Yn galw ar bob plentyn – mae deg pili-pala wedi’u gwasgaru o amgylch canol dinas Wrecsam, ac mae angen eich help chi arnon ni i ddod o hyd iddyn nhw. Allwch chi ddefnyddio’ch map i ddatrys y cliwiau a dod o hyd i’r pili-palod cudd?
O 17 Gorffennaf, gall plant gymryd rhan mewn helfa pili-palod hwyliog o amgylch canol dinas Wrecsam. I gymryd rhan, yr unig beth sydd angen iddyn nhw ei wneud yw casglu map am ddim o Ganolfan Gwybodaeth i Ymwelwyr Wrecsam sydd â chliwiau y gallan nhw eu datrys i’w helpu i ddod o hyd i bob un o’r deg pili-pala.
Mae’r cynllun yn cael ei ariannu gan gynllun grant Lleoedd Lleol ar gyfer Natur Llywodraeth Cymru sy’n ymwneud â chynyddu bioamrywiaeth a chysylltu pobl â natur.
Cafodd y pili-palod eu creu gan blant mewn ysgolion cynradd ledled Wrecsam, ac o’r holl geisiadau, mae deg enillydd wedi’u dewis i’w defnyddio yn yr helfa pili-palod yng nghanol y ddinas yn ystod yr haf.
Ond gan fod cymaint o ddyluniadau gwych, mae’r holl bili-palod eraill yn cael eu harddangos yng nghanolfan Tŷ Pawb, lle rydyn ni hefyd wedi sefydlu gorsaf bili-palod i’r cyhoedd addurno eu pili-palod eu hunain, yn debyg i’r ceisiadau y gallwch chi eu gweld o amgylch yr ystafell.
Felly, os ydych chi’n teimlo’n greadigol, galwch heibio i ganolfan Tŷ Pawb i weld beth allwch chi ei ddylunio.
Dywedodd y Cynghorydd Nigel Williams, yr Aelod Arweniniol yr Economi, Busnes a Thwristtiaeth: “Mae’r llwybr glöynnod byw gwych yn ddathliad o greadigrwydd, ac ymrwymiad Wrecsam i gefnogi bioamrywiaeth drwy Gymru yn ei Blodau. Rydyn ni’n gobeithio y bydd pobl yn mwynhau cymryd rhan dros yr haf.”
Yr Arolwg Pili-palod Mawr
Datblygwyd y prosiect hwn i gefnogi’r Arolwg Pili-palod Mawr, sef arolwg DU gyfan lle gallwch chi helpu i asesu iechyd ein hamgylchedd yn syml trwy gyfrif pili-palod.
I gymryd rhan, yr unig beth sydd angen i chi ei wneud yw cyfrif pili-palod am 15 munud yn ystod tywydd llachar (heulog yn ddelfrydol). Gallwch gyflwyno cofnodion trwy gydol misoedd Gorffennaf ac Awst.
Ar yr adeg hon o’r flwyddyn, mae’r rhan fwyaf o bili-palod yn y cyfnod llawn dwf o’u cylch bywyd, felly maen nhw’n fwy tebygol o gael eu gweld.
Dywedodd y Cynghorydd David A Bithell, y Dirprwy Arweinydd a’r Aelod Arweiniol dros yr Amgylchedd: “Rydyn ni’n annog ein trigolion i gymryd rhan yn yr Arolwg Pili-palod Mawr, sy’n hynod o ddefnyddiol ar gyfer cadwraeth. Mae croeso i gofnodion o bob lleoliad, felly gallwch gyfrif mewn parciau, tiroedd ysgol, gerddi, caeau neu goedwigoedd.”
Gallwch ddysgu mwy ar wefan yr Arolwg Pili-palod Mawr.
Derbyniwch y newyddion a’r wybodaeth ddiweddaraf yn syth i’ch mewnflwch.
