Mae Cyngor Wrecsam wedi curo cystadleuaeth frwd o bob rhan o’r DU i ennill gwobr genedlaethol am ei wasanaethau digidol.
Cafodd y Porth Lles a lansiwyd yn ddiweddar, sy’n galluogi pobl i adrodd am faterion iechyd a gofal cymdeithasol yn hawdd, ei enwi’n enillydd y categori Cyflawniad Digidol yng Ngwobrau Sector Cyhoeddus Granicus UK.
Gweithiodd tîm Gwasanaethau Digidol y cyngor yn agos ag adrannau Gofal Cymdeithasol Plant, Tai a Chyllid – yn ogystal â grwpiau gwirfoddol a chymunedol – i lansio’r porth yr hydref diwethaf.
Dywedodd y Cynghorydd Beverley Parry-Jones, Aelod Arweiniol y Gwasanaethau Corfforaethol: “Nid oedd llawer o bobl a oedd yn cael trafferth gyda phroblemau iechyd, ariannol neu dai, neu’n cael trafferth rheoli bywyd teuluol, yn gwybod ble i gael cymorth.
- Cofrestru -
“Doedden nhw ddim yn gwybod ble i droi ac yn aml roedd yn rhaid iddyn nhw fynd at lawer o sefydliadau, adrodd eu stori sawl gwaith, a mynd ar ôl yr help yr oedd dirfawr ei angen arnynt yn barhaus.
“Felly fe wnaethom ddatblygu’r Porth Lles ar-lein – man lle gall plant, pobl ifanc a theuluoedd gael gwybodaeth neu adrodd am broblemau, heb orfod llenwi llawer o ffurflenni gyda llawer o wahanol asiantaethau.
“Mae’r porth yn enghraifft wych o sut rydym yn datblygu gwasanaethau ar-lein i wneud bywyd yn haws i bobl yn Wrecsam, a gweithiodd tîm y Gwasanaethau Digidol yn hynod galed ar y prosiect hwn. Mae derbyn y wobr hon yn gydnabyddiaeth wych!”
Sut mae’r porth yn gweithio
Lansiwyd y porth ar ôl ymgynghori’n helaeth â gweithwyr proffesiynol a theuluoedd, ac mae’n borth i gymorth ar amrywiaeth o bynciau, gan gynnwys:
- Bywyd teuluol
- Pobl ifanc
- Plant ag anableddau
- Budd-daliadau a dyled
- Tai a thenantiaethau
- Datblygiad plant
- Lles meddyliol
- Diogelu plant
Esboniodd Rob Griffiths, Arweinydd Tîm y Gwasanaethau Digidol: “Pan fydd pobl yn mynd i’r porth, dim ond unwaith y mae’n rhaid iddyn nhw lenwi eu gwybodaeth ar un ffurflen.
“Yna mae eu cais am gymorth yn cael ei frysbennu a’i drosglwyddo i’r asiantaeth berthnasol – boed hynny’n ofal cymdeithasol, gwasanaethau iechyd, tai, grwpiau cymorth cymunedol neu rywun arall.
“Mae darparu un pwynt cyswllt yn helpu cwsmeriaid i ganfod eu ffordd trwy’r byd atgyfeiriadau iechyd a gofal cymdeithasol sydd weithiau’n ddryslyd, a hyd yn hyn mae dros 60 o deuluoedd wedi defnyddio’r porth i ofyn am gymorth a dechrau eu taith i ddod yn ôl ar eu traed gyda’r cymorth sydd ei angen arnynt.”
Ewch i’r Porth Lles i gael gwybod mwy neu i ofyn am gymorth.
