Mae Twrnamaint Agored Wrecsam Lexus 2025 wedi sefydlu’i hun yn gadarn fel digwyddiad pwysig ym myd tenis Prydain, gan ddenu sylw ac effaith economaidd digynsail tra’n arddangos talent o’r radd flaenaf yng Ngogledd Cymru.
Fel y digwyddiad tenis proffesiynol mwyaf a gynhaliwyd erioed yng Ngogledd Cymru a’r twrnamaint tenis merched dan do mwyaf yn y DU, mae Twrnamaint Agored Wrecsam Lexus wedi gosod y rhanbarth ar y map chwaraeon byd-eang. Mae Wrecsam bellach yn un o ddim ond 31 o ddinasoedd ledled y byd i gynnal digwyddiad ITF o’r raddfa hon, gan atgyfnerthu ei statws fel prif gyrchfan ar gyfer chwaraeon elitaidd.
Denodd y twrnamaint y nifer uchaf o wylwyr o unrhyw ddigwyddiad W100 dan do yn 2025 ac roedd yn bumed yn fyd-eang ymhlith twrnameintiau W100. Roedd y darllediadau yn helaeth, gyda BBC iPlayer yn cynhyrchu dros 47,000 o geisiadau ac 16,000 awr o wylio, gan gynnwys 11,864 o bobl yn ffrydio’r rownd derfynol. Darlledodd BBC Wales Today saith bwletin, tra roedd S4C a BBC Radio Wales yn rhoi adroddiadau byw drwy gydol yr wythnos. Roedd bwrlwm y cyfryngau cymdeithasol yr un mor drawiadol, gyda phwynt gêm Mimi Xu ar rîl Instagram y BBC yn denu 154,000 wylwyr, gan drechu llawer o’u cynnwys pêl-droed a 1.04 miliwn o argraffiadau ar draws sianeli pwrpasol y digwyddiad.
Oddi ar y cwrt, rhoddodd Twrnamaint Agored Wrecsam Lexus hwb o £500,000 i’r gymuned fusnes leol, yn ôl ymchwil Sport England. Gyda 38 o bartneriaid nawdd, gan gynnwys 31 o fusnesau rhanbarthol, a 14 o’r rheiny wedi’u lleoli yn Wrecsam, fe wnaeth y digwyddiad feithrin ymgysylltiad lleol cryf. Fe wnaeth mentrau fel podlediad “Wrexham Ready” a rhifynnau Cymraeg yn yr Eisteddfod gadarnhau ei gwreiddiau cymunedol ymhellach.
Hawliwyd hanner yr arian gwobr a’r pwyntiau safle gan chwaraewyr o Brydain, gan sicrhau enillion ar fuddsoddiad mwyaf llwyddiannus i’r LTA yn 2025. Cynyddodd boddhad chwaraewyr, gyda sgôr o 95/100, gan ennill seren i’r twrnamaint yn Rhaglen Cydnabod Twrnameintiau yr ITF.
Gyda’i gyfuniad o gystadleuaeth elitaidd, integreiddio’r gymuned a budd economaidd, mae Twrnamaint Agored Wrecsam Lexus yn barod i ddod yn gêm flynyddol fawreddog sydd nid yn unig yn hyrwyddo tenis, ond yn dathlu ysbryd a gwydnwch Gogledd Cymru.
Dywedodd y Cynghorydd Nigel Williams, Aelod Arweiniol dros yr Economi yng Nghyngor Wrecsam: “Mae’r ffigurau yn yr adroddiad yn hynod galonogol gyda llawer o waith partneriaeth gydweithredol y tu ôl i’r llenni a sicrhaodd dwrnamaint llwyddiannus a phoblogaidd a oedd yn fuddiol i’r gamp, yn ogystal â Wrecsam. “Edrychwn ymlaen at adeiladu ar y llwyddiannau hyn wrth i ni weithio tuag at gynnal y twrnamaint eto yn 2026.”
