Mae buddsoddiad parhaus Cyngor Wrecsam mewn gwasanaethau bysus lleol yn helpu i gefnogi cynnydd yn nifer y teithwyr, a gwella mynediad at drafnidiaeth gyhoeddus ar draws y fwrdeistref sirol.
Ers 2023, mae Cyngor Wrecsam wedi cymeradwyo £650,000 o gyllid i gefnogi gwasanaethau bysus lleol ychwanegol.
Mae’r buddsoddiad wedi helpu i ddarparu llwybrau newydd a gwasanaethau estynedig gyda’r nos, gyda chyfanswm nifer y teithwyr sy’n defnyddio’r gwasanaethau ychwanegol hyn bellach yn fwy na 163,000.
Mae’r ffigurau’n adeiladu ar y cyhoeddiad diweddar y bwriedir ymestyn oriau agor gorsaf fysus Wrecsam yn dilyn twf parhaus yn y defnydd o fysus a buddsoddiad parhaus mewn gwasanaethau trafnidiaeth leol.
Mae disgwyl i’r gwasanaeth diogelwch yn yr orsaf fysus gael ei ymestyn o 6pm i 10pm o ddydd Llun 18 Mai.
Bydd y buddsoddiad ychwanegol hefyd yn cael ei ddefnyddio i adnewyddu seilwaith allweddol safleoedd bysus, gan gynnwys baneri safleoedd bysus a llochesi bysus ledled y fwrdeistref sirol.
Dywedodd y Cynghorydd David A Bithell, yr Aelod Arweiniol dros Drafnidiaeth Strategol, “Rydym wedi gweithio’n galed dros y blynyddoedd diwethaf i gefnogi a gwella gwasanaethau bysus lleol yn Wrecsam, ac mae’n galonogol gweld bod y buddsoddiad hwn yn cael ei ddefnyddio gan deithwyr.”
“Mae mwy na 163,000 o deithiau teithwyr bellach wedi’u gwneud ar y gwasanaethau ychwanegol, sy’n dangos pwysigrwydd darparu trafnidiaeth gyhoeddus ddibynadwy a hygyrch i’n cymunedau.”
Mae gwaith pellach hefyd yn cael ei wneud ar ddyfodol gwasanaethau bysus yn Wrecsam ac ar draws gogledd Cymru.
Ar hyn o bryd mae Trafnidiaeth Cymru yn gweithio gydag awdurdodau lleol i ddatblygu Rhwydwaith Sylfaen arfaethedig, a fydd yn nodi sut beth fyddai llwybrau bysus yn y dyfodol. Disgwylir i ymgynghoriad cyhoeddus gael ei gynnal yn Wrecsam yn ystod mis Mehefin a mis Gorffennaf.
Bydd gwaith partneriaeth pellach hefyd yn parhau i gefnogi gwelliannau i wasanaethau bysus lleol, ac yn annog mwy o ddefnydd o drafnidiaeth gyhoeddus ar draws Wrecsam.
Mae rhagor o wybodaeth am drafnidiaeth gyhoeddus ar draws Wrecsam ar gael ar wefan Traveline Cymru.
