaeth o rywogaethau o degeirianau, gan gynnwys rhai prin iawn fel y Dune Helleborine. Ymunwch â’r ceidwaid am daith dywys o amgylch y parc a chael mwy o wybodaeth am y blodau anhygoel hyn.
30 Gorffennaf 1-3pm Dirgelwch y Lleidr Mêl ym Mharc Acton, (wrth y parc chwarae oddi ar Rodfa Herbert Jennings, Wrecsam, LL12 7YG). Mae angen eich help ar y gwenyn! Allwch chi ddatrys pa bryfyn sydd wedi dwyn mêl o’u cwch gwenyn? Dilynwch y llwybr o amgylch y parc a dod yn dditectif pryfed wrth i chi geisio datrys y lladrad mêl mwyaf a welodd Parc Acton erioed!” Hyd y gweithgaredd: tua 30 – 40 munud.
Meddai’r Cynghorydd Hugh Jones “Mae gennym ni dreftadaeth naturiol wych o Ddyffryn Dyfrdwy gyfoethog i ardaloedd ucheldir Mynyddoedd y Berwyn a Rhiwabon, a phopeth yn y canol! Rydym yn awyddus i ddathlu’r awyr agored ac annog pobl i ddarganfod byd natur ar garreg eu drws, yn ogystal â diogelu cynefinoedd ar gyfer cenedlaethau’r dyfodol, yn enwedig mewn ardaloedd trefol.”
Meddai Sean McHugh o Bartneriaeth Bioamrywiaeth Cymru: “Bob blwyddyn rydym ni’n dewis thema. Eleni rydym ni’n annog pobl i ddarganfod y rhywogaethau a’r cynefinoedd gwych yng Nghymru o dan ein thema: Dathlu Trysorau Natur. Rydym yn gwerthfawrogi ac yn ymhyfrydu yn rhyfeddod y byd naturiol, o’r pethau bach i’r pethau mawr; o brydferthwch plu drudwy; syfrdanu ar fawredd tirwedd Cymru neu fwynhau byd natur yn y parc lleol.
Mawr a bach, dyma ein trysorau, ein treftadaeth naturiol, a etifeddwyd gan bob cenhedlaeth i’w darganfod, ac mae’n hollbwysig ein bod yn dathlu ac yn gwarchod natur rŵan, ac yn y dyfodol”.
Wythnos Natur Cymru 2023
Cydlynir Wythnos Natur Cymru gan Bartneriaeth Bioamrywiaeth Cymru. Mae Partneriaeth Bioamrywiaeth Cymru yn dwyn ynghyd chwaraewyr allweddol o’r sectorau cyhoeddus, preifat a gwirfoddol i hyrwyddo a monitro effaith bioamrywiaeth a’r ecosystem yng Nghymru. Ariennir PBC gan Lywodraeth Cymru a’i gynnal gan Cyfoeth Naturiol Cymru.
I gael mwy o fanylion am Wythnos Natur Cymru 2023 a’r calendr digwyddiadau, ewch i Bioamrywiaeth Cymru: https://www.biodiversitywales.org.uk/Wythnos-Natur-Cymru
I gael mwy o wybodaeth am y digwyddiadau hyn, cysylltwch â Jacinta.challinor@wrexham.gov.uk
Efallai yr hoffech hefyd ddarllen Sgyrsiau Carbon a Hinsawdd Wrecsam – dweud eich dweud!
Derbyniwch y newyddion a’r wybodaeth ddiweddaraf yn syth i’ch mewnflwch.
