Tŷ Pawb fydd y lleoliad ar gyfer digwyddiad rhad ac am ddim i ddathlu Hanes Pobl Dduon Cymru 365 yn ddiweddarach y mis hwn.
Bydd y digwyddiad amlddiwylliannol ac amlieithog – o’r enw ‘Dathlu a Dyrchafu’ – yn cael ei gynnal ddydd Sadwrn 21 Hydref, 10am-5pm a bydd yn cynnwys bwyd o bob rhan o’r byd, gweithgareddau i’r teulu, perfformiadau byw a dangosiadau ffilm.
O 10am-12pm bydd gweithgareddau celfyddydol amlddiwylliannol ac amlieithog am ddim i blant.
Mae’r arlwy yn cynnwys llu o berfformwyr dawnus o Wrecsam a thu hwnt, gan gynnwys cerddoriaeth Sbaeneg a Gwlad Pwyl ac Arabeg, dawnsio gwerin Tsieineaidd, Affricanaidd ac Indiaidd, a DJ’s.
Bydd stondin hefyd yn gwerthu eitemau a wnaed gan grŵp crefftau Portiwgaleg Wrecsam, Bom Dia Cymru
Dywedodd trefnydd y digwyddiad, Iolanda Banu Viegas: “Mae’n anrhydedd mawr cael trefnu Hanes Pobl Dduon Cymru 365 ar ran Race Council Cymru am y 10 mlynedd diwethaf, ac yn falch o’i weld yn tyfu bob blwyddyn. Rydym yn ddiolchgar iawn i’n partneriaid, noddwyr ac am gefnogaeth holl gymunedau amrywiol Gogledd Cymru. Bydd eleni yn fwy ac yn well ac rydym i gyd yn gyffrous iawn i’ch croesawu chi a’ch teulu ar 21 Hydref yn Tŷ Pawb!”
Dywedodd yr Aelod Arweiniol gyda chyfrifoldeb am Tŷ Pawb y Cynghorydd Hugh Jones, “Mae’r digwyddiad hwn yn argoeli i ddangos Wrecsam ar ei orau, yn ddathliad gwych o’n cymunedau amlddiwylliannol gyda rhestr o berfformwyr lleol dawnus a bwyd rhyngwladol blasus. Mae’n ddigwyddiad rhad ac am ddim i bob oed a bydd croeso cynnes i bawb felly byddwn yn annog pawb i ddod i fwynhau’r diwrnod a dathlu Hanes Pobl Dduon Cymru 365 yn ein dinas.”
I gael rhagor o wybodaeth a rhestr lawn o berfformwyr ewch i wefan Tŷ Pawb
Mae’r digwyddiad wedi bod yn bosibl diolch i gefnogaeth gan Gyngor Celfyddydau Cymru, Cydlyniant Cymunedol Gogledd-ddwyrain Cymru, Hyb Amlddiwylliannol Gogledd Cymru, Cwmni Buddiannau Cymunedol CIC, Cyngor Hil Cymru, Hanes Pobl Dduon Cymru a Gwrth-hiliaeth Cymru Llywodraeth Cymru.
