Gan ddod â natur a phobl at ei gilydd, mae ein parciau gwledig yn haeddu cael eu dathlu!
Gyda chyllid gan grant Llywodraeth Cymru – Lleoedd Lleol ar gyfer Natur – mae parciau gwledig Wrecsam wedi cael eu ffilmio i greu casgliad o fideos.
Mae’r fideos hyn yn rhoi cipolwg i chi o’r hyn sydd gan natur i’w gynnig ar draws y fwrdeistref sirol – boed yn dro bach hamddenol, rhedeg, beicio, neu bicnic gyda’r teulu, mae parciau gwledig Wrecsam yn cynnig mannau anhygoel ar gyfer y cyfan!
Mae pob parc yn cynnig rhywbeth unigryw: ewch i weld yr anifeiliaid bach ac Afon Dyfrdwy ym Mharc Gwledig Tŷ Mawr, darganfyddwch gyfleoedd beicio ym Mharc Gwledig Dyfroedd Alun, neu os ydych chi’n teimlo’n ddewr, y trac BMX ym Mharc Ponciau. Ewch i weld yr hwyaid ym Mharc Gwledig Stryt Las a Pharc Acton, neu gwnewch ychydig o ymarfer corff yn yr awyr iach yn y gampfa awyr agored ym Mharc Bellevue. Mwynhewch dro hamddenol ar hyd y llwybrau tarmac gwastad troellog mewn llawer o barciau, gadewch y llwybr i archwilio corneli cudd y goedwig ym Mharc Gwledig Dyffryn Moss, neu dringwch i gopa’r bryn ym Mharc Gwledig Bonc yr Hafod i gael golygfeydd panoramig. Beth bynnag fo’ch chwaeth, mae’r parciau’n cynnig rhywbeth at ddant pawb.
Mae ceidwaid parciau, tîm mannau agored a gwasanaethau stryd Cyngor Wrecsam yn treulio oriau lawer yn cynnal a chadw parciau gwledig hardd Wrecsam fel y gall ymwelwyr eu mwynhau drwy gydol y flwyddyn.
Dywedodd y Cynghorydd Terry Evans, yr aelod arweiniol dros wasanaethau amgylcheddol: “Gobeithiwn y byddwch yn mwynhau gwylio ein fideos o’r parciau a’u bod yn eich ysbrydoli i fynd allan i’r awyr agored yn fuan. Efallai fe welwch rywbeth newydd yn y fideos nad ydych wedi’u gweld yn eich parc lleol o’r blaen, neu efallai y byddwch yn gwneud trefniadau i ddarganfod parc newydd yr haf hwn. P’un a ydych yn rhywun lleol sy’n mynd yn aml neu’n ymwelydd newydd, mae’r parciau yn aros i’ch croesawu. Rydym yn gobeithio y gwnewch chi fwynhau eich ymweliad!”
Mae pob fideo ar gael ar dudalen parciau a chefn gwlad ar wefan Cyngor Wrecsam.
Derbyniwch y newyddion a’r wybodaeth ddiweddaraf yn syth i’ch mewnflwch.
