Mae Cyngor Bwrdeistref Sirol Wrecsam yn dod yn ddinas fywiog gyda phoblogaeth gynyddol. Mae Cyngor Wrecsam wedi nodi bod yno fwy o geir nag erioed ar y ffordd, gan arwain at strydoedd gorlawn a mannau parcio cyfyngedig.
Gall hyn achosi perygl i wasanaethau brys, llwybrau bysiau a cherbydau ailgylchu.
Hefyd, mae ein deiliaid contract yn aml yn cael trafferth parcio y tu allan i’w cartrefi, gan gynyddu’r tagfeydd hyn.
O fewn yr adran Dai y mae tîm Gwaith Amgylcheddol. Mae’r tîm hwn yn gweithio gydag aelodau etholedig a Swyddfeydd Ystadau, i asesu a gwella ardaloedd o gwmpas y fwrdeistref.
- Cofrestru -
Mae’r tîm hefyd yn gweithio’n agos gyda’r deiliaid contract a phreswylwyr cyfagos pan fydd gwaith yn cael ei wneud i sicrhau ein bod yn cyfathrebu’n llawn ac yn cytuno ar y gwaith mwyaf buddiol i’r ardal.
Unwaith y bydd ardal wedi’i asesu ac wedi cael sgôr, bydd y tîm yn cysylltu â phreswylwyr ac aelodau etholedig ar sut ellir gwella’r ardal.
Yn 2023, llwyddodd y tîm Amgylcheddol i wneud gwelliannau i 247 o ardaloedd ar draws y fwrdeistref, er enghraifft;
- 216 o fannau parcio ar y safle
- Ffensys rheiliau at y pen-glin ym Mharc Caia
- Mannau parcio cymunedol ym Mhlas Madog
- Ffensys llwybr yn Rhosllannerchrugog a Pharc Caia
Mae rhywfaint o luniau cyn ac ar ôl y gwelliannau wedi’u cynnwys isod.
Bu i’r gwaith a wnaed ar hyd Ffordd Whalley drawsnewid safle a oedd yn cynnwys tir anwastad gydag ychydig iawn o fannau parcio yn flaenorol.
Roedd deiliaid contract a phreswylwyr yn gorfod parcio ar ymylon ffyrdd o gwmpas y stryd, gan achosi problemau tagfeydd.
Mae’r mannau parcio newydd hyn yn caniatáu i breswylwyr barcio’n agosach at eu cartrefi, gan symud cerbydau oddi ar y stryd.
Ffordd arall y mae’r tîm yn ceisio lleihau’r problemau parcio ar gyfer deiliaid contract a phreswylwyr yw trwy osod dreifiau i gartrefi addas.
Mae dreifiau yn darparu diogelwch a mynediad hawdd at gartrefi deiliaid contract, wrth symud ceir oddi ar y ffordd.
Dywedodd y Cynghorydd Paul Blackwell, ward Gogledd Acrefair “Mae’r deiliaid contract ar Ffordd Whalley, fel llawer o rai eraill ym Mhlas Madoc sydd wedi cael cyfuniad o ddreifiau neu fannau parcio wedi’u gosod, wedi gwirioni â’r gwelliannau a wnaed.
“Mae cyllideb yr amgylchedd yn ffordd werthfawr i gynghorwyr ymateb i bryderon preswylwyr am dagfeydd ar ein hystadau tai.”
Unwaith eto, mae’r rhain yn aml yn cael eu nodi gan aelodau etholedig/swyddfeydd ystadau a’r Tîm Amgylcheddol. Wedyn, byddant yn cynnal astudiaethau dichonoldeb, yn cysylltu â phartïon perthnasol, yn creu lluniad technegol ac yna’n goruchwylio’r gwelliannau i’r eiddo.
Mae hyn wedi’i groesawu gan ddeiliaid contract a phreswylwyr ar draws y gwaith a gwblhawyd.
Mae Cynghorwyr a Deiliaid Contract yn aml yn cysylltu â ni i ganmol y gwaith ac rydym yn croesawu adborth.
Dywedodd y Cynghorydd John Phillips, Ward Penycae “Rwyf wedi derbyn adborth gan ddeiliad contract yn dilyn gosod y lloriau caled…
“…Pan oeddwn ar y safle roedd yn amlwg i mi fod y contractwyr yn hynod drefnus…..yn ogystal â hyn, cafodd yr ardal ei adael mewn cyflwr taclus ar ôl cwblhau’r gwaith.”
Deilydd Contract – “Bu i’r contractwyr gyfathrebu â ni ynglŷn â’r gwaith a oedd yn cael ei wneud, a bu iddynt ddiwygio’r cynlluniau i fodloni ein hanghenion. Roeddent yn gwrtais ac yn ystyriol iawn, gwnaed y gwaith yn broffesiynol.”
Mae mathau eraill o waith a wnaed gan y Tîm Amgylcheddol yn cynnwys pethau fel gosod Ffensys Rheiliau at y Pen-glin.
Yn ddiweddar, gosodwyd ffensys rheiliau at y pen-glin yng Nghilgant San Silyn ym Mharc Caia.
Cafodd yr ardal hon ei nodi gan Swyddfa Ystâd Parc Caia a’r Cynghorydd lleol gan fod yr ardal yn cael ei defnyddio gan feiciau modur a cheir, gan achosi llygredd sŵn a difetha’r ardaloedd o laswellt.
Bu i’r tîm Amgylcheddol gynnal arolwg, dylunio a goruchwylio holl gamau adeiladu’r prosiect.
Mae’r mathau eraill o waith a wnaed gan y tîm yn cynnwys ffensio.
Cwblhawyd y gwaith ffensio llwybr hwn yn Ffordd Dyfed, gan fod y ffensio blaenorol angen ei atgyweirio. Roedd hwn yn galluogi pobl i gerdded drwy gerddi, gan nad oedd y ffensio yn rhoi llawer o ddiogelwch.
Yn 2024/25, bydd y tîm Amgylcheddol yn parhau i weithio gydag aelodau etholedig a swyddfeydd ystadau er mwyn nodi a gwella ardaloedd ar hyd a lled Bwrdeistref Wrecsam.
Byddant hefyd yn cynnal arolygon dichonoldeb ar eiddo a nodwyd, gyda’r bwriad o wella tagfeydd ar strydoedd a rhoi cyfle i deuluoedd barcio eu ceir yn agos at eu cartrefi gyda’r diogelwch sy’n deillio o hynny.
Dywedodd y Cynghorydd David A Bithell, Aelod Arweiniol Tai, “Mae cynlluniau amgylcheddol yn rhoi gwelliannau angenrheidiol sy’n cael eu cefnogi gan aelodau etholedig. Mae’r cynlluniau hyn yn cael eu cyflwyno bob blwyddyn er mwyn cefnogi a mynd i’r afael â materion lleol.
“Un o’r rhai mwyaf poblogaidd yw parcio oddi ar y ffordd ac mae’r cynlluniau hyn yn helpu cymunedau lle mae gennym fynediad ar hyd ffordd gul.
“Rydym wedi derbyn adborth cadarnhaol iawn gan ein deiliaid contract ar draws Wrecsam lle mae gwelliannau wedi’u gwneud.”
