Mae gwaith ar fin dechrau ar brosiect gardd gymunedol a fydd yn rhoi bywyd newydd i safle hen ysgol ger Wrecsam.
Mae cynlluniau ar gyfer gardd ar hen safle Ysgol y Wern yn Rhos wedi bod ar waith ers yn gynnar yn yr haf, ac fe fydd y gwaith yn dechrau’r wythnos nesaf (o ddydd Llun 25 Tachwedd).
Mae’r prosiect yn cael ei arwain gan Gyngor Wrecsam, Cyngor Cymuned Rhos a Groundwork North Wales, gyda chyfranogiad llawn gan breswylwyr lleol. Mae’r gwaith yn cael ei ariannu trwy Gronfa Ffyniant Gyffredin y DU.
Meddai’r Cynghorydd David A Bithell, Dirprwy Arweinydd Cyngor Wrecsam sydd yn gyfrifol am Ddatgarboneiddio: “Mae prosiectau fel hyn yn bwysig iawn i’n hymdrechion datgarboneiddio – annog cymunedau i dyfu cynnyrch lleol a chreu amgylcheddau sydd yn dda i bryfetach a bywyd gwyllt arall.
- Cofrestru -
“Fe fydd yna lawer o gyfleoedd i bobl fagu hyder a dysgu amrywiaeth o sgiliau am arddio organig a chyflenwol, tyfu perlysiau a blodau gwyllt, cefnogi natur, a thyfu llwyni, llwyni ffrwythau a gwrychoedd wrth symud ymlaen i gefnogi hyfforddiant galwedigaethol.
“Mae’n brosiect gwych ac rydym ni’n gobeithio y bydd pobl yn parhau i gymryd rhan a chefnogi’r gwaith.”
Mae’r ardd yn un o sawl prosiect tyfu cymunedol sydd ar waith yn y Fwrdeistref sirol, gyda phrosiectau eraill yn Trydedd Rhodfa yng Ngwersyllt, Parc Caia, Tŷ Pawb, Parc Ashfield, Cefn Mawr a Gardd Orffwys.
Dyma’r amserlen ar gyfer y gwaith ar hen safle Ysgol y Wern:
Yr wythnos yn dechrau 25 Tachwedd
- Cloddio a phlotio.
- Gwaith ar y ffordd fynediad ac ymylon yr ardal rhandir.
Yr wythnos yn dechrau 2 Rhagfyr
- Gosod gwelyau plannu uchel.
Yr wythnos yn dechrau 9 Rhagfyr
- Gosod sied a deunydd casglu dŵr.
- Plannu coed.
Meddai’r Cynghorydd lleol, Steve Joe Jones: “Mae’r gymuned wedi bod wrth galon y prosiect yma o’r dechrau un, ac mae hi’n wych gweld y darn o dir yma’n cael bywyd newydd.
“Fe fydd yr ardd yn lle hyfryd i dreulio amser, a bydd pawb yn gallu cymryd rhan a mwynhau bod yn rhan o’r ymdrech gydweithredol i dyfu planhigion, ffrwythau a llysiau, a chefnogi natur.”
Mae yna gyfarfodydd rheolaidd yn y Caffi Cymunedol yn Rhos (LL14 2HY) i unrhyw un a hoffai gymryd rhan. Mae’r rhain yn cael eu cynnal bob dydd Iau am 2pm.
I gael rhagor o wybodaeth neu i gymryd rhan gydag un o’r prosiectau tyfu cymunedol yn y Fwrdeistref Sirol, cysylltwch â Thîm Datgarboneiddio Cyngor Wrecsam.
