Sut olwg fyddai ar Wrecsam pe bai mwy o deithiau byr yn cael eu gwneud ar droed neu ar feic yn y ddinas, y trefi a’r pentrefi ar draws y sir?
Heb hyd yn oed ystyried y gwelliannau o ran ansawdd aer a thagfeydd, faint o arian fyddai’n cael ei arbed gan y sir, y GIG a’r holl bobl hynny sy’n mynd o gwmpas ar eu liwt eu hunain? Mae rhaglen newydd yn cael ei lansio y mis hwn i helpu pobl i deithio o gwmpas mewn modd mwy llesol pan allan nhw – ac i’w hannog i gefnogi busnesau lleol pan fyddan nhw’n gwneud hynny.
Dywed James Baker, rheolwr y rhaglen: “Mae cynllun BetterPoints Wrecsam yn gwobrwyo, nid yn cosbi.
“O ymchwil, rydyn ni’n gwybod bod pobl sy’n cerdded, beicio neu’n mynd ar drafnidiaeth gyhoeddus ar gyfer teithiau rheolaidd yn hapusach ac yn iachach, ond yr hyn rydyn ni’n ei wybod hefyd yw bod y bobl hynny’n mynd heibio ac yn ymweld â siopau lleol, caffis a busnesau eraill i wario eu harian yn lleol. Bydd BetterPoints Wrecsam yn gwobrwyo pobl am wneud teithiau iachach – a gellir gwario’r gwobrau hynny mewn busnesau lleol neu eu rhoi i achosion lleol gwych fel Hosbis Tŷ’r Eos ac Ymddiriedolaeth Natur Gogledd Cymru.”
Mae gweithwyr yn Stad Ddiwydiannol Wrecsam wedi gallu ennill gwobrau am fynd i’r gwaith yn gynaliadwy ers mis Mawrth diwethaf, drwy gynllun peilot a ariennir gan Trafnidiaeth Cymru. Enillodd Richard Jones, sy’n gweithio yn Ipsen, daleb Tweeks Cycles am feicio i’r Stad Ddiwydiannol. Dywedodd, “Mae’n fy nghadw i’n heini, mae’n rhatach na gyrru, ac i fod yn onest, dw i’n ei fwynhau yn fwy na bod yn sownd yn y car.” Defnyddiodd Richard ei daleb i gasglu rhannau ar gyfer ei feic ei hun – ac i helpu ffrindiau a chydweithwyr. “Dw i’n gwneud swyddi cynnal a chadw bach i bobl eraill yn fy amser hamdden. Dw i‘n helpu fel bod eu beiciau yn ddiogel a’u bod nhw’n gallu parhau i feicio. Os yw’n helpu mwy o bobl i aros ar eu beiciau, mae hynny’n fuddugoliaeth i bawb.”
Mae BetterPoints Wrecsam yn agored i unrhyw un sy’n byw, yn gweithio neu’n astudio yn ardal Sir Wrecsam. I ymuno, lawrlwythwch yr ap BetterPoints am ddim a’i ddefnyddio i gofnodi teithiau a wneir ar droed, ar feic, mewn cadair olwyn, neu ar fws neu drên. Mae teithiau gwyrdd ac iach yn ennill BetterPoints, y gellir eu gwario mewn busnesau lleol sy’n cymryd rhan, ar dalebau archfarchnadoedd a Stryd Fawr, neu eu rhoi i elusennau lleol. Gall gyrwyr rheolaidd ddefnyddio’r ap i’w helpu i newid unrhyw deithiau byrrach sy’n gallu cael eu gwneud trwy ddulliau eraill.
Mae BetterPoints eisiau gweithio gyda sefydliadau lleol i’w helpu i gyflawni eu nodau trafnidiaeth, iechyd a hinsawdd – a gyda masnachwyr ac elusennau i ychwanegu gwobrau lleol ac achosion da i’r ap. P’un a ydych chi’n gaffi, sefydliad cymunedol neu elusen leol, gall ymuno â BetterPoints helpu i gysylltu eich sefydliad â phobl leol sy’n gwneud dewisiadau teithio cadarnhaol.
Bydd y lansiad yn canolbwyntio ar y Mis Newid Modd ym mis Medi, gan wobrwyo pobl am gyfnewid teithiau car lle bo modd am gerdded, olwyno, beicio neu drafnidiaeth gyhoeddus. Gall cyfranogwyr ennill BetterPoints trwy gydol y mis, gyda chyfle am wyliau gwerth £900 mewn dinas yn Ewrop i’r rhai sy’n teithio heb gar dair gwaith rhwng 16 a 22 Medi. Am ragor o wybodaeth ac i lawrlwytho’r ap, ewch i wefan BetterPoints.
