Disgwylir i drigolion yn Wrecsam a Sir y Fflint elwa o raglen newydd o ddosbarthiadau a gweithdai am ddim – sy’n cwmpasu popeth o gyflogadwyedd a sgiliau digidol i goginio iach.
Mae Groundwork Gogledd Cymru wedi derbyn contract Dysgu Oedolion yn y Gymuned Gogledd-ddwyrain Cymru ar ran Cyngor Wrecsam a Chyngor Sir y Fflint.
Nod y contract yw cefnogi trigolion ar draws Wrecsam a Sir y Fflint sy’n 19 oed ac yn hŷn i ail-ymgysylltu â’u dysgu, gan helpu i ddatblygu eu sgiliau a’u dewisiadau cyflogaeth.
Cyrsiau ar gyfer pob angen
Bydd y trefniant dwy flynedd yn golygu y bydd Groundwork yn cyflwyno cyrsiau ar draws y ddwy sir, gan weithio mewn partneriaeth â thîm Dysgu Oedolion yn y Gymuned Gogledd-ddwyrain Cymru – menter ar y cyd sydd eisoes yn llwyddiannus ac wedi’i hen sefydlu rhwng y ddau gyngor.
Mae hwn yn gyfle gwych i ddysgwyr sy’n oedolion gael mynediad at gyrsiau am ddim ar amrywiaeth eang o bynciau.
Bydd “Dysgu fel Teulu” yn cael ei gyflwyno mewn ysgolion lleol, gan ganiatáu i rieni a gofalwyr roi cynnig ar bethau newydd gyda’u plant – gan gynnwys crefftau a choginio iach.
Rhan bwysig arall o’r rhaglen, yn enwedig gyda thrigolion hŷn yn y gymuned, fydd y cyrsiau TG a sgiliau digidol sydd ar gael. Dywedodd dysgwr a oedd yn bresennol yn y sesiwn ‘Cyflwyniad i Ffonau Clyfar’, “Rwyf wedi dysgu cymaint, mae wedi bod yn wych. Mae gen i fwy o hyder yn fy ngallu i ddefnyddio’r ffôn erbyn hyn”.
Bydd y rhain yn cael eu cyflwyno mewn lleoliadau cymunedol lleol cyfleus, ynghyd â chyrsiau ar sut i goginio gyda ffriwyr aer, sut i ddefnyddio ffonau clyfar, gweithgareddau awyr agored a sgiliau cyflogadwyedd.
Mae’r cyrsiau byr wedi’u cynllunio i weithredu fel sbardun, gan annog pobl i fynd ymlaen i archwilio cyfleoedd dysgu pellach. Dywedodd un o’r cyfranogwyr yn y sesiwn ‘Magu Hyder’, “Dysgais sgiliau newydd ar fynd i’r afael â rhwystrau posib ar gyfer nodau a hunanbarch”.
Adeiladu ar lwyddiant
Mae’r contract newydd yn adeiladu ar y gwaith partneriaeth rhagorol rhwng y tîm Dysgu Oedolion yn y Gymuned a sefydliadau lleol eraill, gan gynnwys Coleg Cambria, Prifysgol Wrecsam, y sector gwirfoddol lleol a grwpiau cymunedol.
Mae’r contract yn elfen hanfodol o’r agenda sgiliau ar gyfer y ddwy sir, a bydd yn helpu i sicrhau bod pobl yn rhai o gymunedau anoddaf eu cyrraedd yn Wrecsam a Sir y Fflint yn cael y cyfle i gael mynediad at ddysgu.
Dywedodd y Cynghorydd Phil Wynn, yr Aelod Arweiniol dros Addysg yn Wrecsam, “Mae sicrhau’r contract hwn yn beth cadarnhaol iawn i gynghorau Wrecsam a Sir y Fflint.
“Mae’n dyst i ba mor dda mae ein partneriaeth yn gweithio, a pha mor hanfodol yw’r cyrsiau sydd ar gynnig i’n cymunedau.
“Mae’n gyfle da i estyn allan at ragor o ddysgwyr sy’n oedolion sy’n awyddus i symud ymlaen a datblygu eu sgiliau, ac rwy’n croesawu’r newyddion hyn ac yn edrych ymlaen at weld llwyddiant parhaus dysgu oedolion yn y gymuned ar draws y ddwy sir.”
Dywedodd y Cynghorydd Mared Eastwood, Aelod Cabinet Cyngor Sir y Fflint dros Addysg, y Gymraeg, Diwylliant a Hamdden, “Mae Dysgu Oedolion yn y Gymuned yn chwarae rôl hanfodol wrth helpu pobl i fagu hyder, datblygu sgiliau newydd a datgloi cyfleoedd ar gyfer y dyfodol.
“Rydym yn falch iawn o barhau â’n partneriaeth gyda Chyngor Wrecsam a Groundwork Gogledd Cymru i ddarparu ystod eang o gyfleoedd dysgu hygyrch am ddim i drigolion ledled Sir y Fflint.
“P’un a yw rhywun am wella ei sgiliau digidol, cefnogi dysgu ei deulu, rhoi hwb i’w gyflogadwyedd neu roi cynnig ar rywbeth newydd, mae’r cyrsiau hyn yn cynnig llwybr croesawgar yn ôl i addysg. Trwy ddod â dysgu i gymunedau lleol, gallwn helpu i sicrhau bod mwy o drigolion yn cael y cyfle i ffynnu a chyrraedd eu llawn botensial.”
Dywedodd Louise Stokes, Pennaeth Hyfforddiant yn Groundwork Gogledd Cymru, “Rydym yn hynod ddiolchgar am y cyllid i barhau i ddarparu ein cyrsiau Dysgu Oedolion yn y Gymuned.
“Bydd y cyllid hwn yn parhau i gryfhau ein gallu i gefnogi oedolion ar draws ein cymunedau, gan eu helpu i ailgydio mewn dysgu gyda hyder a phwrpas. Mae’r effaith yn ymestyn y tu hwnt i’r ystafell ddosbarth; mae’n cryfhau teuluoedd, cymunedau, a lles unigol.”
Os ydych yn byw yn Sir y Fflint a Wrecsam ac yn 19 oed ac yn hŷn, gallwch ddod o hyd i ba gyrsiau sydd ar gael drwy Dysgu Oedolion yn y Gymuned naill ai drwy e-bostio acl@wrexham.gov.uk neu drwy ffonio 07584 335409.
