Mae Wrecsam yn parhau i fod yn rhan o rwydwaith rhyngwladol o ddinasoedd sy’n ymroddedig i feithrin a hybu’r arferion gorau yn y byd wrth reoli coed trefol ar ôl derbyn Statws Dinas Goed y Byd.
Gwnaed y cyhoeddiad gan Arbor Day Foundation i gydnabod y modd yr ydym yn tyfu, gwarchod, a chynnal a chadw ein coedwig drefol yma ym Mwrdeistref Sirol Wrecsam.
Mae Wrecsam yn ymuno â Chaerdydd a Chasnewydd fel yr unig ddinasoedd eraill yng Nghymru i gael yr anrhydedd hon, ac mae’n un o ddim ond 200 o ddinasoedd mewn 22 o wledydd ledled y byd!
“Mae coed yn bwysig i bobl, dim ots o ba wlad y mae rhywun yn dod neu’r iaith y maent yn ei siarad,” meddai Dan Lambe, prif weithredwr Arbor Day Foundation. “Rydym oll yn dymuno byw mewn dinas iach, gydnerth a phrydferth – mae coed yn rhywbeth cyffredin sy’n gallu cyflawni hynny. Mae cael eich cydnabod fel un o Ddinasoedd Coed y Byd yn golygu bod eich dinas chi’n ymrwymo i wneud mwy na’r arfer i ddynodi coed yn isadeiledd gwyrdd hanfodol ar gyfer y bobl.”
Meddai’r Cynghorydd Hugh Jones, Aelod Arweiniol Cynllunio a Gwarchod y Cyhoedd, “Rydym wrth ein boddau bod dinas Wrecsam, unwaith eto, wedi ei chydnabod yn un o Ddinasoedd Coed y Byd. Rydym yn falch o ymuno â rhwydwaith byd-eang o ddinasoedd a threfi sy’n ymrwymo i warchod a chynyddu eu stoc o goed a hyrwyddo eu gwerth drwy feithrin cyswllt â’r gymuned a rheoli eu hasedau’n dda.
“Drwy ein rhaglen plannu coed dros yr hydref a gaeaf diwethaf rydym wedi plannu mwy na 5,000 o goed ledled y sir. Mewn lleoliadau fel Bradle, Coedpoeth a Wrecsam, a chyda chymorth gwirfoddolwyr, rydym wedi plannu amrywiaeth o rywogaethau o goed – o farchwiail llydanddail cynhenid i goed safonol mawr, yn ogystal â nifer o berllannau ffrwythau. Mae hyn yn cyfrannu at ein huchelgais i gynyddu’r gorchudd coed ledled Wrecsam i 20%.”
Dywedodd y Cynghorydd Terry Evans, Aelod Arweiniol yr Amgylchedd, “Mae cael ein henwi’n un o Ddinasoedd Coed y Byd am yr ail dro yn gydnabyddiaeth o waith caled ac ymdrechion parhaus staff y Cyngor a chyfraniad hanfodol aelodau o’r cyhoedd mewn gwahanol gymunedau dros y ddeuddeng mis diwethaf. Mae plannu, gwarchod a rheoli coed yn hanfodol ar gyfer ein hiechyd a’n lles, ac ar gyfer yr economi leol.
“Rydym, fel Cyngor, yn ddiolchgar iawn eto am yr anrhydedd hon, a byddwn yn dal i ymrwymo i blannu, gwarchod a gwella ein coed a’n coetir sydd gyda’i gilydd yn ffurfio coedwig drefol Wrecsam.”
Safonau cydnabod Dinasoedd Coed y Byd
Rydym wedi derbyn cydnabyddiaeth fel Dinas Goed gan Arbor Day Foundation yn nhrydedd flwyddyn y rhaglen. I gael cydnabyddiaeth fel Dinas Goed, yr oedd yn rhaid i Wrecsam ddangos ei bod yn ymrwymo i gyflawni pump o safonau gofynnol:
- pennu cyfrifoldeb dros ofalu am goed
- llywodraethu’r drefn o reoli asedau a rheoli risg yng nghyswllt coedwigoedd, coetir a choed yn unol â Strategaeth Coed a Choetir gymeradwy a Pholisi Rheoli Coed
- cadw rhestr gyfoes o’n hadnoddau coed a choetir lleol
- neilltuo adnoddau i gyflawni ein strategaeth goed
- cynnal digwyddiadau blynyddol i glodfori coed a’u buddion, er mwyn addysgu ysgolion a chymunedau.
Arbor Day Foundation yw’r gymdeithas ddielw fwyaf yn y byd sy’n ymwneud â phlannu coed. Mae’r Sefydliad Bwyd ac Amaeth yn un o asiantaethau arbenigol y Cenhedloedd Unedig sy’n arwain ymdrechion rhyngwladol i drechu newyn. Daeth y ddau sefydliad ynghyd yn 2019 i sefydlu Dinasoedd Coed y Byd. Mae’r rhaglen yn ymgyrch fyd-eang i gydnabod dinasoedd a threfi sy’n ymrwymo i sicrhau bod eu coedwigoedd a’u coed trefol yn cael eu cynnal a’u cadw’n iawn, eu rheoli’n gynaliadwy, a rhoi clod haeddiannol iddynt.
Efallai yr hoffech hefyd ddarllen Bydd cefnogwyr pêl-droed a pheillwyr yn cael cic allan o furlun ‘enfawr’ diweddaraf Wrecsam!
Derbyniwch y newyddion a’r wybodaeth ddiweddaraf yn syth i’ch mewnflwch
