Erthyl gwadd: Bwrdd Iechyd Prifysgol Betsi Cadwaladr
Mae sesiwn gwirio beiciau am ddim yn cael ei chynnal yn Wrecsam i helpu mwy o bobl i fynd ar gefn eu beic a defnyddio pŵer pedalau.
Gall unrhyw un ddod â’u beic i’r maes parcio yng nghefn Plas Gororau, Parc Technoleg Wrecsam ar gyfer y sesiwn Meddyg Beiciau am ddim rhwng 7.45am a 5.30pm ddydd Mawrth 10 Mehefin.
Bydd tîm The Mobile Bike Mechanics yn cynnal gwiriadau diogelwch a mân waith atgyweirio, ac yn rhoi cyngor am unrhyw waith mawr pellach a allai fod angen ei wneud i helpu mwy o bobl i fynd ar gefn eu beic.
Cynhelir y sesiwn yn ystod Wythnos y Beic, sy’n cael ei chynnal o 9 Mehefin i 15 Mehefin. Fe’i hariennir gan Gronfa Teithio Llesol Llywodraeth Cymru drwy Gyngor Bwrdeistref Sirol Wrecsam, ac mae’n cael ei chynnal gan Fwrdd Iechyd Prifysgol Betsi Cadwaladr.
Dywedodd yr uwch ymarferydd gwella iechyd Robin Ranson y byddai’r sesiwn yn rhoi cyfle i drigolion, gan gynnwys staff o Ysbyty Maelor Wrecsam a safleoedd byrddau iechyd eraill, ddod â’u beiciau i’w gwirio.
“Rydym yn gobeithio y bydd y cyfle hwn yn helpu mwy o bobl yn Wrecsam i fynd ar gefn eu beiciau – boed hynny i deithio i’r gwaith neu yn eu hamser hamdden – ac i elwa o fanteision iechyd a lles bod yn actif a symud mwy,” meddai.
Ym mis Rhagfyr, galwodd adroddiad gan y bwrdd iechyd am wneud mwy i helpu mwy o bobl i fod yn fwy actif yn fwy aml – tra bod Cyngor Wrecsam wedi addo hyrwyddo beicio ac opsiynau teithio llesol eraill fel llofnodydd Siarter Teithio Llesol Gogledd Cymru.
Bydd aelodau o dimau Deieteg Iechyd Cyhoeddus a Gwella Iechyd y bwrdd iechyd hefyd wrth law yn y digwyddiad i gynnig cyngor ar ffordd o fyw a lles.
Wythnos y Beic yw’r dathliad beicio mwyaf yn y DU. Mae’n tynnu sylw at y nifer o ffyrdd y gall beicio fod o fudd i ni i gyd – o hybu iechyd a lles i leihau allyriadau carbon a chreu cymunedau mwy cysylltiedig.
Wythnos Gofalwyr: Diwrnod Heneiddio heb Gyfyngiadau – Newyddion Cyngor Wrecsam
