Ar ddydd Mercher 9 Medi, byddwn yn codi’r faner 999 yn Neuadd y Dref wrth i ni nodi Diwrnod y Gwasanaethau Brys blynyddol.
Mae Diwrnod 999 yn hyrwyddo gwaith ymroddedig a hanfodol ein gwasanaethau brys. Mae’n gyfle i hyrwyddo’r defnydd cyfrifol o’r gwasanaethau hyn ac i ddysgu sgiliau achub bywyd sylfaenol i’r cyhoedd.
Mae’r diwrnod yn gyfle gwych i bobl ddysgu mwy am gyfleoedd gyrfa a gwirfoddoli y gallant eu dilyn yn y gwahanol sectorau. Mae rolau gwirfoddol yn chwarae rhan greiddiol wrth gadw Prydain yn ddiogel, ac maent yn rhan hanfodol o’r gwasanaethau brys.
Mae Ymatebwyr Cyntaf Cymunedol y GIG, Ambiwlans Sant Ioan, RNLI, timau Chwilio ac Achub a Gwylwyr y Glannau, Diffoddwyr Tân a Chwnstabliaid Arbennig i gyd yn rolau gwirfoddoli sy’n gwneud gwahaniaeth enfawr.
Rydym yn cymryd eiliad bob blwyddyn i fyfyrio a diolch i arwyr 999 ddoe a heddiw sy’n parhau i wasanaethu cymunedau yma yn Wrecsam ac ar draws y DU.
Dywedodd Arweinydd y Cyngor, y Cynghorydd Mark Pritchard, “Hoffwn ddiolch yn ddiffuant ar fy rhan fy hun a phawb yn Wrecsam i’r unigolion hynod ddewr hynny sy’n gwasanaethu, neu sydd wedi gwasanaethu, gyda chymaint o ymroddiad ac angerdd yn y gwasanaethau brys.
“Yma, yn Wrecsam, ac ar draws y wlad, rydych chi’n sicrhau ein diogelwch bob dydd ac, am hynny, rydym yn ddyledus i chi i gyd.”
Ychwanegodd y Prif Weithredwr, Alwyn Jones, “Mae’n bwysig iawn ein bod ni i gyd yn cymryd eiliad ar 9 Medi i fyfyrio ac ystyried pa mor bwysig yw’r gwasanaethau brys. Rydym yn dibynnu ar y bobl hyn gymaint ar adegau o angen, ac mae Diwrnod 999 yn ffordd berffaith o ddangos i’r gweithwyr hynny faint rydym yn eu hedmygu, eu parchu a’u gwerthfawrogi.
“Nid ydych byth yn gwybod pryd y gallai sefyllfa 999 godi, ond rydym yn ffodus bod yr arwyr yn barod, ac yn aros i’n helpu pe bai hynny’n codi, ac rwy’n diolch i chi i gyd am eich gwaith hanfodol.”
