Yn y dydd Mercher 8 Gorffennaf, bydd gwefan adrodd a thaliadau Cyngor Wrecsam i breswylwyr – FyNghyfrif – yn cael diweddariad diogelwch.
Bydd hafan FyNghyfrif hefyd yn newid sy’n golygu, pan fyddwch wedi mewngofnodi, byddwch yn gallu gweld pryd fydd eich biniau’n cael eu casglu nesaf.
Fel rhan o’r diweddariad diogelwch, rydym yn gweithredu polisi cyfrineiriau newydd, gyda gofynion diogelwch cryfach fel yr argymhellir gan y Sefydliad Safonau a Thechnoleg Cenedlaethol (NIST) a’r Ganolfan Seiberddiogelwch Genedlaethol (NCSC).
Er mwyn hwyluso’r newid hwn, fe fydd yn ofynnol i chi ddiweddaru eich cyfrinair, a phan gaiff hyn ei actifadu, bydd gofyn i chi newid eich cyfrinair ar gyfer FyNghyfrif. Efallai y bydd hyn yn anghyfleus, ond dim ond unwaith y bydd yn rhaid i chi ei wneud a bydd yn sicrhau gwelliant sylweddol o ran diogelwch.
Sut i greu cyfrinair cryf
Mae cyfuno tri gair ar hap yn ffordd dda o greu cyfrinair, ac mae’n dechneg a argymhellir gan y Ganolfan Seiberddiogelwch Genedlaethol (NCSC).
Dyma enghraifft (dim ond enghraifft ydyw… peidiwch â’i ddefnyddio)…
Gallech gyfuno’r tri gair ‘afal’, ‘tŷ’ ac ‘oergell’ i greu’r cyfrinair ‘Afaltŷoergell’.
Er mwyn ei wneud hyd yn oed yn gryfach, gallech ychwanegu symbolau a rhifau rhwng y geiriau… er enghraifft ‘Afal%tŷ7oergell’.
Ceisiwch osgoi creu cyfrineiriau o fanylion am eich bywyd y gellir dod o hyd iddynt yn hawdd ar-lein, gan gynnwys proffiliau cyfryngau cymdeithasol (penblwyddi, hoff dimau pêl-droed, enw eich ci anwes ac ati).
Dylai defnyddio tri gair ar hap eich helpu i greu cyfrinair sy’n llawer anoddach i hacwyr a throseddwyr ei ddyfalu, ond yn ddigon hawdd i’w gofio.
Os yw eich cyfrinair presennol eisoes yn bodloni’r safonau hyn, gallwch ei ailddefnyddio pan ofynnir i chi newid eich cyfrinair.
Dywedodd y Cynghorydd John Pritchard, aelod arweiniol dros lywodraethu a chwsmeriaid: “Rydym yn darllen yn rheolaidd am broblemau diogelwch ar-lein, felly rwy’n falch o weld y diweddariad hwn i feddalwedd talu ac adrodd y cyngor.
“Byddwn yn annog pob preswylydd sydd â chyfrif i fewngofnodi a newid eu cyfrinair i fodloni’r gofynion newydd – mae’r weithred untro, syml hon yn golygu y bydd eich gwybodaeth yn fwy diogel.”
Os oes unrhyw gwestiynau gennych, mae croeso i chi gysylltu â thîm cymorth FyNghyfrif.
