Mae gwaith adnewyddu uchelgeisiol Cyngor Wrecsam ym Marchnad y Cigyddion a’r Farchnad Gyffredinol wedi cael ei gydnabod gyda chanmoliaeth yng Ngwobrau Cymdeithas Ddinesig Wrecsam, a gynhaliwyd ym mis Tachwedd.
Yn dilyn buddsoddiad o £4m, dychwelodd masnachwyr i’r marchnadoedd ar eu newydd wedd ar gyfer eu hailagoriad ym mis Tachwedd 2024. Mae’r prosiect wedi creu gofod disglair a chroesawgar sy’n cyfuno’r gorau o draddodiad marchnadol Wrecsam â chyfleusterau modern ar gyfer siopwyr a busnesau heddiw.
Mae’r marchnadoedd sydd wedi’u hadfywio bellach yn cynnig amgylchedd deniadol i fasnachwyr sefydledig gan hefyd ddenu busnesau newydd i ganol y ddinas. Mae gofal mawr wedi’i gymryd i gadw’r cymeriad a’r dreftadaeth sydd wedi gwneud Marchnad y Cigyddion a’r Farchnad Gyffredinol yn gonglfeini bywyd lleol, wrth sicrhau eu bod yn addas ar gyfer y dyfodol.
Wrth roi’r ganmoliaeth, tynnodd Cymdeithas Ddinesig Wrecsam sylw at yr adeiladwaith, y gwaith o osod peiriannau awyru a gwasanaethau modern, ac agor rhannau o Farchnad y Cigyddion a oedd wedi bod yn segur ers degawdau.
Dywedodd y Cynghorydd Nigel Williams, yr Aelod Arweiniol dros Economi, Busnes a Thwristiaeth: “Mae ein marchnadoedd yn rhan o hunaniaeth Wrecsam, ac roedd y prosiect hwn yn ymwneud â pharchu’r hanes hwnnw wrth wneud yn siŵr bod yr adeiladau’n addas i fasnachwyr a chwsmeriaid heddiw.
Mae gweld rhannau o Farchnad y Cigyddion yn cael eu defnyddio unwaith eto ar ôl cymaint o flynyddoedd wedi bod yn arbennig o foddhaus.
Mae’r gydnabyddiaeth hon yn adlewyrchu’r gofal, y cydweithrediad a’r ymrwymiad a aeth i mewn i’r prosiect, ac ni fyddai wedi bod yn bosibl heb gefnogaeth cyllid Llywodraethau’r DU a Chymru, chwaraewyr y Loteri Genedlaethol, ac ymroddiad ein swyddogion a’n partneriaid prosiect.”
Mae’r ganmoliaeth yn tynnu sylw at ymrwymiad Cyngor Wrecsam i fuddsoddi yn adeiladau hanesyddol y ddinas wrth gefnogi economi leol sy’n newid bob amser. Mae’r marchnadoedd ar eu newydd wedd yn darparu amgylchedd hyblyg gyda bywyd newydd a all barhau i esblygu, gan gefnogi busnesau lleol a sicrhau bod yr adeiladau poblogaidd hyn yn parhau i fod yn rhan annatod o ddyfodol cyffrous Wrecsam.
