Diogelwch merched a genethod yn parhau bod yn ganolbwynt allweddol yn Wrecsam yr haf hwn

Mae gwella diogelwch merched a genethod yng nghanol dinas Wrecsam yn parhau bod yn flaenoriaeth allweddol i Heddlu Gogledd Cymru’r haf hwn.

Drwy Ymgyrch Virtue, mae swyddogion dinas Wrecsam yn gweithio efo partneriaid er mwyn ymdrin â digwyddiadau trais yn erbyn merched a genethod (VAWG) drwy addysg, atal troseddau a chodi ymwybyddiaeth ymgyrchoedd parhaus.

Mae’r fenter yn annog pobl herio ymddygiad misogynistaidd, a chymryd ymdriniaeth ‘dim goddef’ tuag at aflonyddu merched, er mwyn sicrhau bod pawb yn teimlo’n saff wrth ymweld a gweithio yng nghanol y ddinas.

Mae hefyd efo’r nod o roi’r hyder i ferched riportio pob digwyddiad, cynyddu ymwybyddiaeth cyhoeddus a herio agweddau niweidiol.

Dywedodd Uwcharolygydd Mark Williams: “Mae dinas saffach yn cychwyn ymhell cyn i drosedd gael ei riportio.

“Mae’n cychwyn efo addysg ynglŷn ag ymddygiad annerbyniol, cymryd camau ymarferol ac amlwg er mwyn sicrhau bod merched yn teimlo’n saff, a chreu amgylchfydoedd lle mae merched yn cael eu parchu, eu helpu a’u gwarchod.

“’Da ni’n gobeithio ysbrydoli cymunedau herio aflonyddwch, rhoi help i ddioddefwyr a riportio pryderon cyn i ymddygiadau waethygu.

“Wrth ymdrin â’r anghydraddoldeb sy’n sail i VAWG, mi allwn ni greu canol y ddinas lle na fydd merched a genethod yn ddioddefwyr yn y lle cyntaf. Fodd bynnag, mae datrys y broblem yn fater i ni gyd.”

Beth ydy Ymgyrch Virtue?

Mae Ymgyrch Virtue yn enw cyffredinol am nifer o brosiectau, mentrau a gwaith parhaus ar draws canol dinas Wrecsam er mwyn atal digwyddiadau trais yn erbyn merched a genethod.

- Cofrestru -

Mae ymdrin â thrais yn erbyn merched a genethod yn un o brif flaenoriaethau Heddlu Gogledd Cymru, ac mae gwella ymddiriedaeth a hyder y cyhoedd yn ymateb yr heddlu’n allweddol.

Beth ydy Trais yn Erbyn Merched a Genethod (VAWG)?

Mae trais yn erbyn merched a genethod yn unrhyw fath o drais wedi’i gyflawni gan ddynion yn erbyn merched yn anghymesur, er gall dynion hefyd brofi trais neu gam-drin.

Mae’n gysylltiedig ag anghydraddoldeb merched, ac mae’n cynnwys trais rhywiol, cam-drin domestig, stelcian ac aflonyddwch, aflonyddwch cyhoeddus ac yn y gweithle, anffurfio organau cenhedlu benywod, priodas o dan orfod, yr hyn a elwir yn drais ar sail anrhydedd, camfanteisio a cham-drin merched a genethod mewn mannau ar-lein.

Beth sy’n digwydd fel rhan o Ymgyrch Virtue?

Dyma’r holl waith sy’n cael ei wneud gan swyddogion ar draws Dinas Wrecsam:

Siarter Diogelwch Nos i Ferched Gogledd Cymru

Mae’r fenter hon wedi’i llunio er mwyn gwella diogelwch pob merch sydd allan yng nghanol dinas Wrecsam gyda’r nos.

Mi gychwynnwyd hi gan Gyngor Sir Bwrdeistrefol Wrecsam ac mae Heddlu Gogledd Cymru yn ei hyrwyddo.

Mi wnaiff helpu lleoliadau greu mannau mwy diogel ar gyfer merched yn ystod gyda’r nos, ac mae’n gwahodd busnesau lleol i ymgymryd ag agwedd ‘dim goddef’ tuag at aflonyddu merched.

Gweithgor VAWG Heddlu Gogledd Cymru a Chlwb Pêl-droed Wrecsam

Mae Swyddogion Gweithredol Pêl-droed HGC yn cyfarfod efo swyddog diogelu’r clwb yn chwarterol, er mwyn adolygu a chryfhau ymdriniaeth plismona diwrnod gêm yn barhaus.

Mae trafodaethau’n cynnwys ymgyrchoedd newydd, gwaith addysgu ac atal, hyfforddiant ar gyfer staff diwrnod y gêm er mwyn eu helpu adnabod arwyddion aflonyddwch neu gam-drin, ac ymgyrchoedd rhagweithiol er mwyn targedu ymddygiad sy’n gysylltiedig â VAWG.

Car Diogelu Wrecsam

Mi ddefnyddir y car diogelu ar draws dinas Wrecsam ar gyfer ystod o ddibenion diogelu, yn enwedig er mwyn helpu cefnogwyr ifanc a merched ar ddyddiau gêm.

Patrolau economi gyda’r nos

Mae swyddogion Wrecsam yn cynnal patrôlau amlwg yn rheolaidd ac yn cydweithio gyda safleoedd trwyddedig, diogelwch a Chyngor Wrecsam nos Gwener ac nos Sadwrn i roi sicrwydd i fenywod sy’n ymweld â’r ddinas neu’n gweithio ynddi dros nos ac i sicrhau bod canol y ddinas yn lle croesawgar ac yn ddiogel i fyw, gweithio a ymweld ag ef.

Ymgysylltiad

Mi fydd swyddogion yn cynnal digwyddiadau ac arolygon yng nghanol y ddinas sy’n canolbwyntio ar ddiogelwch merched.

Mae’r adborth hyn yn ein helpu ni ddeall pryderon o fewn ein cymunedau ni’n well, ac yn ein caniatáu ni weithio tuag at wneud Wrecsam yn lle mwy diogel ar gyfer pawb.

Mae barn pawb yn bwysig, ac yn helpu llunio patrolau, mentrau a gwaith datrys problemau’r dyfodol yn y ddinas.

Helpu clybiau rhedeg lleol

Mae swyddogion yn helpu creu amgylchfyd mwy diogel a chynhwysol ar gyfer merched sy’n ymarfer corff yn y ddinas, drwy helpu clybiau rhedeg er mwyn sicrhau bod merched yn teimlo’n hyderus rhedeg heb ofni am eu diogelwch nhw.

Addysgu gyrwyr tacsis

Mae swyddogion yn gweithio mewn partneriaeth â Chyngor Wrecsam er mwyn addysgu gyrwyr tacsis ynglŷn â’r ymgyrch “Ask Angela”, ac adnabod arwyddion sbeicio diodydd, cam-drin rhywiol a cham-drin domestig.

Hafan- y-Dre

Mae Hafan-y-Dre’n ganolfan lles yn Wrecsam sy’n cynnig man saff ar gyfer unigolion sydd efallai’n fregus neu’n sâl yn ystod noson allan.

Addysg mewn ysgolion

O fis Medi 2026, mi fydd Swyddogion Cyswllt Ysgolion HGC yn cyflwyno rhaglenni atal casineb at ferched a VAWG mewn ysgolion.

Ceidwaid y Strydoedd

Mae Heddlu Gogledd Cymru a Chyngor Wrecsam yn gobeithio cyflwyno lefel ychwanegol o dawelwch meddwl ar gyfer y bobl sy’n mwynhau’r cyfleusterau gyda’r nos ar y penwythnosau.

Gwasanaeth bws gyda’r nos

Mae trafodaethau’n parhau efo Cyngor Wrecsam ynglŷn â chyflwyno gwasanaeth bws gyda’r nos, er mwyn helpu merched a genethod deithio adref yn saff.

Sut dwi’n riportio digwyddiad i’r heddlu?

Os ‘da chi wedi dioddef trosedd VAWG, neu efo unrhyw bryderon wrth fod allan yng nghanol y ddinas, cysylltwch efo Heddlu Gogledd Cymru drwy ffonio 101, neu 999 mewn argyfwng.

Mi gewch chi hefyd riportio digwyddiad i ni ar-lein.

Sut arall alla i gael help?

Mi allwch chi hefyd gysylltu efo:

Byw Heb Ofn

Os ydych chi, aelod o’r teulu, ffrind, neu rywun rydych chi’n poeni amdano wedi profi cam-drin domestig neu drais rhywiol, gallwch gysylltu â llinell Byw Heb Ofn Am Ddim 24 awr y dydd, 7 diwrnod yr wythnos, am gyngor a chymorth am ddim neu i drafod eich opsiynau.

Cysylltwch ag ymgynghorwyr Byw Heb Ofn am ddim.

Cymorth i Ferched Cymru

Os byddwch angen help a chymorth, gallwch gysylltu â Cymorth i Ferched Cymru yma.

Gofynnwch am Angela

Gofyn am Angela yw ffordd gyfrinachol i ofyn am gymorth os oes angen arnoch am unrhyw reswm.

Drwy ofyn am “Angela”, gallwch roi gwybod i bobl yn gyflym, yn dawel ac heb fawr o drafferth eich bod angen help.

Sut mae’n gweithio

Gofynnwch am “Angela” mewn lleoliad neu sefydliad sy’n cymryd rhan.

1. Mae’r staff yn ei gydnabod fel cais am gymorth.
2. Darperir cymorth yn gyfrinachol, yn y ffordd yr ydych chi ei eisiau.
3. Gall hyn fod yn help i adael, cael cefnogaeth i aros, cysylltu â diogelwch neu uwchgyfeirio lle bod angen.

Mae mwy o wybodaeth ar gael yma: Ask for Angela – Official UK Site

Ychwanegodd Uwcharolygydd Williams: “Da ni’n gobeithio creu amgylchfyd lle gall pob merch fwynhau noson allan neu fynd i’r gwaith heb bryderu ynglŷn â’u diogelwch neu ddioddef aflonyddwch.

“Mae nifer o sefyllfaoedd lle gall ferched deimlo’n anghyfforddus, ac mae rhai ymddygiadau’n cael eu hanwybyddu fel ‘tynnu coes’ yn rhy aml. Mi all hyn gynnwys sylwadau sy’n cael eu cyfeirio at staff lletygarwch, ystumiau neu wneud llygaid amhriodol neu sylw di-eisiau.

“’Da ni’n annog pobl adlewyrchu ar eu hymddygiad nhw eu hunain, herio ymddygiad pobl eraill, ac ystyried sut gall eu gweithrediadau nhw effeithio ar y bobl o’u cwmpas nhw.

“Wrth i droseddau VAWG gael eu cyflawni gan y lleiafrif, mae eu heffaith nhw’n cyrraedd ym mhell y tu hwnt i’r rhai effeithir arnyn nhw’n uniongyrchol.

“Mae sgyrsiau cenedlaethol a digwyddiadau adnabyddus yn dylanwadu ar ba mor saff mae merched a genethod yn teimlo yn eu bywydau dyddiol nhw, ac mae’n hanfodol bod cymunedau’n cydweithio er mwyn creu amgylchfydoedd lle mae pawb yn teimlo’u bod yn cael eu parchu, eu helpu ac yn saff.”

Dywedodd y Cynghorydd Beverley Parry-Jones, Pencampwr Trais ar Sail Rhywedd, Cam-drin Domestig a Thrais Rhywiol Cyngor Wrecsam: “Mi ddylai pob merch allu dod i ganol dinas Wrecsam a theimlo’n saff.

“’Da ni’n hynod o falch gweithio efo partneriaid ar fentrau fel Siarter Diogelwch Nos i Ferched, addysgu gyrwyr tacsis, cynnig ceidwaid y strydoedd ac addysgu pobl ifanc yn ein hysgolion ni.

“Mae’r pethau hyn i gyd yn gallu gwneud gwahaniaeth gwirioneddol, ac mae’n bwysig nad ydyn ni’n gorffwys ar ein bri ac yn parhau gweithio’n galed er mwyn gwella diogelwch merched a genethod yn ein dinas ni.”