Ynghyd â chasgliad trawiadol o lyfrau a chyfleusterau ymchwil, mae ein llyfrgelloedd yn cynnal digwyddiadau wythnosol a misol i bawb yn ein cymuned.
Mae digon o ddigwyddiadau ar gyfer pob oedran a diddordeb yn eich llyfrgell leol a, heddiw, byddwn yn edrych ar ba weithgareddau y gallwch gymryd rhan ynddynt yn llyfrgell Gwersyllt.
Wedi’i lleoli yng Nghanolfan Adnoddau Cymunedol Gwersyllt ar Ail Rodfa, bydd ei staff cyfeillgar bob amser yn rhoi croeso cynnes i ymwelwyr.
O sgwrsio am chwaraeon i dynnu lluniau
Mae gan lyfrgell Gwersyllt y ffordd berffaith o ddechrau’ch wythnos gyda digwyddiadau wythnosol yn digwydd bob dydd Llun.
Rhwng 2pm a 3pm, mae cyfle i ddilynwyr chwaraeon gwrdd a thrafod digwyddiadau chwaraeon y penwythnos gyda phaned o de a bisgedi. Mae’r Drafodaeth Chwaraeon yn croesawu pawb i ymuno.
I’r rhai sydd ag artistiaid ifanc addawol, cynhelir yr Amser Lliwio i blant bob dydd Llun rhwng 3pm a 4.45pm. Mae’n gyfle gwych i bobl ifanc adael i’w creadigrwydd lifo a chwrdd â ffrindiau newydd. Mae’n ddigwyddiad am ddim heb fod angen cadw lle ac mae’r holl ddeunyddiau yn cael eu darparu.
Hobïau creadigol a ffrindiau newydd
Mae dyddiau Mawrth yn llyfrgell Gwersyllt yn cynnig cyfleoedd gwych i wneud ffrindiau newydd a dod at eich gilydd gydag eraill sy’n rhannu’r un diddordebau.
Mae’r grŵp Gwau a Sgwrsio yn cwrdd bob dydd Mawrth rhwng 2pm a 4pm. Gallwch sgwrsio wrth i chi weithio ar eich prosiect gwau neu grosio. Mae’n gyfle i ddysgu sgiliau newydd neu wella eich sgiliau presennol. Mae’r digwyddiad am ddim hwn yn addas ar gyfer pob oedolyn.
Gallwch hefyd ymuno â’r Clwb Benthyca Llyfrau i Bobl dros 60 oed. Mae’n amser i wneud ffrindiau newydd dros y cariad cyffredin at ddarllen a chyfnewid argymhellion ar gyfer y llyfr nesaf i ymgolli ynddo.
Munud i feddwl
Mae awyrgylch tawel yn y llyfrgell ar ddydd Mercher wrth i’r Amser Tawel wythnosol am ddim gael ei gynnal rhwng 10am a 11am. Dewch draw i gael ychydig o amser darllen tawel.
Yn ogystal, cynhelir sesiwn Lliwio Ymwybyddiaeth Ofalgar wythnosol rhwng 10am a 1pm. Dewch draw i’r digwyddiad am ddim hwn i gael gwared ar straen a bod yn greadigol.
Ar ddydd Mercher cyntaf y mis, mae’r Grŵp Crefft yn dod at ei gilydd rhwng 2.30pm a 4.30pm i greu ychydig o ddarnau anhygoel. Beth am ddod i ymuno â nhw ar gyfer y digwyddiad am ddim hwn?
Bob ail ddydd Mercher o’r mis am 2.30pm, cynhelir y sesiynau Atgofion. Mae’n gyfle gwych i bobl hel atgofion gyda ffrindiau a gwneud rhai newydd ar hyd y ffordd. Mae croeso i bawb gymryd rhan yn y digwyddiad am ddim hwn.
Casglu ac adeiladu
Ar gyfer pob plentyn dan 16 oed sy’n awyddus i gwblhau eu casgliadau cardiau neu sticeri, cynhelir y Sesiwn Gyfnewid bob dydd Iau rhwng 3.30pm a 4pm. Gall casglwyr alw heibio er mwyn cyfnewid gydag eraill i gwblhau eu setiau. Mae yna bolisi ‘dod ag un, cymryd un’ ar waith ac ni chaniateir unrhyw fasnachwyr sy’n oedolion.
Mae’r Clwb Lego yn cwrdd bob dydd Gwener rhwng 3.15pm a 4pm ac mae’n addas i blant 4 oed a hŷn. Nid oes angen cadw lle na thalu unrhyw gost am alw heibio. Gall plant ddysgu sgiliau meddal amrywiol, datrys problemau, gwaith tîm, meddwl yn greadigol a chyfathrebu wrth gael llawer o hwyl.
Am ragor o fanylion am yr holl ddigwyddiadau a grybwyllir yma a mwy, ewch i’n tudalen digwyddiadau llyfrgelloedd. Fel arall, gallwch ffonio 01978 722880 neu e-bostio gwersylltresource@wrexham.gov.uk am ragor o wybodaeth.
