Rydym wedi nodi pum ardal yn Wrecsam ar gyfer cyflwyno nifer o fesurau lleihau carbon ac fe anogir trigolion lleol i gymryd rhan ynddynt, fel rhan o’n cynlluniau i gefnogi natur a lleihau allyriadau carbon ar draws y fwrdeistref sirol.
Dyma’r pum ‘cymuned carbon isel’ a nodwyd: Offa, Cefn Mawr, Rhos, Rhosddu a Pharc Caia. Bydd pob un ohonynt yn derbyn hyd at £10,000 ar gyfer datblygu mentrau i annog newid mewn ymddygiad a lleihau allyriadau yn eu hardal leol.
Mae pob un o’r pum cymuned bellach yn sefydlu grwpiau llywio gyda’i gilydd a fydd yn gweithio i benderfynu a gweithredu’r mesurau mwyaf effeithiol y bydd trigolion yn dymuno chwarae eu rhan ynddynt er mwyn lliniaru newid hinsawdd.
“Mentrau cymdeithasol y gall pobl gymryd rhan ynddynt”
Meddai’r Cynghorydd David A Bithell, Cefnogwr yr Hinsawdd: “Rydym yn falch o fod wedi cefnogi’r pum cymuned a byddwn yn cydweithio’n agos â nhw dros y misoedd nesaf i’w helpu i gyflwyno mesurau a fydd yn cefnogi natur ac yn lleihau allyriadau carbon. Gellir cynnig swm sylweddol o arian ar gyfer y prosiect hwn, fel bod gan y cymunedau’r arian sydd ei angen ar gyfer cyflwyno mentrau hynod gadarnhaol, y gall unigolion gymryd rhan ynddynt.”
“Datblygu cymunedau cryf”
Meddai’r Cynghorydd Hugh Jones, Aelod Arweiniol yr Amgylchedd: “Er mwyn cefnogi’r pum cymuned ymhellach, byddwn yn cyflwyno cyfleoedd newydd iddynt ar gyfer hyfforddiant, yn ogystal â datblygu sgiliau. Bydd y prosiect hwn yn annog newid mewn ymddygiad yn y cymunedau a all fod yn un hirdymor yn erbyn effeithiau niweidiol newid hinsawdd ac allyriadau carbon. Gobeithiwn y bydd y gwaith hwn wir o gymorth i ddatblygu cymunedau cryf, sydd wedi ymrwymo i warchod a diogelu eu hamgylchedd lleol.”
Digwyddiadau ymgysylltu – cymerwch ran
Mae angen eich help arnom nawr i wireddu’r cynlluniau hyn!
Cynhaliwyd sesiwn ymgysylltu â’r gymuned Cefn Mawr yng Nghapel Ebenezer ar 20 Mai, ac rydym bellach yn chwilio am unigolion a all ein helpu ni i ddatblygu’r cynlluniau hyn ymhellach ar gyfer y gymuned hon. Os hoffech gymryd rhan, anfonwch e-bost at decarbonisation@wrexham.gov.uk
Bydd rhagor o sesiynau’n cael eu cynnal yn fuan yn y pum cymuned, lle bydd aelodau o’n tîm hinsawdd wrth law i ateb unrhyw gwestiynau sydd gennych, a bydd modd i chi drafod sut y gallwch gymryd rhan gyda’r prosiect.
Cynhelir y sesiwn nesaf yn niwrnod hwyl i’r teulu, Rhosddu, ym Mharc Rhosddu, ddydd Sadwrn 10 Mehefin (rhwng 12.00pm a 6.00pm). Gall trigolion rannu eu syniadau â’n tîm a gallwch hefyd roi gwybod i ni os ydych chi’n dymuno cymryd mwy o ran yn y prosiect.
Bydd cymuned Offa yn cynnal ei sesiwn ymgysylltu gyntaf ddydd Sadwrn, 1 (rhwng 10.00am a 2.00pm) Gorffennaf yng Nghanolfan Gymunedol Parciau, a bydd ein tîm a budd-ddeiliaid lleol eraill ar gael i wrando ar farn a syniadau trigolion ynghylch mesurau’r hinsawdd.
Bydd y Rhos hefyd yn cael sesiwn ddydd Sadwrn, 1 Gorffennaf rhwng 10.00am a 2.00pm a gynhelir yng Nghanolfan Gymunedol Rhos.
Mae yna hefyd Ddiwrnod Amgylcheddol yn cael ei gynnal ym Mhartneriaeth Parc Caia ar Ffordd y Tywysog Siarl rhwng 10.30am a 4.00pm ddydd Sadwrn, 1 Gorffennaf. Bydd ein tîm yn brysur yn Offa, ond bydd digonedd o weithgareddau gwych i drigolion, gan gynnwys caffi atgyweirio.
Bydd Parc Caia yn cael ei sesiwn gyntaf ddydd Mawrth, 11 Gorffennaf rhwng 3.45pm a 5.45pm yn Ysgol Hafod y Wern ar Ffordd Deva.
Gall unigolion gymryd rhan mewn sawl ffordd, a’n helpu ni i ddatblygu syniadau ar gyfer gweithredu! Os ydych chi’n dymuno cymryd rhan neu ddysgu mwy, cysylltwch â ni trwy anfon e-bost at decarbonisation@wrexham.gov.uk
Wedi gweld twll yn y ffordd? Rhowch wybod i ni ar-lein – mae’n hawdd.
