Mae’r prosiect, a hwyluswyd gan Gyngor Wrecsam a grant trwy Raglen Trawsnewid Trefi Llywodraeth Cymru, wedi cefnogi un o gaffis hynaf a mwyaf poblogaidd Wrecsam i gwblhau gwaith adnewyddu mawr, gan helpu i ddiogelu darn pwysig o dreftadaeth y ddinas wrth gefnogi twf yn y dyfodol.
Marrubi’s, ar Stryt y Banc, yw’r caffi hynaf yn Wrecsam, gyda’r busnes wedi’i sefydlu gyntaf ym 1896. Wedi’i leoli’n wreiddiol ar Stryt Yorke, symudodd yn ddiweddarach i Stryt yr Abad ym 1910, cyn symud i Stryt y Banc ym 1918, lle mae wedi parhau i fod yn rhan bwysig o ganol y ddinas byth ers hynny.
Rhaglen gan Lywodraeth Cymru yw Trawsnewid Trefi sy’n darparu miliynau o bunnoedd i adfywio canol trefi yng Nghymru. Mae canol trefi a dinasoedd yn rhan hanfodol a phersonol o dreftadaeth a chymunedau Cymru, a nod y rhaglen Trawsnewid Trefi yw gwasanaethu a chysylltu’r bobl sy’n byw, yn gweithio, yn dysgu ac yn treulio amser hamdden ynddynt.
Mae Caffi Marubbi’s bellach wedi cwblhau rhaglen o waith adnewyddu allanol a mewnol sydd wedi’i dylunio i gadw cymeriad traddodiadol yr adeilad wrth fynd i’r afael ag anghenion cynnal a chadw hanfodol.
Mae’r caffi wedi cael ei redeg gan yr un teulu ers cenedlaethau, gyda’r perchennog presennol Hari Gould yn cynrychioli’r bumed genhedlaeth i gydio yn awenau’r busnes yn 2022.
Roedd y gwaith yn cynnwys atgyweiriadau ac ailosod gwteri haearn bwrw yn rhannol, ailbaentio a selio gwaith brics allanol, ailosod ffenestri ar y llawr uchaf, gosod drysau pren ac arwyddion newydd ynghyd ag adlen draddodiadol newydd, gwneud atgyweiriadau i’r to a gwelliannau i’r to gwastad dros y cownter, y storfa a’r gegin, a chreu cyfleusterau lles staff newydd.
Mae’r prosiect wedi gwneud gwahaniaeth gweladwy i olwg yr adeilad, wrth helpu i ddiogelu busnes teuluol hirsefydlog sy’n rhan o hanes canol dinas Wrecsam.
Mae hefyd wedi cefnogi’r economi leol, gyda chontractwyr lleol yn sicrhau contractau fel rhan o’r gwaith, a mwy na £30,000 wedi’i wario’n lleol.
Mae’r gwelliannau wedi helpu i wella profiad cwsmeriaid, cynyddu nifer yr ymwelwyr a chefnogi cynlluniau tymor hwy y caffi, gan gynnwys agor siop gludfwyd a chynlluniau ar gyfer bar i fyny’r grisiau a gofod digwyddiadau.
Mae cwsmeriaid eisoes wedi ymateb yn gadarnhaol i’r gwelliannau, yn enwedig yr ardal awyr agored wedi’i hadnewyddu, yr arwyddion newydd a gwell golwg yr adeilad.
Dywedodd Hari Gould, perchennog Caffi Marubbi, “Y llynedd, cefais fy synnu ar ôl darganfod am y Rhaglen Trawsnewid Trefi sy’n cael ei rheoli gan Gyngor Wrecsam ar ran Llywodraeth Cymru. Allwn i ddim credu fy mod yn gymwys i dderbyn grantiau tuag at waith a allai wella fy musnes.”
“Fe wnes i gydio yn awenau Marubbi’s yn 2022 ac roeddwn wedi bod yn ceisio ei adnewyddu a’i wella gymaint â phosibl gyda’r hyn roeddwn i wedi’i arbed bob wythnos, ond roedd yna lawer o brosiectau mawr roeddwn i’n gwybod y byddai’n rhaid i mi eu gadael i aros oherwydd ni fyddwn yn gallu eu fforddio am gyfnod.”
“Roedd hyn yn cynnwys trwsio’r to gwastad yr oedd fy hen dad-cu wedi’i wneud o’r blaen, drysau a ffenestri newydd yr oedd angen eu newid, gosod toiled, paentio’r tu allan, arwyddion newydd a chanopi newydd mawr ei angen ar gwsmeriaid oherwydd bod yr un blaenorol wedi rhwygo mewn mannau.”
“Hoffwn ddiolch i Anna, y Swyddog Prosiect o’r Tîm Adfywio yng Nghyngor Wrecsam, am fod yn hynod barod i helpu a gwneud popeth yn syml iawn i mi, sydd ddim yn dasg hawdd.”
“Hoffwn ddiolch hefyd i Aidrian o Gyngor Wrecsam am dynnu fy sylw at y grant a sicrhau bod yr holl fusnesau lleol yn gwybod y diweddaraf am brosiectau Wrecsam.”
Dywedodd y Cynghorydd Nigel Williams, yr Aelod Arweiniol dros yr Economi, Busnes a Thwristiaeth, ‘ Mae darparu’r Rhaglen Trawsnewid Trefi yn gwneud cyllid ar gyfer prosiectau adfywio yn fwy hygyrch, gan ein galluogi i adeiladu ar y llwyddiannau yr ydym eisoes wedi’u cyflawni yn Wrecsam. Mae Caffi Marubbi’s yn enghraifft wych o fusnes hirsefydlog yn Wrecsam sy’n buddsoddi yn ei ddyfodol, wrth ddiogelu’r dreftadaeth a’r cymeriad sy’n gwneud canol ein dinas yn arbennig.”
“Yn ogystal â gwella golwg adeilad hanesyddol pwysig, mae’r prosiect wedi helpu i gefnogi contractwyr lleol, creu swyddi a symud ymlaen â’r cynlluniau busnesau ar gyfer twf.”
“Mae’n arbennig o braf gweld busnes teuluol pumed cenhedlaeth yn parhau i ffynnu yng nghanol Wrecsam. Mae gwelliannau fel hyn yn helpu i gryfhau canol y ddinas, cefnogi’r economi leol a gwneud Wrecsam yn lle mwy deniadol i breswylwyr ac ymwelwyr.”
Mae Marubbi’s yn 10 Stryt y Banc, LL11 1AH, ac mae ar agor rhwng 8:30am a 5pm.
Gallwch gysylltu â Chaffi Marubbi’s drwy ffonio 01978291897.
I gael rhagor o wybodaeth am y Rhaglen Trawsnewid Trefi, anfonwch e-bost i grants@wrexham.gov.uk
