Gyda’r tymor pêl-droed ar y gweill a rhai penwythnosau prysur o’n blaenau, mae gyrwyr yn cael eu hannog i gwblhau teithiau didrafferth i ganol dinas Wrecsam trwy barcio’n gyfrifol a bod yn ymwybodol o gyfyngiadau traffig.
Cafodd trefniadau traffig newydd eu cyflwyno o amgylch ardal Stryt Yorke, Stryt Fawr ac Allt y Dref bron i 18 mis yn ôl.
Gall cerbydau awdurdodedig gael mynediad i’r ardal trwy’r bolardiau sy’n codi ar waelod Stryt Yorke, cyn dilyn system unffordd ar hyd Stryt Fawr, Stryt Caer neu Stryt Siarl.
Er bod y rhan fwyaf o yrwyr wedi dod i arfer â’r cynllun newydd, mae rhai yn dal i’w gael yn anghywir o bryd i’w gilydd – a all roi cerddwyr a defnyddwyr eraill y ffordd mewn perygl (ac arwain at erlyniad).
Mae enghreifftiau diweddar yn cynnwys modurwyr yn ceisio gyrru trwy arwyddion ‘dim mynediad’ neu yrru’r ffordd anghywir i lawr strydoedd unffordd.
Dywedodd y Cynghorydd Nigel Williams, Aelod Arweiniol y Cyngor dros yr Economi, Busnes a Thwristiaeth: “Rydyn ni am i bawb fwynhau Wrecsam a manteisio i’r eithaf ar eu hamser yng nghanol y ddinas.
“Os ydych chi’n teithio yno mewn car, helpwch i wneud yn siŵr eich bod chi’n cael profiad didrafferth trwy barcio’n gyfrifol a bod yn ymwybodol o drefniadau traffig.
“Ystyriwch barcio yn un o’r nifer o feysydd parcio a weithredir gan y Cyngor neu a weithredir yn breifat, a gwnewch yn siŵr eich bod chi’n dilyn y rheolau ‘dim mynediad’ a thraffig unffordd o amgylch ardal y Stryt Fawr.
“Mae Wrecsam ar gynnydd ac mae canol y ddinas yn wych, felly parciwch yn gyfrifol, gyrrwch yn gyfrifol a mwynhewch ein dinas hyfryd.”
Dywedodd Sarjant Dinas Wrecsam, Nathan Harvey: “Mae Heddlu Gogledd Cymru yn cymryd adroddiadau o droseddau traffig o ddifrif a bydd yn cymryd camau cadarnhaol lle mae troseddau yn cael eu harsylwi gan swyddogion neu eu hadrodd gan aelodau o’r cyhoedd.
“Bydd unrhyw dystiolaeth o yrru peryglus, diofal, neu wrthgymdeithasol yn cael ei hadolygu a, lle bo hynny’n briodol, yn destun erlyniad.
“Mae nifer o fodurwyr eisoes wedi’u hadnabod ac wedi’u delio â nhw yn dilyn gweithgaredd gorfodi yng nghanol dinas Wrecsam.
“Mewn rhai achosion, siaradodd swyddogion yn uniongyrchol â gyrwyr ar adeg y drosedd, tra bod eraill wedi derbyn hysbysiadau diweddarach a gohebiaeth ddilynol drwy’r post.
“Yn ogystal â phatrolau gwelededd uchel, mae Heddlu Gogledd Cymru yn cael ei gefnogi gan rwydwaith teledu cylch cyfyng helaeth ledled canol dinas Wrecsam. Mae’r dechnoleg hon yn galluogi swyddogion i adolygu digwyddiadau, adnabod cerbydau a gyrwyr sy’n troseddu, a chymryd camau gorfodi hyd yn oed pan nad yw swyddogion yn bresennol ar yr adeg y mae trosedd yn digwydd.
“Rydyn ni’n cydnabod y gall y math hwn o ymddygiad gael effaith sylweddol ar ddiogelwch y cyhoedd a hyder y cyhoedd. Mae cyflymder gormodol, symudiadau peryglus, sŵn diangen a mathau eraill o yrru gwrthgymdeithasol yn rhoi cerddwyr, beicwyr, a defnyddwyr eraill y ffordd mewn perygl, yn enwedig mewn ardaloedd prysur yng nghanol y ddinas.
“Byddwn ni’n parhau i weithio gyda phartneriaid, defnyddio’r holl dystiolaeth sydd ar gael a chymryd camau cadarn yn erbyn y rhai sy’n dewis anwybyddu’r gyfraith. Ni fydd ymddygiad sy’n peryglu diogelwch ein cymunedau yn cael ei oddef, ac rydyn ni’n annog unrhyw un sy’n dyst i droseddu i roi gwybod am hynny fel y gellir cymryd camau priodol.”
