Draw yn yr Hwb Lles yn Adeiladau’r Goron, mae staff a gwirfoddolwyr yn cynnig diwrnodau Parth Teulu llawn hwyl am ddim drwy gydol gwyliau’r ysgol.
Hyd yn hyn, mae’r sesiynau wedi bod yn boblogaidd iawn gyda llawer o deuluoedd yn mynychu ac yn cymryd rhan yn hwyl a sbri’r haf.
Gall teuluoedd alw draw a mwynhau’r awyrgylch a’r gweithgareddau gwych. Mae sesiynau’n cael eu cynnal bob dydd Mercher a dydd Iau drwy gydol gwyliau’r haf (ac eithrio dydd Mercher 19 a dydd Iau 20 Awst).
Gallwch ddisgwyl gofod hamddenol a chroesawgar yma gyda chwarae, diod a byrbryd am ddim. Mae eitemau bwyd fel ffrwythau ffres, grawnfwyd, bariau grawnfwyd a chylchoedd sbageti wedi cael eu rhoi’n garedig gan Fanc Bwyd Wrecsam ac mae staff hefyd wedi cyfrannu byrbrydau.
Mae timau Deieteg a Gwella Iechyd BIPBC wedi helpu i hwyluso gweithgareddau. Helpodd deietegwyr o BIPBC y plant i greu eu grawnfwyd brecwast eu hunain i’w fwynhau ochr yn ochr â byrbryd iach wrth ddysgu am ddewisiadau bwyd cadarnhaol.
Mae’r hwyl yn cael ei chydlynu drwy ymdrech tîm sy’n cynnwys gwirfoddolwyr ymroddedig sydd eisoes wedi helpu i gyflwyno ystod eang o weithgareddau cyffrous, o barti dawns i weini cylchoedd sbageti ar dost.
Mae adborth gan rieni sydd wedi mynychu’r sesiynau hyd yma wedi bod yn gadarnhaol iawn. Dywedodd un rhiant, “Fe helpodd ni i wneud rhywbeth yn ystod y gwyliau. Caniataodd i’r plant gymdeithasu. Braf cael rhywbeth i’w wneud yn wythnosol.”
Mae’r Parth Teulu yn cynnig cyfle gwych i deuluoedd ymlacio, sgwrsio, chwarae a chysylltu ag eraill. Mae hefyd yn gyfle da i blant ddysgu am arferion iach mewn ffordd hwyliog a diddorol.
Mae llawer mwy o hwyl ar y gweill cyn i wyliau’r haf ddod i ben felly gwnewch yn siŵr eich bod chi’n galw draw ar rai o’r dyddiadau sy’n weddill.
Does dim angen cadw lle ymlaen llaw ac mae ar gael i blant o bob oed. Mae’n rhaid i blant fod yng nghwmni oedolyn. Am ragor o wybodaeth, cysylltwch ag aelod o’r tîm yn wellbeinghub@wrexham.gov.uk.
