Mae heddiw’n Ddiwrnod Rhyngwladol Merched ac rydym yn gweithio gyda’n partneriaid i dynnu sylw at y ffaith nad yw “DIM OND” yn esgus am ymddygiad amhriodol oherwydd does dim esgus amdano ac i’w herio pan maent yn dod ar ei draws.
Derbyniwch newyddion a gwybodaeth gan eich cyngor lleol – cofrestrwch i dderbyn bwletinau ar ffurf e-bost.
Gyda ffrindiau, neu’n llais bach yn eich isymwybod eich hun, mae dau air sydd bob amser yn ceisio esgusodi ymddygiad amhriodol. “DIM OND”.
- “DIM OND” pinsio ei phen-ôl wnes i
- “DIM OND” chwibanu arni wnes i
- “DIM OND” gwneud sylw am ei chorff wnes i
- “DIM OND” pwyso yn ei herbyn wnes i
- “DIM OND” cerdded tu ôl iddi wnes i
- “DIM OND” ei threisio wnes i
Ydi hyn yn swnio’n gyfarwydd?
Ni ddylai’r geiriau “DIM OND” gael eu defnyddio yn unrhyw un o’r uchod oherwydd does dim esgus am unrhyw weithred sy’n achosi ofn, braw neu ofid. Mae trais a cham-drin o bob math yn erbyn merched yn anghywir.
Meddai’r Arolygydd Claire McGrady o Heddlu Gogledd Cymru, “Mae ‘DIM OND’ yn rhywbeth yr ydym yn ei glywed drwy’r amser ac i lawer mae’n arferol iddynt esgusodi eu hymddygiad fel hyn. Rydym yn awyddus i annog pawb i herio’r ymddygiad a chodi ymwybyddiaeth o’r niwed, yr ofn a’r gofid y mae’n ei achosi.
“Nid yw’n iawn. Mae hefyd yn amharchus iawn ac mae merched yn haeddu ac yn disgwyl gwell.”
Meddai’r Cynghorydd Hugh Jones, Aelod Arweiniol Cymunedau, Partneriaethau, Gwarchod y Cyhoedd a Diogelwch Cymunedol, “Pa un ai ydi o’n digwydd ar noson allan, yn y gweithle neu goleg, mae angen mynd i’r afael â hyn ac mae cyfrifoldeb ar ddynion i wynebu canlyniadau eu gweithredoedd a gweithredoedd eraill.
“Dylent godi llais neu ddysgu sut y gallant fod yn fwy parchus tuag at ferched.”
Mae agweddau sy’n esgusodi ac yn normaleiddio cam-drin yn rhan o’n diwylliant. O jocio a ‘thynnu coes’ rhywiaethol i aflonyddu a threisio.
Mae’r ymgyrch yn annog dynion i godi llais am yr ymddygiad hwn ble bynnag y maent.
Nid yw herio eraill ynghylch eu hymddygiad yn golygu eu bychanu neu godi cywilydd arnynt, nac yn rheswm i godi dwrn. Mae’n fater o addysgu pobl a’u hannog i newid eu hagwedd.
Dim ond mewn ffordd sy’n ddiogel i bawb y dylem fynd ati i herio ymddygiad ac agweddau amharchus/niweidiol.
Os ydych chi’n bryderus am eich ymddygiad eich hun, ymddygiad dyn arall neu eisiau helpu merched i deimlo’n fwy diogel, ewch i https://llyw.cymru/dim-esgus a chliciwch ar y dolenni.
Gallwch hefyd gael cyngor ynglŷn â sut i gael gwybod mwy a sut i wneud mwy i helpu merched i deimlo’n ddiogel.
Mae Dim Esgus yn ymgyrch ledled Cymru gan Lywodraeth Cymru yr ydym ni’n ei chefnogi fel rhan o’r Ymgyrch Strydoedd Mwy Diogel yma yn Wrecsam.
Derbyniwch ein prif straeon dros e-bost.
[button color=”” size=”large” type=”square_outlined” target=”new” link=”https://public.govdelivery.com/accounts/UKWCBC_CY/subscriber/new?topic_id=UKWCBC_CY_5″]TANYSGRIFWYCH[/button]
