Erthygl Gwadd – NEWCIS
Llinell Achub i Ofalwyr Di-dâl
Fel un o’r darparwyr gwasanaethau gofalwyr mwyaf yng Nghymru, mae Gwasanaeth Gwybodaeth Gofalwyr Gogledd-ddwyrain Cymru (NEWCIS) yn darparu gwybodaeth wedi’i theilwra, cymorth ymarferol, hyfforddiant, cwnsela, cyfleoedd seibiant ac eiriolaeth i helpu gofalwyr yn Wrecsam i lywio heriau eu rôl ofalu.
Mae llawer o ofalwyr di-dâl yn wynebu ynysigrwydd, pwysau ariannol, straen emosiynol ac anhawster wrth gael mynediad at y cymorth cywir. Mae NEWCIS yn gweithio ochr yn ochr â gofalwyr i sicrhau bod ganddynt y wybodaeth, yr hyder a’r cymorth ymarferol sydd eu hangen i gynnal eu lles eu hunain wrth ofalu am eraill.
Gwneud Gwahaniaeth trwy Gymorth Personol
Mae effaith NEWCIS yn cael ei dangos orau trwy brofiadau’r gofalwyr y mae’n eu cefnogi.
Canmolodd un gofalwr y canllawiau y cafodd trwy gydol proses gymorth gymhleth:
“Diolch yn fawr iawn am y diweddariad, ac am yr holl amser, help a chymorth rydych chi wedi’u rhoi i mi. Dw i’n gwerthfawrogi’n fawr y ffordd rydych chi wedi fy arwain drwy’r broses, a dw i’n ddiolchgar am eich ymagwedd ofalgar a sylwgar.”
Tynnodd gofalwr arall sylw at sut y gwnaeth cymorth un-i-un eu helpu nhw i sicrhau cymorth ychwanegol i’w teulu:
“Diolch am eich cymorth a’ch cyngor. Roedd siarad â chi cyn fy nghyfarfodydd yn fy ngalluogi i gynllunio fy sgyrsiau a chael y canlyniad gorau. Mae gen i nawr y cymorth ychwanegol sydd ei angen arna i ac roedd siarad â chi cyn y cyfarfod wedi helpu llawer!”
Mae NEWCIS hefyd yn darparu cyfleoedd i ofalwyr gael seibiant, cysylltu ag eraill a chanolbwyntio ar eu lles eu hunain:
“Elusen wych, un o’r cyntaf i gysylltu â ni pan oedden ni ar goll ac angen cymorth. Mae yna bob amser rhywbeth y galla i ymuno ag o er mwyn fy ngalluogi i gymryd peth amser i fi fy hun ac ailwefru ac mae gwybod bod y cymorth ar ben arall y ffôn yn rhoi llawer o sicrwydd.”
Gall cymorth ymarferol fod yr un mor drawsnewidiol. Disgrifiodd un gofalwr effaith derbyn cymorth bwyd yn ystod cyfnod anodd:
“Diolch yn fawr am anfon y wybodaeth. Mae’n mynd i fod yn amhrisiadwy i fi ac mae wedi rhoi gobaith i fi pan o’n i’n dechrau teimlo fel petawn i wedi fy ngorlethu. Dw i wedi mwynhau’r bocsys bwyd yn fawr ac mae’r cynnyrch wedi bod yn ardderchog.”
Edrych Tua’r Dyfodol
Mae NEWCIS yn parhau i godi ymwybyddiaeth o ofalwyr di-dâl ac ehangu gwasanaethau sy’n helpu gofalwyr i barhau i fod yn wydn, wedi’u cysylltu ac wedi’u cefnogi. Drwy ddarparu cyngor personol, cymorth emosiynol, cymorth ymarferol a chyfleoedd am seibiant, mae NEWCIS yn sicrhau bod gofalwyr yn cael eu cydnabod, eu gwerthfawrogi a’u grymuso yn eu rôl hanfodol o fewn cymunedau ledled Gogledd-ddwyrain Cymru.
Dywedodd y Cynghorydd Beverley Parry-Jones, yr Aelod Arweiniol dros Ofal Cymdeithasol i Oedolion: “Mae gofalwyr di-dâl yn chwarae rôl hanfodol yn ein cymunedau, yn aml yn rhoi anghenion eraill o flaen rhai eu hunain. Mae’n arbennig o bwysig bod gofalwyr yn gwybod nad ydyn nhw ar eu pennau eu hunain a bod cymorth ar gael pan fydd ei angen arnyn nhw.”
“Mae NEWCIS yn darparu cyngor gwerthfawr, cymorth ymarferol, cymorth emosiynol a chyfleoedd i ofalwyr neilltuo amser iddyn nhw eu hunain. Mae’r gwaith hwn yn gwneud gwahaniaeth gwirioneddol i fywydau pobl, gan helpu gofalwyr i deimlo eu bod nhw’n cael eu cydnabod, eu clywed a’u cefnogi.”
“Rydyn ni wedi ymrwymo i gefnogi gofalwyr di-dâl ledled Wrecsam a byddwn i’n annog unrhyw un sy’n gofalu am anwylyd, ffrind neu aelod o’r teulu i gysylltu a chael gwybod pa gymorth sydd ar gael.”
