Mae busnes o Wrecsam sydd wedi bod yn gwasanaethu cwsmeriaid ers 60 mlynedd wedi ennill prif wobr genedlaethol yn y diwydiant teithio.
Agorodd Delmar World, sydd wedi’i leoli ar Ffordd Caer yng Ngresffordd, ei ddrysau yn ôl ym 1964.
Heddiw, mae’r rheolwr gyfarwyddwr Ann Anglesea a’i brawd Howard yn parhau i arwain y busnes teuluol ar hyd llwybr llwyddiant – ac mae Delmar wedi’i henwi’n ddiweddar yn enillydd Gwobrau Teithio Moethus TTG eleni.
Mae’r gwobrau’n cael eu parchu’n fawr yn y diwydiant, ac yn edrych ar sut mae busnesau’n gofalu am eu cwsmeriaid a’u gweithwyr, a’u gwybodaeth a’u hymrwymiad i’r lleoedd lle maen nhw’n anfon eu cwsmeriaid ar wyliau.
Curodd Delmar gystadleuaeth gref gan gannoedd o asiantaethau teithio eraill ledled y DU, a chyflwynwyd eu gwobr iddynt mewn seremoni ddisglair yn Llundain yn ddiweddar.
Yr wythnos diwethaf aeth y Cynghorydd Nigel Williams, Aelod Arweiniol Cyngor Wrecsam dros yr Economi, Busnes a Thwristiaeth, i gwrdd ag Ann a’r tîm.
Dywedodd y Cynghorydd Williams: “Mae chwe deg mlynedd yn garreg filltir enfawr, a pha ffordd well o ddathlu na thrwy ennill gwobr genedlaethol fawreddog?
“Mae Delmar World yn fusnes lleol gwych sy’n parhau i ffynnu a thyfu – gan danlinellu’r ffaith bod Wrecsam yn lle gwych i wneud busnes.
“Mae mor bwysig ein bod ni’n cefnogi mentrau lleol ac roedd yn wych cwrdd ag Ann a’r tîm, a gwrando ar eu cynlluniau ar gyfer y dyfodol. Rwy’n gobeithio eu bod yn parhau i fwynhau pob llwyddiant.”
Dywedodd Ann: “Ar ôl tyfu i fyny gyda’r busnes teuluol, rydw i mor falch bod fy mrawd Howard a minnau’n dathlu 60 mlynedd yn y diwydiant teithio.
“Gyda’n gilydd rydym nid yn unig wedi tyfu’r busnes, ond rydyn ni wedi cadw’r un gwerthoedd ac ethos ers pan gafodd ei ddechrau ym 1964.
“Mae llawer o’n cwsmeriaid yn cofio ein dyddiau cynnar ac mae eu plant a’u hwyrion yn archebu eu hanturiaethau byd-eang gyda ni heddiw, sy’n golygu’r byd i ni!
“Ennill y wobr genedlaethol hon yw’r un mawr i ni. Mae gennym gymaint i’w gynnig yn yr arena gwyliau moethus ac rydym yn falch ein bod wedi cael ein cydnabod am ein gwaith caled. Fodd bynnag, rydym yn cynnig gwyliau rhatach hefyd!”
Mae Cyngor Wrecsam yn darparu ystod o wasanaethau i gefnogi busnesau sydd wedi’u lleoli yn y fwrdeistref sirol, yn ogystal â busnesau sy’n dymuno cychwyn yn Wrecsam neu symud i Wrecsam.
