Y gaeaf diwethaf, gyda chefnogaeth Partneriaeth Coedwig Wrecsam, plannodd Cyngor Wrecsam dros 9,000 o goed ar draws y fwrdeistref sirol, gan gyfoethogi cynefinoedd coetir hanfodol a chefnogi mannau gwyrdd i bobl a bywyd gwyllt.
Mae coed a choetiroedd yn darparu llu o fanteision i bobl a bywyd gwyllt, o wella ansawdd aer a lleihau gwres trefol i gefnogi bioamrywiaeth a hybu llesiant. Mae effaith gadarnhaol coed yn bellgyrhaeddol.
Wedi’i gefnogi gan gyllid o Gronfa Coed Argyfwng Coed Cadw yn ogystal â Trees for Cities, Lleoedd Lleol ar gyfer Natur a’r Gronfa Ffyniant Gyffredin, canolbwyntiodd y rhaglen ar blannu mewn ardaloedd blaenoriaeth â gorchudd coed isel a sgoriau ecwiti coed gwael, gan sicrhau bod y cymunedau mwyaf anghenus yn elwa o’r manteision niferus y mae coed yn eu cynnig. Darganfyddwch eich sgôr ecwiti coed yma: Sgôr Ecwiti Coed
Dywedodd y Cynghorydd Terry Evans, yr aelod arweiniol dros wasanaethau amgylcheddol: “Rwy’n falch ein bod wedi llwyddo i blannu’r 9,000 o goed hyn mewn ardaloedd o amgylch y fwrdeistref sirol. Mae coed wrth wraidd amgylchedd ffyniannus, gwydn. Trwy fuddsoddi yn ein coetiroedd, rydym yn buddsoddi mewn cymunedau iachach, cynefinoedd cyfoethocach, a dyfodol gwyrddach i Wrecsam.”
Mae’r coed sydd newydd eu plannu yn rhan o ymdrech hirdymor i greu rhwydwaith coetir mwy cysylltiedig a chynaliadwy ledled y sir. Mae coetiroedd yn gynefin blaenoriaethol i Gymru ac mae pob ymdrech yn cael ei wneud i wrthdroi’r argyfwng hinsawdd a natur y mae’r wlad yn ei wynebu. Mae plannu coed trwy brosiectau fel hyn yn cefnogi bywyd gwyllt lleol trwy gynyddu cynefinoedd naturiol, gan ddarparu bwyd a lloches hanfodol i adar, pryfed a mamaliaid.
Cymerwch Ran: Byddwch yn Rhan o Ddyfodol Gwyrdd Wrecsam
Mae gofalu am ein coed yr un mor bwysig â’u plannu. Mae Partneriaeth Coedwig Wrecsam yn gwahodd trigolion lleol i wirfoddoli a helpu i ofalu am y coed ifanc hyn dros y blynyddoedd i ddod. P’un a ydych chi’n arddwr profiadol neu’n ddechreuwr llwyr, mae croeso i bawb gymryd rhan a gwneud gwahaniaeth. Os oes gennych ddiddordeb mewn gwirfoddoli i gefnogi coed a choetiroedd, anfonwch e-bost at woodlandpledge@wrexham.gov.uk.
Gallwch hefyd ddangos eich cefnogaeth drwy lofnodi Addewid Coetir Wrecsam ar wefan Cyngor Wrecsam – ffordd syml o gydsefyll â’ch cymuned wrth werthfawrogi a gwarchod ein coed trefol a gwledig.
Gwnewch nodyn yn eich calendr: Wythnos Cysylltiadau Coetir – Mehefin 14–21, 2025
Ymunwch â ni yr haf hwn ar gyfer Wythnos Cysylltiadau Coetir, 14-21 Mehefin, i ddathlu coed a choetiroedd a’r rôl maen nhw’n ei chwarae wrth siapio ein byd. Gyda digwyddiadau, gweithdai a theithiau cerdded tywys wedi’u cynllunio ledled y sir, mae’n gyfle perffaith i ddysgu mwy, cael eich ysbrydoli, a chysylltu â natur. Bydd rhagor o fanylion yn dod yn fuan.
Derbyniwch y newyddion a’r wybodaeth ddiweddaraf yn syth i’ch mewnflwch.
