Mae Cyngor Wrecsam wedi agor dau gartref i blant fel rhan o ymgyrch i ddarparu mwy o gartrefi lleol i blant yng ngofal y cyngor.
Y llynedd prynodd y cyngor ddau dŷ newydd yn ardal Rhiwabon gyda chefnogaeth cynllun Gofal yn Nes at y Cartref Llywodraeth Cymru.
Y nod yw gofalu am blant mewn cartrefi llai sy’n teimlo’n fwy fel cartref teuluol cyffredin, ac yn eu cymunedau eu hunain yn hytrach na’u lletya ymhellach i ffwrdd.
Dywedodd y Cynghorydd Rob Walsh, Aelod Arweiniol Gofal Cymdeithasol Plant: “Fel cyngor rydym yn gofalu am blant nad ydynt yn gallu byw gyda’u teuluoedd eu hunain oherwydd materion diogelu neu resymau eraill.
“Rydyn ni’n cynnig achubiaeth i’r plant hyn ac rydyn ni’n gwneud popeth o fewn ein gallu i wneud yn siŵr eu bod yn cael eu magu mewn amgylchedd hapus a chefnogol.
“Yn draddodiadol, mae cartrefi plant wedi bod yn fwy, ond trwy greu cartrefi llai gallwn gynnig rhywbeth sy’n teimlo’n debycach i gartref teuluol cyffredin, gyda staff yn byw yno 24 awr y dydd ac yn ymgymryd â’r rôl rhianta mewn gwirionedd.
“Fe wnaethon ni ymgymryd â chynllun tebyg yn Rhostyllen tua 18 mis yn ôl, ac mae wedi bod yn llwyddiannus iawn – mae’r plant sy’n byw yno wedi ymgartrefu ac yn ffynnu, sy’n wych i’w weld.
“Bydd y cartrefi hyn yn golygu bod llai o’n plant sy’n derbyn gofal yn gorfod cael eu lleoli y tu allan i’r sir, sy’n gam cadarnhaol iawn.”
Mae Llywodraeth Cymru yn annog cynghorau i ddarparu mwy o’u cartrefi eu hunain i blant mewn gofal, yn hytrach na dibynnu ar leoliadau drutach ‘y tu allan i’r sir’ sy’n aml yn cael eu rhedeg er elw.
Ychwanegodd Alwyn Jones, Prif Weithredwr Cyngor Wrecsam: “Mae’r plant sydd wedi’u lleoli yn y cartrefi hyn i gyd o dan 16 oed ac eisoes yng ngofal y cyngor.
“Mae ganddyn nhw’r un anghenion ag unrhyw blentyn arall – amgylchedd cynnes a gofalgar, addysg a chymorth iechyd, a’r gallu i ddatblygu’r sgiliau sydd eu hangen arnynt i gyfrannu at gymdeithas pan fyddant yn oedolion.
“Mae’r cartrefi llai hyn yn ein helpu i ofalu am blant yn eu cymunedau lleol, fel y gallant barhau i fynychu’r un ysgol, a chadw mewn cysylltiad â ffrindiau a theulu estynedig lle bo hynny’n briodol.
“Mae’n ffordd well o wneud pethau, a gobeithio y byddwn yn gallu datblygu mwy o’r cartrefi bach hyn i blant yn y dyfodol.
“Rydyn ni hefyd yn ddiolchgar i gymunedau lleol am groesawu’r cartrefi hyn, ac am fod yn gymdogion gwych. Mae’n dangos bod Wrecsam yn lle gofalgar, ac mae’n rhywbeth y dylem ni i gyd fod yn falch iawn ohono.”
