Ysgol Llan-y-pwll yw’r ysgol ddiweddaraf yn Wrecsam i gael pecyn casglu sbwriel yn rhad ac am ddim er mwyn mabwysiadu Ardal Di-sbwriel, ac mae Caru Cymru eisiau gwybod a allai eich ysgol chi fod nesaf?
Ymwelodd Emma Watson, Arweinydd Prosiect Caru Cymru Cyngor Wrecsam â’r ysgol yn ddiweddar ynghyd â Shane Hughes, Swyddog Prosiect Cadwch Gymru’n Daclus. Cafwyd sgwrs diogelwch a bu sesiwn casglu sbwriel gyda’r disgyblion a’r athrawon sy’n cymryd rhan. Casglwyd dwy sach o sbwriel o’r ardal gyfagos ac mae cynlluniau wedi’u gwneud i ymestyn i’w parc lleol ar gyfer cynnal sesiynau casglu sbwriel rheolaidd.
Er mwyn cymryd rhan yn y prosiect Ardaloedd Di-Sbwriel, mae busnesau ac ysgolion yn cael eu gwahodd i ‘fabwysiadu’ ardal leol iddyn nhw er mwyn helpu i’w chadw’n lân drwy sesiynau casglu sbwriel rheolaidd.
- Cofrestru -
Mae ysgolion yn cael pecynnau casglu sbwriel eu hunain yn rhad ac am ddim pan fyddan nhw’n cofrestru. Mae’r pecynnau’n cynnwys:
- pecyn o 5 neu 10 o declynnau casglu sbwriel
- festiau llachar
- cylchoedd i’r bagiau
- sachau coch neu wyrdd ar gyfer casglu sbwriel
Mae’n bosib i chi hefyd ofyn am gyfarpar mewn meintiau llai ar gyfer plant iau.
Dywedodd Emma: “Mae Wrecsam yn parhau i ddangos ei hymrwymiad i wella mannau lleol ac mae mabwysiadu Ardaloedd Di-sbwriel yn ffordd wych o gymryd rhan. Mae’n hyfryd gweld disgyblion mewn ysgolion lleol yn ymwneud â chasglu sbwriel a’r angerdd maen nhw’n ei ddangos. Mae cofrestru’n rhwydd a byddwch chi’n cael cymorth bob cam o’r ffordd.”
Dywedodd Mrs James, Pennaeth Dros Dro Ysgol Llan-y-pwll: “Rydym ni’n falch o fod yn rhan o’r prosiect Ardaloedd Di-sbwriel. Mae’n bwysig ein bod ni i gyd yn gwneud ein rhan i ofalu am yr amgylchedd a helpu i gadw ein cymuned ni’n lân.”
Dywedodd y Cynghorydd Hugh Jones, Aelod Arweiniol yr Amgylchedd: “Rydym ni’n ddiolchgar i’r busnesau a’r ysgolion i gyd sydd wedi croesawu’r prosiect Ardaloedd Di-sbwriel hyd yma. Mae casglu sbwriel yn gallu trawsnewid ardal wedi’i hesgeuluso yn gyflym ac mae’n helpu i greu Wrecsam mwy diogel a glân.”
I gael rhagor o wybodaeth, cymerwch olwg ar ein gwefan Caru Cymru Wrecsam.
Os yw eich ysgol chi’n barod i gymryd rhan, cofrestrwch eich diddordeb drwy fynd i wefan Cadwch Gymru’n Daclus.
Wedi methu casgliad bin? Rhowch wybod i ni ar-lein – mae’n hawdd.
RHOWCH WYBOD AM GASGLIAD BIN A FETHWYD
