Mae Cyngor Bwrdeistref Sirol Wrecsam wedi erlyn perchennog tir ar Ffordd Bower yn Acrefair am fethu â chydymffurfio â gofynion Hysbysiad Gorfodi. Gwrthodwyd caniatâd cynllunio i godi stablau ar y tir yn 2023. Fodd bynnag, roedd gwaith i lefelu’r tir ac i newid mynediad i gerbydau wedi digwydd heb ganiatâd cynllunio. Cyflwynwyd Hysbysiad Gorfodi ym mis Mai 2023 yn ei gwneud yn ofynnol i lefelau gwreiddiol y tir gael eu hadfer ac i gau’r fynedfa i gerbydau. Er bod ychydig o waith i gydymffurfio â’r hysbysiad wedi digwydd yn ystod 2023 a 2024, nid oedd hyn yn ddigonol i gydymffurfio’n llawn â gofynion yr Hysbysiad.
Cafodd y perchennog orchymyn i dalu dirwy o £500, £550 ar gyfer costau a thâl dioddefwr o £200. Erbyn hyn mae gwaith hefyd wedi’i wneud i fodloni gweddill gofynion yr Hysbysiad.
Dywedodd y Cynghorydd Hugh Jones, Aelod Arweiniol Cynllunio a Diogelu’r Cyhoedd: “Mae canlyniad yr achos hwn yn enghraifft arall o Dîm Gorfodi Cynllunio’r Cyngor yn ymateb yn gadarn pan fydd rheoliadau cynllunio yn cael eu torri.
Dylai tirfeddianwyr ofyn am gyngor gan Swyddogion Cynllunio’r Cyngor cyn ymgymryd â gwaith datblygu i wneud yn siŵr nad ydynt yn mynd yn groes i reoliadau cynllunio. Mewn achosion o dorri rheolau, dylai tirfeddianwyr weithredu’n brydlon i ymgymryd â gwaith i unioni hyn cyn gynted â phosibl er mwyn osgoi’r risg o erlyniad.”
Dywedodd David Fitzsimon, Prif Swyddog yr Economi a Chynllunio yng Nghyngor Wrecsam: “Mae ein Swyddogion yn ymateb yn gadarn i achosion o dorri rheolau cynllunio drwy gymryd camau gorfodi. Erlyn yw’r dewis olaf a bydd y Cyngor ond yn cymryd y cam hwn pan fydd tirfeddianwyr yn methu â chymryd camau priodol i unioni achosion o dorri rheolau cynllunio. Mae’r Cyngor yn cynnig gwasanaeth cynghori cyn ymgeisio. Gall y gwasanaeth hwn roi’r cyngor sydd ei angen ar dirfeddianwyr i’w helpu i osgoi torri rheoliadau cynllunio yn y lle cyntaf.”
