Dysgwr y Flwyddyn eleni yw Lucy Cowley sy’n byw yn Llangollen. Fe’i anrhydeddwyd mewn seremoni arbennig ar lwyfan y Pafiliwn ddydd Mercher, yn dilyn cystadleuaeth o safon uchel.
Y tri arall a ddaeth i’r brig oedd Rachel Bedwin sy’n byw yn ardal Bangor, Hammad Hassan Rind sy’n byw yng Nghaerdydd, a Leanne Parry sy’n byw ym Mhrestatyn.
Daw Lucy Cowley o Is-y-Coed, Wrecsam, sef cartref yr Eisteddfod eleni. Roedd ei thaid yn ffoadur o Wlad Pwyl a’i nain yn ffoadur o’r Wcrain. Er ei bod hi wedi cael rhywfaint o Gymraeg yn yr ysgol, ‘doedd hi ddim yn hyderus, ond wrth weithio fel athrawes yn Ysgol Holt, sylweddolodd ei bod wrth ei bodd yn rhannu’r Gymraeg gyda’r plant.
Aeth ati i ati ddilyn cyrsiau, a dechrau defnyddio adnoddau Cymraeg yn y dosbarth. Mae hi’n byw yn Llangollen ac wedi sefydlu grŵp trafod Cymraeg yn y dref, sy’n denu criw o bobl o gefndiroedd amrywiol, rhai yn ddysgwyr newydd ac eraill yno i ail afael yn eu Cymraeg. Mae’n cynllunio gemwaith a daeth â stondin i Eisteddfod Llŷn ac Eifionydd.
Cyhoeddwyd hyn ar lwyfan y Pafiliwn, ddydd Mercher 6 Awst, a derbyniodd Lucy Dlws Dysgwr y Flwyddyn, yn rhoddedig gan Spencer a Jeni Harris, a £300, yn rhoddedig gan Ann Aubrey. Derbyniodd y tri arall yn y rownd derfynol yn derbyn £100 yr un.
Dywedodd Lucy ar ol y seremoni ei bod dal mewn sioc.
“Dwi’n falch iawn. Wnes i erioed feddwl faswn yn ennill ac i wneud hynny yn Is-y-Coed mae’n wych. Rwyn emosiynol iawn does dim gair i ddisgrifio sut dwi’n teimlo.
“Mae ennill hwn yn golygu’r byd i mi. Rwyn byw yn lleol ac yn gweithio’n lleol ond doeddwn ddim yn teimlo fy mod yn ffitio fewn. Dwin siared hefo acen Saesneg a doeddwn ddim yn siared Cymraeg. Doedd pobl ddim yn deall pam roeddwn yn dysgu Cymraeg ond dwi mor falch fy mod wedi gwneud,” meddai.
Ychwanegodd y bydd yn cario ymlaen gyda gwersi Cymraeg a cynnal gwersi gemwaith yn yr iaith.
“Ac fe fydd gennym rhywbeth i’w drafod yn y grwp trafod nesaf,” meddai.
Beirniaid y gystadleuaeth oedd Steve Morris, Francesca Sciarrillo ac Ian Gwyn Hughes.
