Er ei fod yn brysur iawn yr adeg hon o’r flwyddyn, cliriodd Siôn Corn le yn ei amserlen i ymweld â dwy ysgol gynradd leol. Yn ystod ei ymweliad, rhoddodd wledd Nadoligaidd i’r disgyblion ynghyd ag anrhegion Nadolig cynnar.
Nid oedd wedi gallu cyflawni hyn ar ei ben ei hun, fodd bynnag. Gyda chymorth un o’i gorachod a’r tîm yn Castell Howell Foods, cafodd y dysgwyr ifanc syrpreis Nadoligaidd.
Cynnyrch lleol ffres
Nod tîm Prydau Ysgol Wrecsam yw defnyddio cynnyrch a chyflenwyr Cymreig lle bynnag y bo modd, yn unol â blaenoriaethau Llywodraeth Cymru a Chyngor Wrecsam.
Mae Castell Howell Foods yn gyflenwr Cymreig a brynodd a dosbarthodd yr holl dwrcïod, llysiau a bwyd traddodiadol ar gyfer y cinio Nadolig a weinwyd i ddisgyblion ledled y sir eleni.
Cafodd y wledd Nadoligaidd ei pharatoi a’i gweini gan ein cogyddion a chynorthwywyr ysgol hynod dalentog ac ymroddedig ar draws yr awdurdod.
Lledaenu hwyl yr ŵyl
Mae gan y tîm yn Castell Howell Foods linell uniongyrchol i Begwn y Gogledd. Eleni, fe wnaethon nhw ffonio Siôn Corn yn gofyn a fyddai’n hoffi ymuno â nhw i ledaenu hwyl yr ŵyl yn Wrecsam.
- Cofrestru -
Gan neidio i’w lori Nadoligaidd llawn bwyd, aeth y tîm ati i gynllunio eu taith i ddwy ysgol gynradd leol i gynnal ymweliad annisgwyl.
Roedd disgyblion Ysgol Bro Alun ac Ysgol Penygelli wedi’u synnu o weld Siôn Corn ei hun yn cyrraedd eu hysgol. Cyfarchodd y dyn ei hun a’i gorachod bach y plant yn y ddwy ysgol gan roi anrheg iddynt i gyd. Cafodd pawb amser gwych.
Dywedodd Angharad Tuovinen, rheolwr contractau Castell Howell Foods “Roedd yn hyfryd iawn cwrdd â’r disgyblion yn Ysgol Bro Alun ac Ysgol Penygelli. Maen nhw’n sicr yn gwybod sut i ledaenu hwyl yr ŵyl yn eu cymuned. Roedd yn bleser darparu eu cinio Nadolig iddynt eleni a gobeithio eu bod nhw i gyd wedi ei fwynhau. Diolch yn fawr iawn i’n ffrind Siôn Corn am ein helpu i ddosbarthu’r bwyd ac am wneud amser i gwrdd â’r holl blant”.
Wrth siarad ar y newyddion am yr ymweliad Nadoligaidd diweddar, dywedodd y Cynghorydd Phil Wynn, yr Aelod Arweiniol dros Addysg “Roedd yn hyfryd clywed am ymweliad diweddar Siôn Corn â dwy o’n hysgolion cynradd gwych. Rydyn ni i gyd yn gwybod pa mor brysur yw ef yr adeg hon o’r flwyddyn felly mae’n dangos pa mor dda yw ein disgyblion iddo fod wedi llwyddo i wneud amser i ddod i ymweld â nhw. Diolch yn fawr iawn i’w ffrindiau yn Castell Howell Foods am helpu i drefnu ei ymweliad ac am ddarparu’r cinio Nadolig rhagorol o ansawdd uchel i’n dysgwyr ifanc ar draws yr awdurdod”.
