Yr wythnos hon ymwelodd Ysgrifennydd Cabinet Llywodraeth Cymru dros Dai a Llywodraeth Leol, Jayne Bryant AoS, â’r Hyb Creadigol yn yr Hen Lyfrgell yn Wrecsam a lansiwyd yn ddiweddar.
Diolch i gyllid grant gan fenter Trawsnewid Trefi Llywodraeth Cymru a Chronfa Ffyniant Gyffredin Llywodraeth y DU, mae Cyngor Wrecsam wedi gallu trawsnewid yr adeilad hanesyddol hwn yn ofod hyblyg, ynni-effeithlon i entrepreneuriaid a busnesau o bob rhan o’r sector diwydiannau creadigol.
Dywedodd Ysgrifennydd y Cabinet dros Dai a Llywodraeth Leol, Jayne Bryant: “Mae’n drawiadol iawn gweld faint o waith sydd wedi mynd i mewn i drawsnewidiad ysblennydd yr Hen Lyfrgell yn ofod modern, wedi’i gynllunio’n glyfar i gefnogi sector creadigol cynyddol Wrecsam.
“Rwy’n falch ein bod wedi gallu cefnogi ailddatblygiad yr adeilad rhestredig Gradd II hwn, ar ôl iddo fod yn wag am sawl blwyddyn, gyda buddsoddiad o £2.9m trwy Raglen Trawsnewid Trefi Llywodraeth Cymru.
“Roedd yn bleser mawr cwrdd â’r entrepreneur cyntaf i feddiannu’r Hwb, ac rwy’n edrych ymlaen at weld y lle yn helpu mwy o fusnesau a phobl greadigol o bob cwr o’r rhanbarth i gyflawni eu breuddwydion.”
Cwblhawyd y gwaith ar adnewyddu’r adeilad ym mis Tachwedd, ac mae’r tenant busnes cyntaf wedi dechrau cyfnod preswyl – gyda thrafodaethau yn digwydd gyda dau gwmni arall sy’n defnyddio’r gofod.
Nod y cyngor yw datblygu a chadw talent o’r sector diwydiant creadigol, a’i ddenu yn ôl i Wrecsam – gan helpu i sicrhau bod mwy o bobl ifanc, rhieni, athrawon a busnesau yn gweld cyfleoedd lleol yn y sector.
Dywedodd y Cynghorydd Nigel Williams, yr Aelod Arweiniol dros yr Economi, Busnes a Thwristiaeth: “Gyda chefnogaeth Llywodraeth Cymru a’r DU, rydym wedi gallu rhoi bywyd newydd i adeilad hanesyddol sydd heb ei ddefnyddio, ac rydym yn gobeithio y bydd yr hwb yn dod yn ganolbwynt i ddiwydiannau creadigol ledled y rhanbarth.
“Mae’n ofod gwych lle gall diwylliant a thechnoleg ddod at ei gilydd, a bydd yn darparu amgylchedd gwych i fusnesau ac entrepreneuriaid sy’n gweithio ym maes ffilm, cerddoriaeth, gemau, marchnata, dylunio, darlledu a llawer o feysydd eraill.”
