Mae Safonau Masnach Wrecsam yn dymuno rhybuddio pobl yn dilyn cyfres o ddigwyddiadau ar draws Wrecsam yn cynnwys cnocwyr Nottingham, a elwir hefyd yn ‘werthwyr cadachau’.
Bechgyn ifanc ydyn nhw fel arfer, yn dod at eich drws gyda bag mawr du yn llawn cynnyrch glanhau sy’n amrywio o dyweli te, cadachau llestri, cadachau, chwistrellwyr, polish, eitemau bychan o ddillad a hyd yn oed cyllyll.
Fodd bynnag, nid yn unig y maen nhw’n ceisio gwerthu eitemau o ansawdd gwael i chi am brisiau chwyddedig iawn, ond maen nhw hefyd yn chwilio am dargedau hawdd ac yn gwerthu manylion i fyrgleriaid proffesiynol. Mae nifer o bobl sydd wedi prynu eitemau gan gnocwyr Nottingham wedi dioddef byrgleriaeth yn eu cartrefi yn fuan wedyn.
Yn wreiddiol o ardal Nottingham, byddai’r grŵp hwn yn dod i ‘gnocio’ ar ddrysau pobl i werthu, a dyna lle ddaw’r term cnocwyr Nottingham.
Bydd Cnocwyr Nottingham yn cyfaddef eu bod yn gyn-droseddwyr
Bu adroddiadau diweddar ohonynt ar draws ardal Wrecsam a Sir y Fflint ac mewn rhai sefyllfaoedd maent wedi bod yn ymosodol, sydd wedi dychryn ac achosi gofid i berchnogion tai. Mae Safonau Masnach yn eich cynghori i edrych drwy’r ffenestr gyntaf a pheidio agor y drws i unrhyw un nad ydych yn siŵr ohonynt.
Mae Safonau Masnach Wrecsam wedi lansio Operation REPEAT, menter atal trosedd ar y cyd â Heddlu Gogledd Cymru. Nod Operation REPEAT yw diogelu perchnogion tai diamddiffyn rhag unrhyw fath o dwyll a chamdriniaeth ariannol, fel y gallant barhau i fyw yn annibynnol yn eu cartrefi.
Mae’r tîm y tu ôl i Operation REPEAT wedi bod yn ganolog i ddelio gyda chnocwyr Nottingham ers blynyddoedd. Maent yn dweud bod y dynion hyn yn teithio i ardal mewn faniau neu fysus mini ac yn gweithio mewn timau ar draws cymdogaeth fel arfer.
Byddan nhw’n cyfaddef eu bod nhw’n gyn-droseddwyr sy’n ceisio dechrau o’r newydd ac efallai’n dangos cerdyn o’u cynllun prawf, yn ôl y sôn. Nid oes gan y cardiau adnabod hyn unrhyw draul gyfreithiol. Mae’r dynion ifanc yn delio gydag arian parod ar garreg drws. Os byddwch chi’n prynu ganddyn nhw unwaith byddant yn dychwelyd eto i geisio gwerthu mwy i chi.
Mewn ardaloedd eraill, maent hyd yn oed wedi bod yn dreisiol ac wedi gorfodi eu ffordd i mewn i gartrefi pobl i gael mwy o arian parod. Ni adroddwyd ar hyn yn ardal Wrecsam a Sir y Fflint hyd yma, ond mae’r dynion wedi bod yn ymosodol. Eto, cofiwch fod y gwerthwyr hyn yn droseddwyr proffesiynol a’r ffordd orau i gadw’n ddiogel yw peidio ymwneud â nhw.
Os bydd cnocwyr Nottingham yn ymweld â chi, rhowch wybod i Heddlu Gogledd Cymru gynted ag y gallwch drwy ffonio 101 i roi’r cyfle gorau i’r heddlu ddod i’ch ardal a dal yr unigolion. Ceisiwch gofnodi unrhyw fanylion, gan gynnwys rhif cofrestru cerbyd.
Fodd bynnag, os byddant yn eich bygwth neu’n eich trin yn ymosodol ar garreg y drws, deialwch 999 ar gyfer ymateb i argyfwng.
Os byddwch yn bryderus bod cnocwyr Nottingham wedi cysylltu â chi gallwch hefyd roi gwybod am unrhyw ddigwyddiadau i’r Gwasanaeth Defnyddwyr Cyngor Ar Bopeth ar 0808 223 1133.
Efallai yr hoffech hefyd ddarllen Rhybuddio rhieni am negeseuon testun twyllodrus dros yr haf
Derbyniwch y newyddion diweddaraf ar sgamiau, galw nôl cynnyrch a materion diogelu’r cyhoedd eraill
