Mae tîm Safonau Masnach Cyngor Wrecsam yn rhybuddio trigolion a manwerthwyr lleol i fod yn ofalus wrth brynu neu werthu teganau meddal poblogaidd sy’n gysylltiedig â chwiw ddiweddar ar y cyfryngau cymdeithasol.
Mae’r rhybudd yn dod ar ôl i dîm Safonau Masnach Cyngor Abertawe ganfod teganau meddal ffug a rhai nad oeddent yn cydymffurfio yn cael eu gwerthu i ddefnyddwyr, gyda phryderon yn cael eu codi ynghylch cynhyrchion a allai fod yn anniogel, diffyg gwybodaeth diogelwch, arogleuon cemegol anarferol, a diffyg manylion clir am y cyflenwyr.
Er nad oes unrhyw eitemau wedi’u hatafaelu’n lleol hyd yn hyn, mae swyddogion Safonau Masnach Cyngor Wrecsam yn annog trigolion a busnesau i fod yn wyliadwrus.
Gall teganau ffug roi plant mewn perygl gan y gallent fod wedi’u gwneud yn wael, cynnwys deunyddiau anniogel, neu fethu â bodloni gofynion diogelwch teganau’r DU.
Cynghorir trigolion i gymryd gofal ychwanegol cyn prynu teganau, yn enwedig o farchnadoedd ar-lein, hysbysebion ar y cyfryngau cymdeithasol, gwerthwyr dros dro neu wefannau anghyfarwydd.
Cyn prynu, dylai defnyddwyr wneud y canlynol:
- Gwirio’r pris – os yw’n edrych yn rhy dda i fod yn wir, mae’n debyg ei fod.
- Prynu o wefannau swyddogol neu fanwerthwyr dibynadwy.
- Chwilio am farciau diogelwch clir, fel CE neu UKCA.
- Sicrhau bod y tegan yn cynnwys cyfarwyddiadau diogelwch a chanllaw oedran.
- Gwneud yn siŵr bod y deunydd pacio yn cynnwys manylion gwneuthurwr neu fewnforiwr sydd wedi’i leoli yn y DU.
- Bod yn wyliadwrus o deganau sydd ag arogl cemegol cryf neu debyg i betrol.
- Osgoi cynhyrchion sydd â deunydd pacio o ansawdd gwael, camgymeriadau sillafu neu wybodaeth ar goll.
Mae manwerthwyr hefyd yn cael eu hatgoffa bod ganddynt gyfrifoldeb cyfreithiol i sicrhau bod unrhyw deganau maen nhw’n eu gwerthu yn cydymffurfio â chyfraith diogelwch y DU.
Dywedodd y Cynghorydd Hugh Jones, Aelod Arweiniol dros Gynllunio a Diogelu’r Cyhoedd: “Rydym yn gwybod y gall tueddiadau ar y cyfryngau cymdeithasol wneud rhai teganau yn hynod boblogaidd yn gyflym iawn, ac yn anffodus gall fersiynau ffug ymddangos yr un mor gyflym.”
“Ein cyngor yw bod yn ofalus, prynu oddi wrth werthwyr ag enw da, a sicrhau bod gan deganau y wybodaeth a’r marciau diogelwch cywir cyn eu rhoi nhw i blant.”
“Er nad ydym wedi atafaelu unrhyw un o’r cynhyrchion hyn ar hyn o bryd, rydyn ni am i drigolion a manwerthwyr fod yn ymwybodol o’r risgiau a chymryd y camau syml hyn i amddiffyn plant.”
Mae rhagor o wybodaeth am ddiogelwch teganau ar gael ar wefan Ymddiriedolaeth Atal Damweiniau ymhlith Plant.
Gall unrhyw un sydd â phryderon am degan maen nhw wedi’i brynu neu sy’n credu bod teganau anniogel neu ffug yn cael eu gwerthu yn Wrecsam roi gwybod amdano i Linell Gymorth Defnyddwyr Cyngor ar Bopeth ar 08082231133. Os hoffech siarad ag ymgynghorydd yn Gymraeg, cysylltwch â 08082231144.
Os na allwch glywed neu siarad ar y ffôn, deialwch 18001 yn gyntaf i gyrraedd Relay UK, lle gallwch deipio’r hyn yr hoffech ei ddweud yn lle hynny.
