Yma yn Wrecsam, rydym yn ffodus i gael timau gwasanaethau llyfrgell ymroddedig ar draws ein cymunedau. Maent yn ceisio darparu amrywiaeth eang o ddigwyddiadau a gweithgareddau ar gyfer pob diddordeb a hobi.
Heddiw, byddwn yn edrych ar yr hyn sydd gan ein tîm yn llyfrgell Rhos ar y gweill i chi pan fyddwch yn ymweld â nhw nesaf.
I’r ymwelwyr iau
Bob dydd Mercher, rhwng 3 a 4pm, mae llyfrgell Rhos yn cynnal y Clwb Lego.
Mae’r sesiynau hyn yn helpu plant i ddysgu sgiliau meddal amrywiol a fydd yn eu dysgu sut i weithio a rhyngweithio ag eraill. Trwy ffordd o ddysgu sy’n llawn hwyl, gall plant ddatblygu sgiliau meddwl creadigol, gwaith tîm, cyfathrebu, datrys gwrthdaro a datrys problemau.
Mae’r sesiynau yn addas ar gyfer plant 4 oed a hŷn ac nid oes cost am fynychu. Nid oes angen cadw lle, dim ond galw heibio a chymryd rhan.
Mae yna hefyd sesiwn ryngweithiol gyfeillgar a llawn hwyl i rieni neu ofalwyr a’u babanod. Bob dydd Gwener am 10.30 tan 11am, gallwch ddod draw i ymuno â sesiwn Stori a Chân.
Mae hwn yn ddigwyddiad grŵp dwyieithog. Mae croeso mawr i siaradwyr a dysgwyr Cymraeg, yn ogystal â theuluoedd sy’n newydd i’r Gymraeg. Os nad ydych yn siarad Cymraeg eich hun, peidiwch â phoeni, byddwch yn dod yn gyfarwydd ag ymadroddion Cymraeg syml yn fuan.
Nid oes cost am fynychu ac nid oes angen cadw lle ymlaen llaw.
Gwell gyda’n gilydd
Does dim byd yn curo paned a sgwrs gyda chwmni da. Bob dydd Gwener, rhwng 2 a 3pm, gall ymwelwyr ddod draw i’r Grŵp Cyfeillgarwch.
Gallwch gwrdd â ffrindiau newydd a sgwrsio am faterion sy’n bwysig i chi. Mae croeso i chi ddod â phrosiect crefft, llyfr, cwis – neu ddim ond chi eich hun.
Nid oes cost am fynychu, darperir lluniaeth ac mae croeso i bawb.
Mae cyfle gwych arall i wneud ffrindiau newydd yn y sesiynau Hel Atgofion/Amser Cofio. Cynhelir y rhain ar drydydd dydd Gwener pob mis, rhwng 11am a 12pm.
Yma, gall ymwelwyr rannu eu hatgofion, hel atgofion gyda llyfrau a rhoi cynnig ar weithgareddau newydd gydag eraill. Mae croeso i unigolion, teuluoedd a gofalwyr.
Mae’r sesiynau am ddim gyda lluniaeth ar gael.
Gweithgareddau celf a llenyddiaeth
Bob wythnos, mae’r Grŵp Celf i Oedolion yn cyfarfod ar ddydd Gwener rhwng 12.30 a 3pm. Mae pob sesiwn yn cyflwyno prosiect newydd i’r grŵp gan ddefnyddio llawer o gyfryngau gwahanol.
Mae lleoedd yn gyfyngedig ar gyfer y digwyddiad hwn ac mae cadw lle yn hanfodol er mwyn osgoi colli cyfle. Gallwch anfon e-bost at y tîm asiantau cymunedol i gael rhagor o wybodaeth ac i gadw eich lle yn rhoscommunityagent@gmail.com.
Os ydych yn hoffi darllen a sgwrsio am lyfrau, mae yna grŵp perffaith i chi. Ar ddydd Mercher cyntaf pob mis, rhwng 2.30 a 3.30pm, mae’r Grŵp Darllen yn cwrdd i ddod â darllenwyr brwd o’r un anian at ei gilydd.
Cefnogaeth a chymorth cymunedol
Mae asiantau cymunedol yn gweithio gydag unrhyw un dros 50 oed ac sy’n byw yn Wrecsam i’w cefnogi i wneud dewisiadau gwybodus am anghenion y presennol a’r dyfodol.
Gallant eich helpu i deimlo’n fwy annibynnol, diogel ac wedi’ch gofalu amdanoch, ac i gael gwell ansawdd bywyd.
Michele yw’r asiant cymunedol ar gyfer ardal Rhos a Johnstown. Mae hi’n cynnal sesiynau galw heibio anffurfiol bob dydd Llun, rhwng 10.30am a 12pm. Mae croeso i chi ddod draw am sgwrs gyda hi am unrhyw ymholiadau sydd gennych. Nid oes angen gwneud apwyntiad.
I gael rhagor o fanylion am yr holl ddigwyddiadau a grybwyllir yma a mwy, ewch i’n tudalen digwyddiadau llyfrgelloedd. Fel arall, gallwch ffonio llyfrgell Rhos ar 01978 840328 neu e-bostio rhos.library@wrexham.gov.uk am ragor o wybodaeth.
