Mae Woody’s Lodge, elusen arweiniol yng Nghymru sy’n cefnogi cyn-filwyr, a chyn bersonél y gwasanaethau brys, a’u teuluoedd, yn falch o gyhoeddi eu bod yn agor eu siop elusen gyntaf erioed yn Wrecsam.
Wedi’i lleoli ar Stryt Caer, yng nghanol adeilad cymunedol Tŷ Pawb, mae hyn yn nodi carreg filltir sylweddol ar gyfer Woody’s Lodge, sef y siop elusen gyntaf yn Wrecsam i gefnogi cyn-filwyr a gwasanaethau golau glas.
Ni fyddai’r fenter gyffrous hon yn bosibl heb gefnogaeth hael Cyngor Wrecsam, sydd wedi rhoi cyfle i Woody’s Lodge feddiannu un o’u heiddo yn y canolbwynt cymunedol ffyniannus hwn.
Mae eu partneriaeth wedi bod yn fodd o helpu’r elusen i sefydlu presenoldeb yn Wrecsam, lle bydd y siop yn gweithredu fel adnodd hollbwysig wrth hel pres a chodi ymwybyddiaeth o’r gwasanaethau hanfodol mae Woody’s Lodge yn eu darparu.
Yn ychwanegol at gynnig ystod eang o ddillad ail law, ategolion, nwyddau cartref a mwy, bydd y siop yn cynnwys arddangosfa unigryw o eitemau cofiadwy milwrol, sydd ar fenthyg yn garedig gan gyn-filwyr a chymdeithasau lleol.
Bydd yr eitemau gwerthfawr hyn, nad ydynt ar werth, yn cynnig cysylltiad pwerus i ymwelwyr o hanes a phrofiadau’r sawl sydd wedi gwasanaethu. Mae’r arddangosfa’n tanategu cysylltiad dwfn y gymuned y mae Woody’s Lodge yn ei feithrin ac mae’n gweithredu i’n hatgoffa’n deimladwy o’r aberth a wnaeth aelodau o’n gwasanaethau.
“Rydym yn ddiolchgar iawn i Gyngor Wrecsam am eu cefnogaeth, ac am ein helpu i wireddu ein breuddwyd o agor siop elusen,” meddai Graham Jones, Prif Weithredwr Woody’s Lodge.
“Bydd y siop hon yn ffagl o obaith ar gyfer cyn-filwyr a phersonél y gwasanaethau golau glas yn Wrecsam, ac rydym wrth ein boddau o fod yn rhan o’r gymuned arbennig hon. Bydd ychwanegiad eitemau cofiadwy milwrol i’w harddangos yn cryfhau ein cenhadaeth i anrhydeddu a chefnogi’r bobl sydd wedi rhoi gymaint.”
Dywedodd y Cynghorydd Beverley Parry-Jones, Cefnogwr y Lluoedd Arfog yng Nghyngor Wrecsam: “Rydym yn falch o gefnogi Woody’s Lodge, sydd wedi dewis Wrecsam fel lleoliad eu siop newydd.
“Rydym wedi gweithio’n agos gyda’r elusen ardderchog hon, sy’n gwneud gymaint i helpu’r bobl sydd wedi gwasanaethu, i ganfod lleoliad canolog yn y ddinas.”
Mae Woody’s Lodge yn gwahodd pawb i ymweld â’r siop newydd, archwilio’r ystod eang o eitemau sydd ar gael, edrych ar yr eitemau cofiadwy milwrol sy’n cael eu harddangos, a dysgu rhagor am genhadaeth yr elusen.
Mae’r elusen yn edrych ymlaen at groesawu’r gymuned leol i’r siop, a chydweithio i gefnogi’r sawl sydd wedi gwasanaethu ein gwlad.
