Mae gennym ni 3 chynllun cyffrous iawn i chi ddewis ohonynt p’run a hoffech chi ddysgu crefft o fewn ein Tîm Tai, cyfuno gwaith swyddfa a gwaith ar safleoedd gyda’n Tîm Amgylcheddol neu gael eich lleoli mewn swyddfa o fewn adran o’ch dewis gyda’n Tîm Corfforaethol, rydyn ni’n awyddus i glywed gennych CHI!
Buddion
Bydd pob Prentis/Hyfforddai yn manteisio ar amrywiaeth o fuddion gan gynnwys:
- Ennill cyflog
- Treulio amser gyda staff profiadol
- Gallu astudio tuag at gymhwyster sy’n gysylltiedig â swydd
- Cael gwyliau â thâl a chael yr un buddion â gweithwyr eraill
- Gweithio am o leiaf 30 awr yr wythnos
- Ennill sgiliau o amrywiaeth o leoliadau
Y Cynllun Prentisiaeth Corfforaethol
Bydd y prentis yn cael ei gefnogi gan Goleg Cambria a Thîm Datblygu’r Gweithlu i gwblhau cymhwyster NVQ dysgu-wrth-weithio o’u dewis nhw ynghyd â chyfle i symud ymlaen i’r lefel uwch.
Er mwyn sicrhau bod y prentis yn cael y datblygiad a’r profiad gorau, bydd yr unigolyn yn symud rhwng amrywiaeth o feysydd gwasanaeth dros gyfnod o 2 flynedd.
Bydd y gwasanaeth yn nodi rheolwr a mentor i gefnogi’r lleoliad am y cyfnod cyfan yn eu maes gwasanaeth. Bydd hyn yn darparu cefnogaeth o ran lles a chefnogaeth o ran y swydd ei hun i sicrhau bod y prentis yn gallu gwneud ei waith hyd eithaf ei allu a’i fod yn cael cymaint o brofiad â phosib’ o dan Gynllun Prentisiaeth Cyngor Bwrdeistref Sirol Wrecsam.
Cynllun Prentisiaeth Tai
Mae ein rhaglen bedair blynedd yn uno dysgu ac ennill cyflog. Byddwch nid yn unig yn astudio ar gyfer cymhwyster cenedlaethol, ond hefyd yn ennill cyflog cystadleuol, yn datblygu sgiliau newydd ac yn cael gwybodaeth a phrofiad hynod werthfawr. Gyda chyfleoedd hyfforddi rhagorol, llwybrau gyrfa amrywiol a chyflogaeth ddiogel, bydd y rhaglen hon yn dechrau eich gyrfa ac yn eich galluogi chi i osod y sylfeini ar gyfer eich dyfodol.
Rydym ni’n cynnal cynllun prentisiaeth ar gyfer y crefftau adeiladu yn cynnwys plastro, saernïaeth, paentio, gosod brics, plymio a gwaith trydanol.
Y Cynllun Hyfforddiant Amgylcheddol
Mae cynllun hyfforddiant yn swydd go iawn ac o dan yr holl amgylchiadau, bydd unigolyn dan hyfforddiant yn cael eu cyflogi o’r diwrnod cyntaf.
Byddwn yn cynnig cyfleoedd profiad gwaith gwerthfawr ac yn cefnogi’r gweithwyr dan hyfforddiant i ddatblygu eu sgiliau a’u gwybodaeth, a’r bwriad yw eu bod nhw’n cael gwaith parhaol yng Nghyngor Wrecsam yn y pen draw.
Mae’r cynllun dan hyfforddiant yn gynllun 2 flynedd sy’n cyfuno gwaith mewn swyddfa a gwaith ar y safle, gan roi sgiliau a phrofiad wrth fagu hyder.
I gael gwybod mwy, ewch i wefan Cyngor Wrecsam neu ffonio 01978 292070.
Mae’r ffenestr ymgeisio’n cau am hanner nos ar 30 Ebrill 2023.
