Cynhelir #WythnosGweithreduArWastraffBwyd gan Hoffi Bwyd Casáu Gwastraff rhwng 6-12 Mawrth, a’r thema eleni yw ‘Llwyddo, Nid Lluchio.’
Mae’n wythnos o weithredu mewn ymgais i ddod â’r genedl ynghyd i arbed amser ac arian trwy wneud i’r bwyd sydd gennym eisoes fynd ymhellach. Byddwn yn helpu i daflu goleuni ar sut gall storio bwyd yn gywir sicrhau ail (neu drydydd!) pryd o fwyd am ddim.
Meddai’r Cyng. Hugh Jones, Aelod Arweiniol yr Amgylchedd: “Rydym yn cefnogi’r ymgyrch Wythnos Gweithredu ar Wastraff Bwyd gan Hoffi Bwyd Casáu Gwastraff. Os nad yw’r bwyd a brynwn yn cael ei ddefnyddio, caiff yr holl egni a dŵr a ddefnyddiwyd i’w dyfu, ei gynaeafu, ei gludo a’i becynnu ei wastraffu. Byddwn yn rhannu gwybodaeth ynglŷn â sut gallwch leihau eich gwastraff bwyd trwy gydol yr wythnos, a all eich helpu i arbed arian a gwarchod yr amgylchedd.
Casgliad bin a fethwyd? Gadewch i ni wybod.
- Cofrestru -
Trwy gydol yr wythnos, byddwn yn rhannu cynnwys hwyliog ac addysgiadol ar ein sianelau cymdeithasol, felly cadwch lygad amdanynt.
Cwblhau’r cwis!
Cymerwch ran yn y cwis ‘Llwyddo, Nid Lluchio’ gan Hoffi Bwyd Casáu Gwastraff, am gyfle i ennill microdon Panasonic neu un o hanner cant o Fasgedi Bwyd Hellmann’s.
Trwy ateb pedwar cwestiwn amlddewis, byddwch yn cael cyngor ysgogol a all eich helpu i wneud i’ch bwyd fynd ymhellach.
Yn ogystal, os byddwch yn cofrestru am eu newyddlen, gallwch gael awgrymiadau sydd wedi’u dylunio i arbed arian ac amser i chi a byddwch yn cael eich cynnwys yn y raffl.
Cwblhewch y cwis nawr: LoveFoodHateWaste.com/fwaw
10 awgrym defnyddiol!
Ar gyfer Wythnos Gweithredu ar Wastraffu Bwyd mae Love Food Hate Waste wedi llunio rhestr o 10 peth y gallwch chi ei wneud i atal gwastraff bwyd rhag bwydo newid hinsawdd:
1. Dyddiadau difyr! Mae’r dyddiad defnyddio neu’r ‘use by date’ yn ymwneud â diogelwch – ddylech chi ddim bwyta’r bwyd ar ôl y dyddiad yma (hyd yn oed os ydi o’n edrych neu’n arogli’n iawn). Mae’r dyddiad ‘ar ei orau cyn’ neu ‘best before’ yn ymwneud ag ansawdd – er na fydd y bwyd ar ei orau, mi fydd yn dal yn ddiogel i chi ei fwyta am beth amser i ddod.
2. Defnyddio pob tamaid. Ydych chi’n taflu crystiau a choesau brocoli i’r bin? Mae dros ddwy ran o dair o’r bwydydd rydym ni’n eu gwastraffu yn hollol fwytadwy, felly mae defnyddio pob rhan fwytadwy o’ch bwyd yn hanfodol. Beth am beidio â phlicio’r tatws pan fyddwch chi’n gwneud tatws stwnsh – mi fyddwch chi’n arbed amser hefyd!
3. Oerwch yr oergell. Mae cyfartaledd tymheredd oergelloedd y Deyrnas Unedig bron yn 7°C, ond mae bwydydd yn para’n hirach os ydych chi’n eu cadw nhw dan 5°C.
4. Prydau perffaith. Dwylo i fyny pwy sy’n gwneud gormod o reis neu basta? Mae’n hawdd iawn gwneud, ond mae yna bethau y gallwch chi eu gwneud i wneud yn siŵr nad ydych chi’n coginio gormod. Er enghraifft, mae mwg o reis sych yn ddigon i bedwar oedolyn.
5. Silff-lun. Os nad ydych chi’n rhy hoff o ‘sgwennu rhestrau siopa beth am dynnu llun o’ch oergell/silffoedd bwyd yn lle? Bydd hyn yn eich stopio chi rhag prynu pethau sydd gennych chi’n barod.
6. Synnwyr cyffredin. Bydd y rhan fwyaf o ffrwythau a llysiau yn para’n hirach yn yr oergell. Yr eithriadau allweddol ydi bananas a phinafal (cadwch y rhain ar y cownter), a nionod a thatws (cadwch y rhain mewn lle oer, tywyll a sych – fel cwpwrdd)!
7. Rhewi cyn y dyddiad defnyddio. Fe allwch chi rewi unrhyw fwyd gyda dyddiad defnyddio, gan gynnwys cig, hyd at y dyddiad hwnnw. Mae hyn yn ddefnyddiol iawn os ydi’ch cynlluniau’n newid ar fyr rybudd – cyn i chi archebu tecawê ar frys cofiwch edrych yn yr oergell am unrhyw beth y medrwch chi ei rewi ar gyfer diwrnod arall.
8. Yr hambwrdd ciwbiau rhew – arwr y rhewgell. Gormod o lefrith, dim digon o amser? Tywalltwch y llefrith sydd gennych chi dros ben i mewn i’ch hambwrdd ciwbiau rhew a’i roi yn y rhewgell. Fe allwch chi ddefnyddio hambwrdd ciwbiau rhew i rewi perlysiau ffres hefyd. Torrwch nhw a rhowch nhw yn yr hambwrdd, gan ychwanegu ychydig o olew – bydd gennych chi wedyn ddognau hawdd i’w hychwanegu i’r badell pan fyddwch chi’n coginio nesaf.
9. Bara blasus. Mae bara yn rhewi’n dda. Rhowch eich torth dafellog yn y rhewgell a phan fydd arnoch chi angen bara fe allwch chi estyn tafell a’i thostio’n sydd o’r rhewgell. Awgrym bach arall: tapiwch eich torth ar y cownter cyn i chi ei rhewi fel nad ydi’r tafellau yn glynu at ei gilydd.
10. Gwrthrychau Rhewedig Anhysbys. Cyn i chi roi bwyd dros ben yn y rhewgell cofiwch labelu’r bag/cynhwysydd fel eich bod chi’n gwybod beth sydd ynddo a phryd y rhoddoch chi o yn y rhewgell.
Mae gwefan Love Food Hate Waste yn llawn ryseitiau blasus a hyd yn oed mwy o awgrymiadau ar gyfer manteisio i’r eithaf ar eich bwyd.
Wedi methu casgliad bin? Rhowch wybod i ni ar-lein – mae’n hawdd.
RHOWCH WYBOD AM GASGLIAD BIN A FETHWYD
